उपप्राध्यापकमाथि आक्रमण गर्ने अझै पक्राउ परेनन्

A+ A A-

त्रिभुवन विश्वविद्यालय (त्रिवि) केन्द्रीय क्याम्पस कीर्तिपुरका उपप्राध्यापक प्रेमबहादुर चलाउनेमाथि कुटपिट गर्ने समूह अझै पक्राउ परेका छैनन् । कुटपिट भएको पाँच दिन बित्दा पनि प्रहरीले अभियुक्तलाई पक्राउ गर्न नसकेकाे हाे । चलाउनेमाथि २० असोजमा त्रिविपरिसरभित्रकै नेपाल बैंकअगाडि पैसा साट्न निस्केका बेला आक्रमण भएको थियो ।

कुटपिटमा परी गम्भीर घाइते भएका चलाउनेको हाल ललितपुरकाे नख्खुस्थित मेडिसिटी अस्पतालमा उपचार भइरहेको छ । उनको दाँहिने खुट्टा भाँचिएको छ भने शरीरभरि निलडाम छ । चलाउनेले आफूमाथि नेपाली कांग्रेसको भ्रातृ संगठन नेविसंघका नेता/कार्यकर्ताले आक्रमण गरेको आरोप लगाएका छन् ।

नेविसंघको एक समूहले ५२ दिनदेखि त्रिविको समाजशास्त्र विभागमा लगाएको ताला क्याम्पस प्रशासनले अदालतको स्टे अर्डर आएपछि १४ असोजमा खोलेको थियो । सोही ताला खोलेको विषयमा नेविसंघ र प्राध्यापकबीच १४ गतेपछि विवाद हुँदै आएको थियो । त्यही कारण आफूमाथि आक्रमण गरिएको चलाउनेको दाबी छ ।

यो पनि...

विश्वविद्यालयमा ‘डन’ बनेका विद्यार्थी नेता

नेपाली कांग्रेसका नेता कृष्णप्रसाद सिटौलानिकट नेविसंघका त्रिवि समिति सचिव योगेन्द्र रावल र हरि आचार्य समूहले समाजशास्त्र विभागमा ताला लगाएका थिए । उनीहरूले नै चलाउनेमाथि आक्रमण गरेको अनुमान प्रहरीको छ । चलाउनेले रावल र आचार्यविरुद्ध किटानी जाहेरीसमेत दिइसकेका छन् ।

त्रिविमा नेविसंघका चारवटा छुट्टाछुट्टै समिति छन् । पार्टी सभापति शेरबाहदुर देउवा, रामचन्द्र पौडेल, शशांक कोइराला र कृष्णप्रसाद सिटौला निकट विद्यार्थीका आ-आफ्नै समिति छन् । रावल र आचार्यमाथि उजुरी आएको काठमाडौं प्रहरी प्रमुख एसएसपी श्यामलाल ज्ञवालीले पुष्टि गरे ।

‘रावल र आचार्यविरुद्ध जाहेरी आएको छ । कसले र किन आक्रमण गर्‍याे ? पक्राउपछि खुल्छ, उनीहरू सम्पर्कमा छैनन्, हामीले उनीहरूबाहेक अन्यको पनि जोखी गरेका छौँ,’ एसएसपी ज्ञवालीले भने । उपप्राध्यापक चलाउनेलाई आक्रमण गर्नेमाथि ज्यान मार्ने उद्योगमा मुद्दा चलाइने ज्ञवालीको भनाइ छ ।

आचार्य समूहले त्रिविमा नेपाल कम्युनिस्ट पार्टी (नेकपा)का कार्यकर्ता भर्ती गरेको, कोरोनाका कारण बन्द भएको पठनपाठन सञ्चानल गर्नुपर्ने र स्थगित परीक्षाबारे निकास निकाल्नुपर्ने भन्दै तालाबन्दी गरेका थिए । तालाबन्दीपछि उनीहरूले विश्वविद्यालयकाे उपकुलपति कार्यालयअगाडि प्रदर्शनसमेत गरेका थिए । प्रदर्शनमा उत्रिएका योगेन्द्र रावल, दीपक ओझा, रुपेश शाह पक्राउ परेका थिए ।

