चुनाव आउनु कहिलेकहिले, प्रचार गर्नु अहिले !

A+ A A-

कोरोना भाइरसले नछोएको कतै छैन । सर्वत्र सन्त्रास छ । तर, मार्तडी बजारमा चाहिँ रमिता ।

सामुन्नेको कोरोना भाइरस संक्रमणको कुनै मतलब नगरेर राजनीतिक पार्टीहरू दुई वर्षपछि हुने भनिएको चुनावको तयारीमा छन् । बजारमा एक्लैदुक्लै हिँडे पनि 'मास्क किन नलगाएको' भनी हप्काउने प्रहरी प्रशासन कम्युनिस्ट र कांग्रेसका नेता, कार्यकर्तासामु लाचार देखिएको छ ।

लाचार नहाेस् पनि किन ? हुल बाँधेर पार्टी भेला गर्नेहरूलाई तिनका नेता र जनप्रतिनिधिले नै संरक्षण दिएका छन् । स्वास्थ्य संकटको संवेदनशील अवस्था ख्याल नगर्नेहरूमा धार्मिक समूहहरू पनि देखिएका छन् ।

‘सदरमुकाम मार्तडीको देवता पुजाइमा र त्रिवेणी नगरपालिकाको पार्टीको कार्यक्रममा ठूलो उपस्थिति गरेर कार्यक्रम भएछ । तर, बजारमा भने पुलिस मास्क लगाएन भनेर हप्काउँछन्, त्यहा कहाँ गयो प्रशासन ? किन रोकेनन् नेताले कार्यक्रम ?’, स्थानीय देवराज पाध्य प्रश्न गर्छन् ।

यो पनि..

महामारीमा चुनावको झल्को : जनप्रतिनिधिकै संग्लनतामा भव्य कार्यक्रम

मार्तडीका स्थानीय शेरबहादुर शाही लकडाउनको समयमा अन्य ठाउँबाट आएकाहरूले गाउँमा चुनावी आमसभाजस्तै कार्यक्रम गरेकाे बताउँछन् । जनप्रतिनिधिहरू स्वयम्‌ले त्यो कार्यक्रममा भाग लिएकाे उनकाे भनाइ छ ।

'सामाजिक दूरीकाे नियम त ठूला भनाउँदाहरूबाटै उल्लंघन भएकाे छ । तर, स्थानीय प्रशासन भने मुकदर्शक बनेकाे छ । प्रशासनले जवाफ त दिनुपर्छ', शाहीले भने ।

यो पनि..

मन्त्रीज्यू ! खाेइ सामाजिक दूरी ?

स्थानीय लोकबहादुर ऐडी झनै आक्रोशित छन् । पार्टी नेताहरूले महामारीप्रति खेलाँची गरेकाे उनी बताउँछन् । ‘घण्टामा दुई जनाको मृत्यु भइरहेको छ। यहाँ भारतबाट आएका धेरै मान्छे छन् । त्यही बीचमा गाउँमा पार्टीका खुला आमसभा हुँदा कसैमा कोराेना सर्न सक्ने चिन्ता हामीलाई छ', उनले भने, 'कार्यक्रममा आएकामध्ये धेरै त जिल्लाबाहिरकै थिए । चार/पाँच सय मानिस भेला हुँदा पनि प्रहरी रमितेजस्तै देखियाे ।'

बाजुराकाे त्रिवेणी नगरपालिका- ६ पन्धारास्थित नेपाली टोल र बुढाटोलका २ सय जना नेकपा परित्याग गरी नेपाली कांग्रेसमा प्रवेश गराउन आयाेजित आमसभा

जिल्ला प्रशासन कार्यालयले भने कार्यक्रमका बारेमा ढिलो गरी जानकारी आएको जनाएकाे छ । यसबारे सोध्दा प्रमुख जिल्ला अधिकारी कृष्ण गैरेले भने, 'प्रहरीलाई त्यहाँका मेयरले झुक्याएछन् । कार्यक्रममा १० देखि १२ जना उपस्थित हुने बताए पनि पछि भीडभाड ठूलै भएछ ।'

लकडाउनका बेला बाजुरामा राजनीतिक दलहरू चुनावी झल्को दिने गरी पार्टी प्रवेश गराउने अभियानमा तँछाडमछाड गर्दै लागेका छन् । नेपाली कांग्रेसले अभियानका रूपमा जिल्लाभर कार्यक्रम सञ्चालन गर्दै आएकाे छ ।

नेकपाका कार्यक्रम तुलनात्मक रूपमा कम छन् तर, उसको पनि तरिका उस्तै नै छ । यस खालका कार्यक्रमले कोरोना रोकथामका सबै कामलाई भर्सेलामा पारेको त छ नै, उल्टै संक्रमणको जोखिम पनि बढाइदिएको छ । देवताको पूजाका नाममा समेत जिल्लामा ठूलो संख्यामा मानिसहरू भेला भइरहेका छन् ।

