दलीय आडमा आपराधिक थलो बन्दै त्रिवि : विद्यार्थीका नाममा जसले जे गरे पनि छुट ?

दिनेश गौतम काठमाडौं,

A+ A A-

समाजशास्त्र केन्द्रीय विभागका उपप्राध्यापक प्रेमबहादुर चलाउनेले कहिल्यै पनि सोचेका थिएनन् ज्ञान उत्पादन गर्ने थलोमा आफैँमाथि आक्रमण हुन्छ । मंगलबार उनले जे सोचेका थिएनन्, त्यही भयो ।

त्रिभुवन विश्वविद्यालयकै प्राङ्गणमा एउटा अपराधिक समूहको निशानामा उनी परे । रड आक्रमणबाट उपप्राध्यापक चलाउनेको टाउको र खुट्टामा गहिरो चोट लाग्यो । तत्काल प्राध्यापक र प्रहरीले उनलाई मेडिसिटी अस्पताल पुर्‍याए । धन्न उनको ज्यान त जोगियो । तर शरीरमा भएको चोट निको हुने नहुने अन्योल छ ।

बुधबार उपप्राध्यापक चलाउनेलाई पछ्याउँदै हामी मेडिसिटी अस्पतालमा पुग्यौँ । मेडिसिटी अस्पतालको साताैँ तल्लाको बेड नम्बर ७१३ मा उनलाई राखिएको रहेछ । तर उनलाई राखिएको बेडमा पुग्दा खाली थियो । ढोका बन्द, कोठा सुनसान ।

फ्रन्टमा रहेकी एक नर्सलाई सोध्यौँ, ‘यहाँ राखिएको सर डिस्चार्ज हुनुभएको हो ?’

‘होइन नि ! उहाँलाई त अप्रेसन थिएटरमा लगिएको छ । तुरुन्तै अप्रेसन गर्नुपर्ने भयो । ३ नम्बरमा जानुहोस् न !’

त्यसपछि हामी अस्पतालको तेस्रो तल्लामा पुग्यौँ । त्यहाँ पनि सुनसान थियो । एक/दुई जना मान्छे थिए ती सबै अञ्जान । त्यहीँ रहेका एक जना दाइलाई सोध्यौँ, ‘तपाईं प्रेम सरको आफन्त हो ?’ उनी प्रेम सरको भान्जा रहेछन् ।

‘कस्तो छ सरलाई ?’

'अप्रेसनका लागि लगिएको छ । टाउकोमा, खुट्टामा, कोखामा गहिरो चोट छ । शरीरको धेरै भागमा घाउ छ । अहिले खुट्टाको अप्रेसनका लागि ल्याएको । होसमा त हुनुहुन्छ तर बोल्न सक्नु हुन्न । अप्रेसनपछि के हुने हो थाहा छैन,’ उनले भने ।

‘अप्रेसन थिएटरको अगाडि रहेका चलाउनेका भान्जाको आँखा घरि भित्र जान्छन् । भित्र जान मिल्दैन । मामा एक्लै हुनुहुन्छ । अरु कोही हुनु हुन्न,’ उनी आत्तिन्छन् ।

अस्पतालका कर्मचारीको भित्रबाट आवाज आयो, ‘आवश्यक परे बोलाउनुहुन्छ । यहाँ एक जनाभन्दा बढी बस्न मिल्दैन । अरु तल जानुहोस् ।’

उपप्राध्यपक चलाउनेको अप्रेसनको समय डेढ घण्टा लाग्ने लेखिएको रहेछ । यहीँबाट प्रष्ट भयो उपप्राध्यापक चलाउने गम्भीर घाइते भएको । त्यसपछि हामी अस्पतालबाट फर्कियौँ ।

दोषीलाई कारबाही माग

त्रिभुवन विश्वविद्यालय समाजशास्त्र केन्द्रीय विभागले उपप्राध्यपक चलाउनेमाथि आक्रमण गर्नेलाई कारबाही गर्न माग गरेको छ । विभागका प्रमुख डा. युवराज लुइँटेलले विज्ञप्ति निकालेर दोषीलाई कारबाही गर्न माग गरेका हुन् ।

कसले आक्रमण गर्‍यो त ?

