वामदेव, झलनाथ र नारायणकाजीले मागेझैँ संयुक्त प्रतिवेदन आउला ?

A+ A A-

नेपाल कम्युनिस्ट पार्टी (नेकपा)का अध्यक्षद्वय केपी शर्मा ओली र पुष्प कमल दाहाल प्रचण्डले १८ मंसिरमा बस्ने स्थायी कमिटीमा बैठकमा संयुक्त प्रतिवेदन पेस गर्ने तयारी गरेका छन् । दुवै अध्यक्षका प्रतिवेदनबाट सकरात्मक बुँदा समेट्दै संयुक्त प्रस्ताव पेस हुने सम्भावना रहेको सचिवालय सदस्यहरूले बताएका छन् ।

वरिष्ठ नेता झलनाथ खनालले दुवै अध्यक्षको प्रतिवेदनलाई दस्तावेजनको रूपमा संरक्षण गर्दै एकीकृत प्रस्ताव कमिटीमा लैजाने तयारी भएको बताए । ‘दुवै अध्यक्षको प्रतिवेदन पार्टीको दस्तावेजका रूपमा संरक्षण हुनेछ र दुवैको भाव समेटेर संयुक्त प्रस्तावसमेत तयार हुनेछ,’ सचिवालय सदस्य खनालले भने ।

यस्तै, सचिवालय सदस्य तथा पार्टीका प्रवक्ता नारायणकाजी श्रेष्ठले समेत यसको सम्भावना औँल्याएका छन् । हालको प्रतिवेदन तीन दिनसम्म अध्ययन हुने र १६ मंसिरमा बस्ने सचिवालय बैठकमा दुवै प्रस्तावबारे छलफल गर्ने जानकारी दिए ।

आवश्यक परेमा १७ मंसिरमा समेत सचिवालयको बैठक राखेर प्रस्तावबारे छलफल हुने उनले बताए । 'दुइटा प्रस्तावमा अध्ययन छलफल हुनेछ र स्थायी कमिटीको बैठकमा व्यवस्थित र विधिसम्मतले ढंगले प्रतिवेदन पेश हुनेछ,’ श्रेष्ठले भने ।

शनिबारको सचिवाल बैठकमा उपाध्यक्ष वामदेव गौतमले समेत संयुक्त प्रस्ताव ल्याउन माग गरेका छन् । ‘पार्टी एकतालाई संकटमा नपार्नका निम्ति संयुक्त प्रतिवेदनको आवश्यक छ, छुट्टाछुट्टै प्रतिवेदनलाई एकीकृत गरेर प्रतिवेदन तयार गरौँ,’ गौतमले बैठकमा सुझाव दिएका थिए ।

नेकपाभित्र दोस्रो तहका नेताहरूले समेत संयुक्त प्रस्ताव ल्याउनुपर्ने मत राख्दै आएका छन् । पार्टी कमिटीको बैठकमा छुट्टाछुट्टै प्रस्ताव पेस गर्न नदिने दोस्रो तहका नेताहरूको तयारी छ । माधव नेपाल पक्षधरबाट घनश्याम भुसाल, ओली पक्षधरका शंकर पोखरेल र प्रचण्ड पक्षधरबाट जनार्दन शर्माले संयुक्त प्रस्ताव पेसका लागि दबाब सिर्जना गर्न अन्य सदस्यहरूलाई समेत आग्रह गरिरहेका छन् ।

शनिबार चितवनमा भएको एक कार्यक्रमलाई सम्बोधन गर्दै कृषिमन्त्रीसमेत रहेका स्थायी कमिटी सदस्य भुसालले पार्टीको एकतालाई बचाउनका लागि संयुक्त प्रतिवेदन आवश्यक रहेको औँल्याएका थिए । ‘पार्टीलाई दुर्घटनाबाट बचाउने अभिभारा दोस्रो पुस्तामा समेत आइपरेको छ । त्यसका लागि सकारात्मक पहल हामीले लिनुपर्छ,’ उनले भनेका थिए ।

स्थायी कमिटी सदस्य पोखरेलले फेसबुकमा स्टाटस लेख्दै संयुक्त प्रस्ताव आउनुपर्ने धारणा व्यक्त गरेका थिए । ‘म फेरि पनि भन्छु, पार्टी एकताको रक्षाका लागि दुवै प्रतिवेदनलाई स्थगित गरी एकीकृत प्रतिवेदन बनाउने दिशामा सचिवालयको बैठक अग्रसर होस्,’ उनले लेखेका छन् ।

यस्तै, नेता शर्माले पार्टीलाई बचाउनका निम्ति संयुक्त प्रस्ताव आवश्यक रहेको आशयको ट्वीट गरेका छन् । त्यसका लागि नेताहरूले दायित्ववोध गर्नुपर्ने उनको ट्वीटमा उल्लेख छ । ‘आफू हारेर पार्टीलाई बचाएर भन म नेता हुँ त्यसो भए विधिले जित्ने छ, यसपटक विधिले जित्यो भने राष्ट्र, वर्ग र जनताको जीत हुनेछ अन्यथा…,’ उनले ट्विटमा भनेका छन् ।

दुवै प्रतिवेदनमा अबको तीन दिनसम्म नेताहरूले छलफल गर्नेछन् । त्यसपछि १६ मंसिरको सचिवालय बैठकमा समेत विस्तृत छलफल हुनेछ । १८ मंसिरको स्थायी कमिटी बैठकमा प्रतिवेदन पेस होला वा नहोला सहजै भन्न सक्ने अवस्था छैन ।

प्रकाशित मिति: शनिबार, मंसिर १३, २०७७ १७:४०