नेविसंघले भने उपप्राध्यापक चलाउनेमाथि भएको कुटपिटको घटनामा आफ्नो संलग्नता नरहेको दाबी गरेको छ । नेविसंघका अध्यक्ष राजीव ढुंगानाले शुक्रबार विज्ञप्ति जारी गर्दै चलाउने कुटपिट घटनामा नेविसंघको कुनै संलग्नता नरहेको र षड्यन्त्रपूर्वक ढंगबाट बदनाम गराउन खोजिएको आरोप लगाएका छन् ।

‘त्रिवि पदाधिकारीको निर्देशनमा त्रिविपरिसरमै उपप्राध्यापक प्रेमबहादुर चलाउनेमाथि भएको हमला त्रिवि पदाधिकारीको निर्देशनमा नेविसंघलाई बदनाम गराउन रचिएको एउटा षड्यन्त्र मात्र हो । घाइते चलाउनेको शीघ्र स्थास्थ्य लाभको कामना गर्दै उचित उपचारको व्यवस्था मिलाउन अनुरोध गर्दछाैँ,’ विज्ञप्तिमा भनिएको छ ।

चलाउनेले जाहेरी दिएका रावल र आचार्यसँग सम्पर्क गर्न खोज्दा भने उनीहरू दुवै जनाको मोबाइल अफ छ । नेविसंघका एक सदस्यले भने उनीहरू कोरोना पोजिटिभपछि काठमाडौंकै एक अस्पतालको आइसोलेसनमा बसेका कारण नम्बर अफ भएको बताए ।

यो पनि पढ्नुहोस्

दलीय आडमा आपराधिक थलो बन्दै त्रिवि : विद्यार्थीका नाममा जसले जे गरे पनि छुट ?

घटनाको दिनभन्दा अघि नै उनीहरूमा कोरोना पोजिटिभ देखिएको ती सदस्यले बताए । ‘रावल र आचार्य होइन, चलाउने आक्रमणमा रुपेश साहको संलग्नताजस्तो मैले सुनेको छु । उनी सिरहाका भएको र आक्रमणकै दिन तराई हुँदै भारत पुगेको मेरो अनुमान छ,’ शशांक कोइरालानिकट ती विद्यार्थी नेताले भने ।

देउवानिकट अर्का एक विद्यार्थी नेता पनि चलाउनेमाथि आक्रमणमा रूपेशकै संलग्नता रहेको आफूले सुनेकोे बताँछन् । रावल र आचार्य नेपाली कांग्रेसकै उच्च तहका नेताको संरक्षणमा लुकेको प्रहरीको अनुमान छ ।

आक्रमणमा प्रयोग भएको मोटरसाइकल नियन्त्रणमा

चलाउनेमाथि आक्रमण गर्ने समूह पक्राउ नपरे पनि आक्रमणमा प्रयोग भएको बुलेट मोटरसाइकल भने प्रहरीले नियन्त्रणमा लिएको छ ।

बा८१प२७८५ नम्बरको उक्त मोटरसाइकल काठमाडौं महानगरपालिका- ३५ का मानस कोइरालाको नाममा निकालिएको र पछि उनले पनि बिक्री गरेर पढाइका लागि एक वर्षअघि लण्डन गएको खुलेको प्रहरीको भनाइ छ ।

उक्त मोटरसाइकल प्रहरीले कीर्तिपुरबाट बरामद गरेको थियो । यसअघि उक्त मोटरसाइकल अनुराधा कोइरालाका छोरा मनीष कोइरालाको भएको भन्दै समाचार आएकाे थियाे । तर, शिलापत्रलाई प्राप्त यातायातकाे दर्ता फाइलमा उक्त मोटरसाइकल मनीष कोइरालाको नभएको खुलेको छ ।

काठमाडौं प्रहरीले पनि चलाउनेमाथि आक्रमणको मुद्दामा प्रहरीको खोजीमा मनीष कोइराला नभएको जनाएको छ । पछिल्लो समय बा८१प २६८५ नम्बरको मोटरसाइकल कसले चलाउँदै आएको थियो भन्ने खुलिसकेको र आक्रमणकारी पक्राउ परेरै छाड्ने एसएसपी ज्ञवालीको भनाइ छ ।

विभिन्न राजनीतिक दलका भ्रातृ संगठनका नेता/कार्यकर्ताको नाममा यसअघि पनि विभिन्न क्याम्पस प्रमुखलाई कालो माेसो दल्नेदेखि भौतिक आक्रमण हुँदै आएका छन् ।

प्रकाशित मिति: आइतबार, असोज २५, २०७७ १५:५१