उपप्राध्यापक चलाउनेलाई कसले आक्रमण गर्‍यो भन्ने पत्ता लागेको छैन । यद्यपि विभागमा नेपाली कांग्रेस निकटका विद्यार्थीले केही समयअगाडिदेखि तालाबन्दी र आन्दोलन गरेकाले उनीहरूले आक्रमण गरेको त होइन भन्ने शंका उब्जिएको छ । उक्त समूहले शिक्षकहरूलाई मार्ने धम्कीसमेत दिएको प्राध्यापकहरू नै बताउँछन् । प्रहरीमा किटानी जाहेरी परेको एक प्राध्यापकले बताए । ‘प्रहरीमा जाहेरी परेको छ । केन्द्रीय विभागले पनि प्रहरीलाई कारबाहीका लागि अनुरोध गरेको छ,’ ती प्राध्यापकले भने ।

प्रहरीले घटनामाथि सूक्ष्म रूपमा अनुसन्धान भइरहेको बताएको छ । ‘घटनाबारे अनुसन्धान भइरहेको छ । आक्रमण गर्नेहरूको नजिक पुगेका छौँ,’ महानगरीय प्रहरी परिसर काठमाडौंका प्रवक्ता सोमेन्द्रसिंह राठौरले भने, ‘हामी छिट्टै दोषीलाई पक्राउ गरी कानुनी कारबाही गर्छौं ।’

प्राध्यापकमाथि आक्रमण हुनु संवेदनशील विषय भएको त्रिविका पदाधिकारी बताउँछन् । ‘उपप्राध्यापकमाथि आक्रमण हुनु संवेदनशील विषय हो,’ शिक्षाध्यक्ष शिवलाल भुसालले भने, ‘विश्वविद्यालय ज्ञानको थलो हो । यो घटनालाई हामीले गम्भीर रुपमा लिएका छौँ । प्रहरीले अनुसन्धान गरिरहेको छ । दोषीलाई कारबाही हुनुपर्छ ।’

विद्यार्थीले जे गरे पनि छुट ?

त्रिविमा राजनीति हाबी भएकाले पछिल्लो समय आपराधिक गतिविधि बढेको शिक्षाविद्हरू बताउँछन् ।त्रिविका पूर्वउपकुलपति केदारभक्त माथेमाले विद्यार्थीले जे गरे पनि छुट दिने गरेकाले आपराधिक गतिविधि बढेको बतए ।

‘उपकुलपति, प्राध्यापक मन नपरे प्रजातन्त्रमा छलफल गर्ने हो । कालो मसो दल्ने, रड आक्रमण गर्ने, यो त भएन । विद्यार्थीले जे गरे पनि छुट दिने चलनले बिग्रिएको हो,’ उनले भने, ‘यो सबै राजनीतिक पार्टीमा जोडिन्छ । अपराध गरे पनि पार्टी नै जोगाउन लाग्छ । विद्यार्थीले कुर्सी फुटाउने आगजानी गर्ने गर्छन् । यो सरकारी सम्पत्ति हो । सरकारी सम्पत्ति नाश गर्नेलाई अहिलेसम्म कारबाही भएको छ ? दण्ड नदिएकाले बिग्रिएको हो ।’

जोसुकै भए पनि कारबाही नगरेसम्म अपराध नरोकिने उनले बताए । ‘दोषी जो भए पनि कारबाही हुनुपर्‍यो । दण्डहीनताको अन्त्य नभई हुँदैन,’ उनले भने ।

प्रकाशित मिति: बुधबार, असोज २१, २०७७ २३:५१

दिनेश गौतम

प्रतिक्रिया दिनुहोस्