वीरगञ्ज भन्सारमा थन्किएका १ सय १९ युनिट गाडी लिन किन जाँदैनन् आयातकर्ता ?

Capture.PNG

A+ A A-

वीरगञ्जको सिर्सिया सुख्खा बन्दरगाह भन्सार कार्यालयमा नेपाली अटो व्यवसायीको १ सय १९ युनिटभन्दा बढी बिजुली गाडी थाेत्रिने अवस्थामा पुगेका छन् । तत्कालीन अर्थमन्त्री युवराज खतिवडाले बिजुली गाडीमा लाग्ने कर र अन्तःशुल्क बढाएसँगै भन्सारमा थन्किएका अधिकांश गाडी व्यवसायीले छुटाउन नसकेका हुन् ।

नेपाली गाडी आयातकर्ताले आर्थिक वर्षको बजेट पूर्व नै करिब ७ सय युनिट गाडी आयात गरेका थिए । तर, बजेटमा बिजुली गाडीमा लाग्दै आएको १० प्रतिशत अन्तःशुल्क बढेर ८० प्रतिशतसम्म पुगेपछि आयातकर्ताले ५ सय गाडी फर्काएका थिए ।

नेपाल आइसकेका २ सय बिजुली गाडी भने फर्काउन नमिलेपछि आयातकर्ताहरूले भन्सारबाट छुटाउन सकेका थिएनन् । कात्तिकसम्ममा आयातकर्ताले ८१ युनिट गाडी अन्तःशुल्क तिरेरै बजारमा ल्याएका छन् भने बाँकी १ सय १९ युनिट गाडी लिन भने आयातकर्ता अझै भन्सार कार्यालय पुगेका छैनन् ।

आयातकर्ता गाडी लिन नआएपछि ती गाडी कवाडी हुने अवस्थामा पुगेको वीरगञ्जको सिर्सिया सुख्खा बन्दरगाह भन्सार कार्यालयका सूचना अधिकृत जगदीश पुर्वेले जानकारी दिए । उनका अनुसार आयातकर्ताले गाडी नलैजाँदा व्यवस्थापनमा समेत समस्या भएकाे छ ।

आयातकर्तालाई सूचना पठाए पनि लिन नआएको उनकाे भनाइ छ ।

यसकारण आयातकर्ता लिन जाँदैनन् आफ्नै गाडी

बिजुली गाडीमा सरकारले करमा सहुलियत दिएसँगै धमाधम नेपाल आयात गरेका आयातकर्ताहरू सरकारले कर बढाएपछि अलमलमा परेका थिए । १ सय ५० प्रतिशत कर लामो समय व्यवसायीले लबिङ गरी घटाए पनि भन्सार छुटाएर गाडी ल्याउन भने सकेका छैनन् ।

अर्थमन्त्री विष्णु पौडेलले बिजुली गाडीको अन्तःशुल्क घटाए पनि भन्सार शुल्क यथावत् रहँदा व्यवसायीहरू गाडी बुझ्न भन्सार कार्यालय नगएका हुन् ।

नाडा अटोमोबाइल्स एसोसिएसनका विद्युतीय सवारी समितिका सभापति ध्रुव थापा भन्सार छुटाए पनि ती गाडी ग्राहकलाई महँगो मूल्यमा बेच्नुपर्दा बिक्री नहुने भएकाले व्यवसायीले भन्सारमै छाेडेका बताउँछन् ।

‘हामीले सहुलियत छ भनेर गाडी आयात गर्‍याैं सरकारले अन्तःशुल्क बढाएपछि मूल्य पनि बढ्यो । अहिले आएर सरकारले झारा टार्ने गरी अन्तःशुल्क घटाए पनि ८० प्रतिशतको भन्सार दर कायमै छ', उनले भने, ‘अब १ सय २० प्रतिशत कर तिरेर ल्याएर के गर्ने ? ग्राहक महँगोमा किन्न आउँदैनन् अनि व्यवसायीले घाटा खाएर थोरैमा बेच्न सक्दैनन् ।’

व्यवसायीले मगाएका ७ सय गाडीमा ५ सय गाडी फिर्ता पठाए पनि नेपाल भित्रिसकेका गाडी फिर्ता पठाउन मिल्दैन, जसले गर्दा व्यवसायी भन्सार तिरेर गाडी ल्याउनु भन्दा छोड्नु नै बेस ठान्छन् ।

अहिले भन्सार कार्यालयमा आउडी इभि ब्राण्डका ३ वटा ,टेस्ला इभि ३ वटा,फुच्चे इ भि ३, प्लेयर चाइनिज इभि १० वटा, जागुअर २ वटा, बिवाइडी इभी ५ वटा, किया निरो ३९ वटालगायत विभिन्न ब्राण्डका १ सय १९ वटा बिजुली गाडी वीरगञ्जको सिर्सिया बन्दरगाहमा थाेत्रिने अवस्थामा पुगेका छन् ।

आयातकर्ता बेपत्ता भएपछि दुईवटा टेस्ला कार वीरगञ्ज भन्सारमै थन्किए

विद्युतीय गाडीमा अन्तःशुल्क घटाएपनि अटोव्यवसायीको असन्तुष्टि कायमै

खतिवडाले बढाएकाे बिजुलीगाडी कर ओलीले घटाउलान् ?

प्रकाशित मिति: शुक्रबार, मंसिर १२, २०७७ १८:१६