कस्ताे होला ५ अर्बभन्दा बढीको कारोबार हुने अटो व्यवसायीको दसैँ ?

A+ A A-

दसैँ नजिकिँदै छ । सोह्रश्राद्ध लागेसँगै नेपालका अटो व्यवसायीहरूलाई भ्याईनभ्याई हुने गर्थ्यो सवारीसाधन बेच्न । यता ग्राहकहरू पनि वर्ष दिनदेखि दसैँलाई नै पर्खिइरहेका हुन्थे गाडी किन्न । बैंकहरू पनि दसैँ लागेसँगै विभिन्न स्किम दिँदै गाडी खरिदकर्ताका लागि आकर्षक कर्जा उपलब्ध गराउन तम्तयार बस्ने गर्दथे ।

यो समयमा अटो व्यवसायीहरूको दसैँ मानिदैै आएको नाडा अटो शाे धमाधम सञ्चालन भइरहेको हुन्थ्यो । तर यस वर्षको माहाैल फरक रह्यो । कोरोना संक्रमणको जोखिम दिन प्रतिदिन बढ्दैै जाँदा अटो व्यवसाय मात्र नभएर लगभग सबै क्षेत्र ठप्प अवस्थामै पुगेका छन् ।

संक्रमण हुनुभन्दा केही समयअगाडिदेखि नै शून्य बिक्रीमा रहेका चारपाङ्ग्रे अटो व्यवसायी ५ महिना बितिसक्दा पनि रित्तो हात बस्नुपरेको छ । दसैँ आऊला र गाडी बिक्री गरूँला भन्दै बसेका व्यवसायी यो दसैँको अवसरमा न त नाडा अटो शो भयो, न गाडी बिक्रीको माहौल नै तातियो ।

गत वर्ष ५ अर्ब रुपैयाँभन्दा बढीका सवारीसाधन बिक्री गरेका व्यवसायीहरूको यो वर्षको कारोबार भने १ अर्ब पनि ननाघ्ने देखिन्छ ।

१५ देखि २० दिनको समयमा २५ देखि ३० प्रतिशतले बढी व्यापार गर्ने व्यवसायीहरू वर्षदिनको नाफा उठाउने रूपमा यो समयलाई लिने गर्दछन् । तर यस वर्ष न व्यवसायीमा रौनक छायो, न त ग्राहकमा नै ।
अटो व्यवसायीहरूको छाता संगठन नाडा एसाेसिएसन अफ नेपाल पनि वैकल्पिक उपायको प्रयोेग गर्न असम्भव भन्दै बसेको छ ।

नाडाका सचिव अनुपकुमार बरालले भर्चुअल माध्यमबाट मेला आयोजना गरेर व्यवसायीलाई राहत दिने सोचे पनि सो कुरा असम्भव रहेको बताउँछन् । आफैँ व्यवसायी रहेका बराल भन्छन्, ‘हामीले भर्चुअल कसरी गर्ने भनेर पनि अध्ययन गर्याैं । हामी नेपाली प्रविधिमैत्री नभइसकेको अवस्थामा भर्चुअलमा लगानी गर्नु भनेको थप संकटमा पर्नु हो । कुनै सम्भावना नदेखेपछि चुपचाप बस्नुपरेको छ ।’

यो पनि पढ्नुहोस्

दुईपाङ्ग्रे सवारी बिक्रीमा इतिहास ब्रेक, चारपाङ्ग्रेको बिक्री शून्य

सचिव बराल दसैँको समयमा व्यवसाय अगाडि बढाउन कुनै योजना नबनाएको बताउँछन् । उनी भन्छन्, ‘हामी बीटुबीभन्दा पनि बीटुसीमा रहेर व्यवसाय गर्दै आएका छौँ । त्यो भएर पनि वैकल्पिक योजना बनाउन सकिएन ।’

संकटपूर्ण अवस्था हटेको ६ महिनासम्म पनि चारपांग्रे सवारीसाधनले लय लिन नसक्ने भन्दै अटोव्यवसायी बराल अटो व्यवसायमा पनि चारपांग्रे व्यवसायी व्यवसायिक माहाैलमा उत्रिन नै ६ महिना देखि वर्षदिन कुर्नुपर्ने बताउँछन् ।

