सरकार सेवा नदिने, कुरियरमा डिएचएलले मनपरी शुल्क असुल्ने

A+ A A-

कुरियरको लागि परिचित अन्तर्राष्ट्रिय नाम हाे, डिएचएल । नेपालस्थित मुख्यालय सिनामंगलमा दिनहुँ भीड बढ्दो छ । महामारीका बेला प्रतिस्पर्धीले काम गरेका छैनन् । सरकारले नै काम रोकिदिएपछि डिएचएललाई लाभैलाभ ।

सेवाग्राही प्रत्यक्ष डिएचएल पुगेर पनि आफ्नो सामान पठाउँछन् नै । एयरलाइन्स कम्पनीहरु पनि डिएचएलको विकल्प छैन । डिएचललको विकल्प नभएर बजारमा एकाधिकार कायम गरिएपछि सेवा शुल्क अत्याधिक वृद्धि भएको छ ।

गत वर्षको भन्दा कतिपय देशमा शत प्रतिशतसम्म शेवा शुल्क बढाइएको छ । लकडाउन र कोरोना महामारीको राम्रो लाभ डिएचएलले उठाएको छ ।

'गत वर्ष मैले डकुमेन्ट पठाउँदा जम्मा २२ सय रुपैयाँ लागेको थियो । अहिले ४२ सय रहेछ, अन्तबाट पठाउन खोजेको, सबैले सेवा बन्द गरेका रहेछन्' डिएचएल बाहिर भेटिएकी ममता भण्डारीले भनिन् ।

डिएचएलमार्फत कुरियर गर्दै आएको ट्राभल एजेन्सीहरूले मनलाग्दी शुल्क बढाएको गुनासो गरेका छन् । '१ तारिखदेखि ४५ प्रतिशतसम्म मूल्य बढेर आएको छ, बढी महंगो हुने भनेर हामीले नाफा घटाएर सेवा दिएका छौँ' मनकामना टेलि कम्युनिकेसनका कृष्ण न्यौपानले भने ।

उनले अन्य कुरियर संस्थाहरुले काम नगरेको कारण मूल्य बढेको बताएका छन् । ८ महिनाअघि १७ सय रुपैयाँमा क्यानडाको लागि एक डकुमेन्ट पठाउन सकिनेमा अहिले न्युनत्तम ४८ सय रुपैयाँसम्म परेको उनी बताउँछन् ।

डिएचएलले भने मूल्य नबढाएको दाबी गरेको छ । उसले विगतमा डिस्काउन्ट गर्ने गरेकाेमा अहिले नगरेकाले महंगो भनिएको उसले जनाएको छ ।

डिएचलको शुल्क वृद्धिमा सरकारको तर्फबाट पनि सहयोग पुगेको देखिएको छ । कुरियरको जस्तै सेवा दिने हुलाक सेवा विभागले कोरोना महामारीको कारण देखाउदै सेवा बन्द गरेको छ ।

उसले आफूले हुलाक बस्तुहरू ढुवानी गर्न थाइ एयरलाइन्ससँग सम्झौता गरेको र थाइ एयरलाइन्सले सेवा नदिएको भन्दै बन्द गर्नु परेको जनाएको छ ।

अन्तर्राष्ट्रिय उडानहरू खुला हुँदा पनि सरकारले एकातिर आफ्नो सेवा सूचारू नगर्ने र अर्काेतिर मनपरी सेवा शुल्क लिदासमेत अनदेखा गर्दा सेवाग्राही भने मर्कामा परेका छन् ।

प्रकाशित मिति: बुधबार, कात्तिक २६, २०७७ १८:१७