महामारीमा चुनावको झल्को : जनप्रतिनिधिकै संग्लनतामा भव्य कार्यक्रम

A+ A A-

कोरोना भाइरस (कोभिड-१९) को संक्रमण तीव्र गतिमा फैलिरहेको बेला बाजुरामा राजनीतिक दलहरू भने चुनावी झल्को दिने गरी पार्टी प्रवेश गराउने कार्यक्रम गर्न प्रतिस्पर्धामा जुटेका छन् ।

संक्रमणको जोखिम उच्च रहेको भन्दै स्थानीय प्रशासनले भेला नहुन सचेत गराइरहेका बेला नेकपा र कांग्रेसबीच जिल्लाभर आमसभा र भेला गर्दै एकअर्को पार्टीका कार्यकर्तालाई भित्र्याउन प्रतिस्पर्धा गरिरहेका हुन् ।

पार्टी प्रवेश गरेकाहरूलाई बधाई दिएका तस्वीर र स्टाटसले सामाजिक सञ्जालका भित्ता रंगिएका छन् । गृह मन्त्रालयको २१ साउनमा देशभर भेला, मेलापर्व, भीडभाड हुने कार्यक्रम नगर्न भन्दै निर्देशन दिए पनि राजीनितक दलले नै त्यसको उल्लंघन गरेका छन् ।

दिनहुँ कोरोना संक्रमण बढिरहेको अवस्थामा स्थानीय तहका जनप्रतिनिधिकै संलग्नतामा जिल्लामा पार्टी प्रवेका कार्यक्रम भइरहेका छन् । सोमबार जिल्लाको त्रिबेणी नगरपालिकाको पन्धारमा आयोजित नेपाली कांग्रेसको आमसभामा जनप्रतिनिधिले नै टीका लगाएर ठूलो संख्यालाई पार्टी पार्टीमा स्वागत गरेका छन् ।

कांग्रेसबाट निर्वाचित मेयर रामसिंह रावल र उपमेयर राधिका सुनार दबैको उपस्थितिमा ४ सयभन्दा बढी जनाको भेला गरेर कार्यक्रम गरिएको थियो । सो कार्यक्रममा प्रहरीको पहरामा भएको थियो । त्यस्तै, बूढीनन्दा नगरपालिकाको सीममा पनि २ दिनअघि मेयर पदम गिरीको अगुवाइमा पार्टी प्रवेशको कार्यक्रम आयोजना गरिएको थियो ।

जनप्रतिनिधिकै उपस्थितिमा ठूलाठूला कार्यक्रम हुँदा पनि प्रहरी प्रशासन मौन बसेको भन्दै जिल्लाबासीले चर्को आलोचना गरेका छन् । ‘सदरमुकाम मार्तडीको देवता पूजामा र त्रिवेणी नगरपालिकाको पार्टीको कार्यक्रममा ठूलो उपस्थिति गरेर कार्यक्रम भएछ । तर, बजारमा भने प्रहरी मास्क लगाएन भनेर हप्काउँछन् । नेताहरूको कार्यक्र रोक्न भने प्रहरी खुट्टा कमाउँछन्,’ देवराज पाध्यायले भने ।

जिल्लामा कोरोना नियन्त्रणका लागि जनचेतानामूलक कार्यक्रम गर्नुपर्नेमा राजनीतिक दलहरूले नै भीड जम्मा गर्दा संक्रमणको जोखिम बढेको छ ।

नेताहरूका भीडभाडका कार्यक्रमले सर्वसाधारणले कोरोना संक्रमणको खतरा बढेको स्थानीयले बताएका छन् । ‘लकडाउनको समयमा अन्य ठाउँबाट हाम्रो नगरपालिकामा आएर चुनावी आमसभाको झल्को दिने कार्यक्रम गरीएको । जनप्रतिनिधि स्वयमले त्यो कार्यक्रममा भाग लिएका छन्,’ स्थानीय शेरबहादुर शाहीले भने, ‘सामाजिक दूरी कायम नगरेरै यस्ता कार्यक्रम गर्दा कोरोनाको जोखिम बढेको छ । ठूला पदमा बसेका मान्छेबाटै नियमको उल्लंघन भएको छ । नेताहरूले किन नियम उल्लंघन गरेका हुन् ? यसको जवाफ स्थानीय प्रशासनले दिनुपर्छ ।

यता जिल्ला प्रशासन कार्यालयले भने सो कार्यक्रमबारे ढीला जानकारी प्राप्त भएको बताएको छ । प्रमुख जिल्ला अधिकारी कृष्ण गैरेले भने, ‘प्रहरीलाई त्यहाँका मेयरले कार्यक्रममा १०/१२ जना मात्र उपस्थित हुने बताएका थिए । तर, झुक्याएर आमसभा नै गरे छन् ।’

प्रकाशित मिति: मंगलबार, भदौ १६, २०७७ १५:३६