संक्रमणको जोखिम उच्च रहेको भन्दै स्थानीय प्रशासनले भेला नहुन सचेत गराइरहेका बेला दुवै पार्टीबीच जिल्लाभर आमसभा र भेला गर्दै एकअर्को पार्टीका कार्यकर्तालाई भित्र्याउने प्रतिस्पर्धा चलेको छ । पार्टी प्रवेश गरेकाहरूलाई बधाई दिएका तस्वीर र स्टाटसले सामाजिक सञ्जाल रंगिएका छन् ।

गृह मन्त्रालयले २१ साउनमा पठाउँदै देशभर भीडभाड हुने कुनै पनि कार्यक्रम नगर्न भनेकाे छ । तर, बाजुरेली नेता कार्यकर्ताले त्यसको कुनै पालना गरेका छैनन् । जिल्ला प्रशासन कार्यालयले त्यसको कार्यान्वयन गर्न नसकेकाे प्रस्ट देखिन्छ । मंगलबार मात्र त्रिवेणी नगरपालिका–६, पन्धारामा विशाल आमसभा गरी दुई सय जना नेपाली कांग्रेसमा प्रवेश गराइएको छ ।

जिल्लाका बूढीनन्दा नगरपालिका-४, सीमका १६ परिवारलाई नेकपा त्यागेर कांग्रेसमा प्रवेश गराउन गरिएकाे आमसभा

गृह मन्त्रालयको ५ बुँदे निर्देशनसहितकाे पत्रमा 'कुनै पनि प्रकारका सभा, सम्मेलन, भेलालगायत भीडभाड हुने कार्यक्रम गर्न नहुने उल्लेख छ। तर, विभिन्न स्थानीय तहमा जनप्रतिनिधिको संलग्नतामै गृहकाे यस्ताे निर्देशनकाे उल्लंघन भइरहेकाे छ ।

सोमबार बूढीनन्दा नगरपालिका–४, सीम र मंगलबार त्रिवेणी नगरपालिकाको पन्धारमा आयोजित कांग्रेस आमसभामा जनप्रतिनिधिले नै टीका लगाएर नवप्रवेशी कार्यकर्तालाई स्वागत गरे ।

नेपाली कांग्रेसबाट निर्वाचित नगरप्रमुख रामसिंह रावल र उपमेयर राधिका सुनारसहित पाँच सयभन्दा बढी मानिस त्रिवेणी नगरपालिकामा भएकाे कार्यक्रममा देखिएका थिए । अझ आश्चर्यलाग्दो कुरा त के भने, कार्यक्रमलाई प्रहरीले नै पहरा दिइरहेको थियो । जबकि, प्रहरीले नै बाटोमा हिँड्दै गरेका सर्वसाधारणलाई मास्क नलगाएको भनेर जरिमाना गर्दै आएको छ ।

बूढीनन्दा नगरपालिकाको सीममा पनि दुई दिनअघि नगरप्रमुख पदम गिरीले नै भीडभाड गरी नवप्रवेशीहरूलाई स्वागत गरेका थिए ।

नेकपा पनि के कम ? २८ साउनमा नेकपा बूढीनन्दा नगर कमिटीले नेकपा सुदूरपश्चिम प्रदेश कमिटी सदस्य तथा प्रदेशसभा सदस्य बलदेव रेग्मीको प्रमुख आतिथ्यतामा पार्टी अगुवा कार्यकर्ता भेला गर्‍याे । उक्त भेलामा पनि बूढीनन्दा- ७, जेठारीबाडा कांग्रेसका सयाैँ कार्यकर्ता नेकपामा प्रवेश गरेका थिए ।

२८ साउनमा नेकपा बूढीनन्दा नगर कमिटीले गरेकाे पार्टी अगुवा कार्यकर्ता भेलामा बूढीनन्दा–७, जेठारीबाडाका २० परिवार कांग्रेस छोडेर नेकपामा प्रवेश गरेका थिए

४ भदौमा बाजुरा निर्वाचन क्षेत्र (क) मा पूर्वमाओवादी केन्द्रका नेताहरू भेला भए । बहाना थियाे- नेता तथा कार्यकर्ताकाे समीक्षा तथा अन्तर्क्रिया कार्यक्रम । कार्यक्रममा प्रमुख अतिथि थिए, पूर्वआपूर्ति राज्यमन्त्री केशव विक ।

कार्यक्रममा प्रदेश निर्वाचन क्षेत्र नम्बर (क) का चारवटै स्थानीय तहबाट ठूलो संख्यामा नेता तथा कार्यकर्ता भेला गरिएको थियो । भेलामा एकीकरणपछि बनेकाे नेपाल कम्युनिस्ट पार्टी (नेकपा)मा पूर्वमाओवादीका नेतामाथि विभेदपूर्ण व्यवहार भएको विषयमा उनीहरूले चिन्ता साटे । तर दुःखमनाउ गर्न डाकिएकाे भेलाबाटै काेराेना फैलिन सक्छ भन्ने विषयमा रत्तिभर सजग देखिएनन् ।

