लकडाउन खुलेसँगै छिमेकी मुलुकमा फस्टायो अटो बजार, नेपालमा किन सुस्ताउँदै ?

A+ A A-

^{लामो समयको लकडाउन अन्त्यसँगै सबै प्रकारका बजार धमाधम खुले । बजार खुलेसँगै धेरथोर ग्राहक तान्दै आएको बजारले अटो बजारलाई भने सान्त्वनासमेत दिन सकेको छैन ।}

^{लकडाउनको समयमै दुईपाङ्ग्रे सवारीको व्यापार चम्किएको थियो । तर, त्यसको सानो प्रभाव पनि चारपाङ्ग्रे सवारीमा पर्न सकेन । साना सवारीमा ग्राहकको आकर्षण बढ्दा अहिले कार व्यवसाय सुस्ताएकाे छ । विगत ४ महिनादेखि कार व्यवसाय चरम संकटको अवस्थामा गुज्रिरहेकाे छ ।}

^{लकडाउन हुने हल्लासँगै व्यवसायमा मन्दी छाएका कारण अहिलेसम्मै कुनै पनि डिलरबाट काराेबार हुन सकेको छैन । दुईपाङ्ग्रे व्यवसाय लकडाउनकै समयमा चम्किएपछि कार व्यवसायीहरूले पनि विभन्नि स्किम सार्वजनिक गरेका थिए । तर पनि अधिकांश कार बिक्रेता कम्पनीहरूले खासै बिक्री गर्न सकेका छैनन् । चाडपर्वको बेलामा हुने व्यापार यस पटक पनि कोरोनाले गर्दा खस्किने सम्भावना रहेको व्यापारीहरू बताउँछन् ।}

^{ड्याट्सनका लागि नेपाली बिक्रेता कम्पनी पायोनियर मोटर कम्पनी, स्याकार ट्रेडिङ कम्पनी, फोर्डका लागि आधिकारिक बिक्रेता कम्पनी जीओ अटोमोबाइललगायतका कार बिक्रेता डिलरहरूले विगत ४ महिनादेखि कार बेच्न पाएका छैनन् । पायोनियर मोटर्सका अनुसार अहिलेसम्म मुस्किलले ५ प्रतिशत मात्रै कार बिक्री भएको छ । त्यस्तै, फोर्डको पनि अवस्था उस्तै छ । यता सुजुकी ब्राण्डका गाडीको बिक्री अवस्था पनि उस्तै दयनीय छ ।}

^{४ महिना बितिसक्दासमेत गाडी बिक्रीमा कुनै सुधार आउन सकेको छैन । त्यस्तै, फोर्डको आधिकारिक बिक्रेता कम्पनी जीओ अटोमोबाइलका संचालक तथा नाडा अटोमोबाइल्स एसोसिएसन नेपालका उपाध्यक्ष आकाश गोल्छा पनि कोरोनाको त्रास कायमै रहेकाले लकडाउन खुले पनि गाडी किन्न आउने ग्राहकहरूको खडेरी परेको बताउँछन् । उनले भने, ‘पहिले नै बुकिङ भइसकेका गाडीहरू मात्र डेलिभरी भइरहेका छन् । लकडाउन खुलेपछि कुनै बुकिङ भएको छैन । किन्ने सोचले पनि आउने ग्राहक छैनन् ।’}

^{नाडा अटोमोबाइल्स एसोसिएसन नेपालका सचिव अनुप बरालले चारपाङ्ग्रे गाडी बिक्रेताहरू सबैभन्दा मारमा परेको बताउँछन् । सुजुकी ब्राण्डको चारपाङ्ग्रे सवारी बिक्री गर्दै आएका बराल आफूले ४ महिना बितिसक्दासमेत एउटा गाडी पनि बिक्री गर्न नसकेको बताए ।}

^{लकडाउन खुलेको १ हप्ताभन्दा बढी भइसक्दासमेत डिलरमा ग्राहकको नामाेनिशान नदेखिने उनले बताए । त्यसो त महिन्द्रा गाडीको बिक्री पनि शून्य छ । यस्तै, अन्य कम्पनीका गाडीहरूमा पनि खासै सुधार हुन सकेको छैन ।}

^{नेपालमा लकडाउनपश्चात् अत्यावश्यक सामान मात्रै खरिद गर्न ग्राहककाे ध्यान केन्द्रित भएका कारण विलासिताका वस्तु खरिदबिक्रीमा कमी आएको जानकारहरू बताउँछन् ।}

^{छिमेकी मुलुकमा फस्टाउँदै अटो व्यवसाय}

^{भारतमा पनि लामो समयको लकडाउनपश्चात् बजार खुलेसँगै अटो बजारले पुन: गति लिएको छ । भारतमा मात्रै पछिल्लो १ महिनामा ५० प्रतिशतले चारपाङ्ग्रे सवारीसाधन बिक्री भएको छ । जसमा हुण्डाईले ६५ र मारूतीले १८ प्रतिशतले बिक्रीदर बढाएका छन् । त्यसो त कोरोनाको उद्गमस्थल चीनमा पनि लकडाउन सकेसँगै अटो बजारले पुन: बजार लिँदै गएको छ ।}

^{अटो बजारका लागि प्रमुख केन्द्रविन्दु बन्दै आएको चीनमा पनि कार व्यवसायले विस्तारै लय समात्न थालेको छ । विश्व बजारलाई नै कार पार्ट्सहरू निर्यात गर्दै आएको चिनले कोरोना कहरका केही समय बजार ठप्प गर्नुपरे पनि अहिले धमाधम बिक्रीवितरण गरिरहेको छ ।}

^{अघिल्लो वर्षमा ६.९ प्रतिशत रहेको अटो बजारको वृद्धिदर गतवर्ष ४.७ प्रतिशतमा झरेको थियो । कोरोनाका कारण केही समय न्यून भएको अटो बजार पुन: फर्किएको छ । गत ५ महिनामा मात्रै कार ६० प्रतिशतको हाराहारीमा बिक्री भएकोे चाइना अटोमोबाइल उत्पादक सङ्घ (सीएएए)को तथ्याङ्कले देखाएको छ ।}

^{दुई ठूला छिमेकी देशमा कोरोनाका कारण सुस्ताएको अटो बजार खुकुलो हुनासाथ तंग्रिन थालेको हो । तर, नेपालमा भने अवस्था निराशाजनक नै देखिन्छ । दुईपाङ्ग्रेको माग ह्वात्तै बढ्नु र मानिसलाई चारपाङ्ग्रेप्रतिको आकर्षण घट्दै जाँदा लकडाउन खुले पनि विलासिताको कोटामा पर्ने चारपाङ्ग्रे सवारीसाधन कार किन्न मानिसहरू खासै हौसिएका छैनन् ।}

^{अघिल्ला वर्षहरूमा चाडपर्वमा खुसी साट्नकै लागि पनि गाडी खरिद गर्ने र साट्नेहरूको लर्को लाग्ने गरे पनि अहिलेको भयावह स्थितिमा कार किन्नतर्फ मानिसको ध्यान नै नगएको व्यवसायीहरूको बुझाइ छ । अझै केही महिना कोरोनाको त्रास नहटेसम्म कार व्यवसाय सुधारको अवस्थामा नआउने व्यवसायीहरूको आँकलन छ ।}

प्रकाशित मिति: मंगलबार, साउन २०, २०७७ १७:००