नेपालगन्जमा खेल, रुपैडियाको व्यापार

A+ A A-

नेपालगन्जबाट भारतको सिमाना तीन किलोमिटर मात्र टाढा छ । आठौं राष्ट्रिय खेलकुद प्रतियोगिताको चिनो लैजाने भन्दै दर्शक तथा खेलाडीको सपिङ स्थल बनेको छ, भारतीय बजार रुपैडिया ।

नेपालगन्जमा बृहत्तर खेलकुद भइरहँदा रुपैडिया बजारको व्यापार बढेको छ । सधैं भीडभाड हुने रुपैडियामा अहिले झ्न भीड थपिएको छ ।
‘सस्तो हुन्छ भनेर हामीले उताबाट केही सामान किन्यौं,’ एक खेलाडीले भने ।

दर्शक तथा खेलाडी सबैजसोको हातमा रुपैडियामा खरिद गरिएका लत्ताकपडा र इलेक्ट्रोनिक सामानको थैलो देखिन्थ्यो ।

बेखबर स्थानीय

आठौं राष्ट्रिय खेलकुद प्रतियोगिताले नेपालगन्जको रौनक फेरिदिएको छ । प्रतियोगितामा समावेश २५ वटामध्ये १७ वटा खेल नेपालगन्जमा भइरहेको छ ।

वीरेन्द्र, धम्बोजी, त्रिभुवन, बीपी चोकलगायतका व्यापारिक केन्द्रमा खेलाडी तथा खेलकर्मीको भीडभाड देखेर स्थानीय उत्साहित छन् । तर, स्थानीय भने बेखबरजस्तो देखिएका छन् ।

‘नेपालको सर्वाधिक गर्मी हुने सहरमध्ये नेपालगन्जमा चर्काे घाममा खेलाडीको लर्काे लागेको हेर्दा हामीमा उत्साह बढेको छ,’ स्थानीय भुपेन्द्र साह भन्छन्, ‘आठौं खेलकुद हुने भनेर सुनेको थिए तर यस्तो हुन्छ भन्ने लागेको थिएन ।’

आठौं राष्ट्रिय खेलकुद प्रतियोगिताले सबै धर्म, जातिबीच आत्मीयता सिर्जना गर्न सफल भएको राष्ट्रिय खेलकुद प्रतियोगिताका सदस्य सचिव केशवकुमार विष्ट बताउँछन् । उद्घाटन समारोहमा हिन्दु, मुसलमान, सिक, बौद्धलगायतका धर्म, संस्कृति झल्काउने झाँकी प्रस्तुत गरिएको थियो ।

‘आठौं खेलकुद नेपालगन्जमा गराउन मैले गरेको पहल सार्थक भएको महसुस भएको छ,’ ओलम्पियन सुरेन्द्र हमाल बताउँछन् ।

‘मैले पनि नगर भवनमा गएर भारोत्तोलन खेल हेरें । अटोरिक्सा चढ्नेहरूले बताएपछि । तर, खेलकुदमा रुचि राख्ने मेरा बालबालिकालाई समेत यहाँ विभिन्न खेल भइरहेको छ, जानुपर्छ भन्ने थाहा नै छैन,’ अटो रिक्सा चालक बुद्धिराम थारूले भने ।

प्रकाशित मिति: शनिबार, वैशाख ७, २०७६ ०१:४५