प्रचण्ड-माधव समूह भन्छ : प्रवृत्तिगत टिप्पणीको जवाफ व्यक्तिगत लाञ्छनामा केन्द्रित

प्रचण्ड-माधव समूह भन्छ : प्रवृत्तिगत टिप्पणीको जवाफ व्यक्तिगत लाञ्छनामा केन्द्रित

फाइल तस्वीर

A+ A A-

नेपाल कम्युनिस्ट पार्टी (नेकपा)का अध्यक्ष केपी ओलीले प्रवृत्तिगत टिप्पणीको प्रत्युत्तर व्यक्तिगत तहमा गरेको प्रचण्ड-माधव नेपाल समूहले बताएका छन् ।

शनिबारको सचिवालय बैठकमा अध्यक्ष पुष्पकमल दाहाल 'प्रचण्ड'को १९ पृष्ठको प्रतिवेदनलाई ३८ पृष्ठमा खण्डन गर्दै पेश भएको प्रतिवेदन व्यक्तिगत लाञ्छनामा बढी केन्द्रित भएको त्यस समूहको प्रतिक्रिया हो । प्रचण्डले पार्टी एकीकरण पछिको राजनीतिक घटनाक्रमलाई समेटेर प्रतिवेदन पेश गरेकोमा अध्यक्ष ओलीले लाञ्छना लगाउनै लागि एकीकरणअघि देखिएका विषय समेटेको प्रचण्ड-माधव नेपाल समूहको निष्कर्ष छ ।

प्रचण्ड पक्षका नेता वर्षमान पुनले प्रतिवेदन रचनात्मक नभएको टिप्पणी गरेका छन् । ‘राजनीतिक रूपमा आउनुपर्ने प्रतिवेदन व्यक्तिगत प्रत्यारोपमा बढी केन्द्रित भएको छ । पार्टी एकीकरणअघि देखिका लाञ्छनाले नै त्यसलाई पुष्टि गर्छ । यो प्रवृत्तिगत समस्याका टिप्पणीको जवाफ व्यक्तिगत तहमा आएकाले यसलाई रचनात्मक भन्न सकिँदैन,’ नेता पुनले भने ।

यस्तै माधव नेपाल समूहका नेता युवराज ज्ञवालीले ओलीको राजनीतिक प्रतिवेदन आक्रोशयुक्त भएको टिप्पणी गरेका छन् । संविधानसभा विघटन, भरतपुर घटनालगायत एकीकरण अघिका घटनाक्रमलाई समेत जोडेर प्रतिवेदनमा व्यक्तिगत लाञ्छना लगाइएको उनको तर्क छ ।

प्रचण्डले प्रवृत्तिगत रूपमा गरेका टिप्पणीलाई ओलीले आक्रोशित हुँदै व्यक्तिग लाञ्छना लगाएको उनले बताए । ‘प्रचण्डको प्रतिवेदनमा प्रवृत्तिको आलोचना भएको थियो यता ओलीको प्रतिवेदनमा भने व्यक्तिगत रुपमा आलोचना भयो,’ ज्ञवालीले भने ।

सचिवालयको बैठकमा ओलीको राजनीतिक प्रतिवेदनलाई अध्यक्ष प्रचण्डले दम्भीको संज्ञासमेत दिएका थिए । ‘तपाईंको दम्भ र अहंकार अझै नघटेको प्रतिवेदनले नै प्रष्ट पार्छ,’ प्रचण्डले बैठकमा भनेका थिए ।

ओलीले प्रचण्डलाई परिवारवादमा लागेको, जनचाहनाविपरीत संविधानसभाको विघटन गर्न संलग्न भएको, सरकारविरुद्धको षडयन्त्रमा केन्द्रित रहेको जस्ता आरोप लगाएका थिए । प्रचण्ड पार्टी सञ्चालनमा अपारदर्शी रहेको ओलीको आरोप छ । सरकार सञ्चालनमा अध्यक्ष प्रचण्डले असहयोग गरेको र सरकारविरुद्ध अविश्वासको प्रस्तावका लागि षडयन्त्र गरिरहेको आरोप ओलीले लगाएका थिए।

‘राष्ट्रिय आकांक्षा पूरा गर्न दृढतापूर्वक लागेको आफ्नै दलको सरकारलाई गठन हुँदाको प्रारम्भदेखि नै असयोग गर्ने नियोजित सरकारविरुद्ध षड्यन्त्र गर्ने, राज्यका संयन्त्रमाथि अनाधिकृत हस्तक्षेप गर्ने र दबाब दिने चेष्टा किन गर्न खोजिएको छ इतिहासले जवाफ खोज्नेछ,’ ओलीले भनेका छन् ।

यी विषय अध्यक्ष प्रचण्डको प्रतिवेदनको खण्डनस्वरूप आएको नेकपा अध्यक्ष एवं प्रधानमन्त्री ओलीको सचिवालयले बताएको छ । ‘अध्यक्ष प्रचण्डको प्रतिवेदनमा आएका आरोपको स्वभाविक खण्डन हो । यसमा कुनै पनि लाञ्छना लगाउने काम भएको छैन । आफूमाथि लागेका आरोपबारे अध्यक्ष ओलीले प्रतिवेदनमा प्रष्ट रूपमा अर्थ्याउनुभएको छ,’ प्रधानमन्त्रीका प्रेस सल्लाहका सूर्य थापाले भने ।

२८ कात्तिकमा अध्यक्ष प्रचण्डले नेकपा सचिवालय बैठकमा प्रतिवेदन पेश गरेपछि त्यसको प्रत्युत्तर ओलीले शनिबार दिएका हुन् । यी दुवै प्रतिवेदनमा नेताहरूले तीन दिनसम्म छलफल गर्ने भएका छन् । आगामी १६ मंसिरमा बैठकमा समेत प्रतिवेदनमाथि विमर्श हुनेछ । त्यसपछि १८ मंसिरका लागि तय भएको स्थायी कमिटी बैठकमा एकीकृत प्रस्ताव प्रस्तुत गर्ने जमर्को गर्ने नेताहरूको तयारी छ । त्यसका लागि दोस्रो पुस्ताका नेताहरूले नेतृत्वलाई दबाब दिइरहेका छन् ।