यसबारे प्रश्न गर्दा नेकपाका जिल्ला सचिव भरत बुढाले भने, ‘लकडाउन नभएको बेला केही स्थानीय तहमा भेटघाट छलफलका कार्यक्रम भए पनि लगडाउनको समयमा हाम्रा कुनै पनि कार्यक्रम सञ्चालन गरिएका छैनन् । हामीले लकडाउनको पूर्ण पालन गर्न नेता र कार्यकर्तालाई निदेशन दिएका छाैँ । बरू नेपाली कांग्रेसले दिनदिनै आमसभा र भेला गरिरहेकाे छ ।’

पूजाका नाममा भीडभाड

राजनीतिक दलहरू मात्र हाेइन, बाजुरा जिल्लाका विभिन्न धर्मपीठहरूमा पनि ठूलो संख्यामा भेला भएर पूजाआराधना र रातभर देउडा खेल्ने गतिविधिहरू उसैगरी भइरहेका छन् । सधैँ मेला र जात्रा भइरहने काठमाडौँ यस पटक चकमन्न छ । तर, पश्चिम पहाडमा सम्भावित संक्रमणको डरै छैन । पूजाआराधना र सांस्कृतिक रूपमा हुने सम्पूर्ण गतिविधि निस्फिक्री चलिरहेकै छन् ।

जिल्लामा मष्टा माडु, ऋषि, घटनाल, खापर, कैलाश र विभिन्न देवीका मठमन्दिरमा पूजाआराधना रोकिएका छैनन् । यहाँ साउन पूर्णिमा, भदाै पूर्णिमा, गौरा पर्व धुमधामका साथ मनाइएकाे छ । यता, जिल्ला प्रशासन कार्यालय बाजुराले मार्तडी बजार क्षेत्रमा मात्र प्रहरी परिचालन गरेर माइकिङ गरिरहेको छ । गाउँमा भीडभाडसहित हुने कार्यक्रम पनि भई नै रहेका छन् ।

१५ भदाैमा बडिमालिका नगरपालिका–८ को रतुडा कैलाशको पूजामा मेला भर्न आएकाहरू

देवीदेवताका मन्दिरको पूजामा देउडा खेल्ने, मागल गाउने र देवता चढेर बोल्नेहरूले कुनै पनि खालका सुरक्षाका सामग्री लगाउने गरेका छैनन् ।

'सुरक्षा सतर्कताका लागि सरकारी नियमकाे पूर्ण पालना गर्दै स्थानीय मेला तथा पर्वलाई व्यवस्थित गर्नुपर्थ्याे । सयाैँकाे संख्यामा मान्छेको उपस्थिति हुनुले जाेखिम बढाएकाे छ । मास्क लगाउने तथा भौतिक दूरी कायम गर्ने कुराप्रति काेही सचेत देखिएनन् । कसैमा कोराेना भएको भए एकैचोटि सबैतिर फैलियो होला', बडिमालिका नगरपालिका–८ का जेबिस ऐडीले चिन्ता जनाए ।

बाजुरा जिल्लामा भारतबाट आएर क्वारेन्टाइनमा बसेकाहरूको संख्या १५ हजार छ भने तीन हजार चार सय ४८ जनामा पहिलो चरणको कोरोना परीक्षण गर्दा पाँच सय ८३ जनामा कोरोना संक्रमण देखिएकाे थियो । काेराेना संक्रमणबाट दुई जनाको मृत्यु भइसकेकाे छ ।

पछिल्लो समय एक सय १६ जनाको पीसीआर परीक्षणका लागि धनगढी प्रादेशिक अस्पतालको प्रयोगशालामा पठाइएको स्वास्थ्य कार्यालय बाजुराका सूचना अधिकारी अशोक सिंहले बताए ।

उनले भने, 'अहिले समुदायमा कोराेना गएको छ कि छैन भन्नेबारे नमुना परीक्षणको रिपोर्ट नआएसम्म थाहा हुँदैन तर, यसबेला भीडभाड गरी कार्यक्रम गरे स्थिति हाम्रो नियन्त्रणभन्दा धेरै पर जान सक्छ ।यसमा सबैले सावधानी अपनाउनु जरुरी छ ।’

रोजगारीको सिलसिलामा भारत गएका धेरै जिल्लावासी गाउँ फर्किएका छन् । यसले समुदायस्तरमा कोरोना फैलिने डर विद्यमान रहेकाे बेला गाउँमा हुने भीडभाडका कार्यक्रमले जाेखिम थप बढाएका छन् ।

प्रकाशित मिति: मंगलबार, भदौ १६, २०७७ २०:४४