‘एउटा सामान्य गाडी किन्नका लागि पनि ग्राहकले न्यूनतम १० लाख डाउनपेमेन्ट गर्नुपर्छ,’ उनले भने, ‘अर्थतन्त्र ठप्प छ, ग्राहकको आम्दानी छैन । यो अवस्थामा १० लाख डाउनपेमेन्ट गर्ने क्षमता नै हुँदैन नि । त्यसैले अटो व्यवसाय बौरिन लकडाउन खुलेको ६ महिनादेखि १ वर्ष थप लाग्न सक्नेछ । अब यो अवधिमा व्यवसायीको हालत कस्तो होला, तपाईं आफैँ अनुमान लगाउनुस् ।’

यतिबेला प्रमोसनमा मात्रै करोडौँ खर्च गर्ने व्यवसायीहरू व्यवसाय ठप्प भएपछि प्रमोशन खर्च पनि धान्न नसक्ने अवस्थामा पुगको व्यवसायीहरू बताउँछन् । व्यक्तिगत रूपमा केही व्यवसायीले प्रमोसन गरे पनि यस वर्ष खासै प्रतिस्पर्धी रूपमा बजारमा कोही नआउने व्यवसायी बरालको भनाइ छ ।

यो त भयो चारपांग्रे सवारीका व्यवसायीका योजना । तर, दुईपांग्रे सवारी व्यवसायी भने यस वर्ष नयाँ स्किम सार्वजनिक गर्दै प्रचारप्रसारमा जुट्ने तयारीमा छन् ।

सार्वजनिक यातायात ठप्प भएपछिको ५ महिनामा राम्रै व्यापार गरेका मोटरसाइकल तथा स्कुटर व्यवसायीहरूले गाडी व्यवसायीको जस्तो घाटा ब्यहोर्नु परेन । दुईपांग्रे सवारीसाधन बिक्री वितरण गर्दै आएको स्याकार ट्रेडिङ, जगदम्बा मोटर्स, हिरो मोटरकर्प लिमिटेडलगायतका दर्जनभन्दा बढी मोटरसाइल तथ स्कुटर बिक्रेताहरू छुट योजना र प्रचारप्रसारमा जुटिसकेका छन् ।

यो पनि पढ्नुहोस

ह्वात्तै बढ्याे २ पाङ्ग्रेकाे बिक्री, उपत्यकामा सडक जाम झनै बढ्ने चिन्ता

दुईपांग्रे सवारीसाधनको बिक्रीमा कुनै असर नपरेकाले गर्दा दुवै व्यवसायलाई एउटै डालोमा हालेर व्यवसायिक अवस्थाको मूल्यांकन गर्न नहुने व्यवसायीहरूले बताउँदै आएका छन् ।

हात बाँधेर पौडी खेल्न दिने सरकारको नीति

सरकारले संक्रमणको जोखिम भन्दै ५ महिनादेखि व्यापार व्यवसाय ठप्प पारेको छ । तर, पछिल्लो समय बजार खुल्ने नीति लिँदा पनि एक हातले दिएजस्तो गर्ने अनि अर्को हातले लिने गरेको उनले बताए ।

सचिव बरालले भने, ‘सरकारले लकडाउन खुकुलो बनाउने भनिरहँदा हात बाँधेर पौडी खेल्न दिने नीति लिएको छ । वित्तीय अवस्था चलायमान भएन । सडकमा गाडी कुदेनन्, मानिसले हिँड्न पाएनन् भने शाेरूम खोलेर मात्रै के हुन्छ र ? सरकारले उचित व्यवस्था गर्दै वित्तीय स्थिति चलायमान राख्यो भने मात्रै हाम्रो व्यवसाय हुने हो नि ।’

सुरक्षाका उपाय अपनाएर, सामाजिक दूरी कायम गरेर लकडाउन खुला गर्दै आर्थिक गतिविधि चलायमान नगरे व्यवसायी थला पर्ने उनी बताउँछन् ।