प्रस्तावित प्रमुख निर्वाचन आयुुक्त थपलियाको संसदीय सुनुवाई आज

A+ A A-

संसदीय सुनुवाई समितिले प्रस्तावित प्रमुख निर्वाचन आयुक्त दिनेशकुमार थपलियालाई बुधबार सुनुवाइका लागि बोलाएको छ । बुधबार बिहान ११ बजे समितिले थपलियाविरुद्ध उजुरी दर्ता गर्ने उजुरीकर्तासँग छलफल गर्नेछ र दिउँसो २ बजे थपलियाको सुनुवाइ हुनेछ । यस्तै, राष्ट्रिय समावेशी आयोगको सदस्यमा सिफारिस विष्णुमाया ओझालाई पनि सुनुवाइका लागि बोलाइएको छ ।

थपलियाविरुद्ध कर्मचारी समायोजन प्रक्रियामा विभेद गरेको उजुरी परेको छ । समायोजन प्रक्रियाबारे नै चारवटा उजुरी दर्ता भएका छन् ।

यस्तै, उपेक्षित, उत्पीडित र दलित वर्ग विकास समितिको कार्यक्रम र बजेट कटौती गरी विभेद गरेको पनि आरोप लगाइएको छ । विकास समिति ऐन अनुसार गठित उक्त संस्थाले विभेदकारी रुपमा कार्यसम्पादन गर्ने व्यक्तिलाई संवैधानिक आयोगको जिम्मेवारी दिनु गलत हुने उजुरीमा उल्लेख गरिएको छ । समावेशी आयोगको सदस्यमा सिफारिस ओझाविरुद्ध भने कुनै पनि उजुरी दर्ता भएको छैन ।

समितिले प्रमुख निर्वाचन आयुक्तपछि सर्वोच्च अदालतका लागि प्रस्तावित पाँचजना न्यायाधीशको सुनुवाई बिहीबार गर्ने भएको छ । न्यायाधीशविरुद्ध पाँच उजुरी दर्ता भएका छन् । उजुरीकर्तालाई भने बुधबार नै छलफलका लागि बोलाइएको छ । बिहीबार बिहान ११ बजे न्यायाधीशहरूको सुनुवाइ हुनेछ ।

पाँच उजुरीमध्ये तीन उजुरी व्यक्तिका विषयमा किटान गरिएका छन् । प्रस्तावित न्यायाधीश प्रकाश ढुङ्गाना र हरि फुँयालविरुद्ध व्यक्ति किटान गरेर उजुरी परेका छन् । यस्तै, प्रस्तावित न्यायाधीश मनोजकुमार शर्माविरुद्ध सैद्धान्तिक विषय उठान गर्दैै योग्यतामा प्रश्न गरिएको छ ।

ढुङ्गानाविरुद्ध फैसलामा न्यायिक त्रृटि गरेको आरोप लगाइएको छ । एक उजुरीकर्ताले आर्थिक लेनदेन गरी पेशी तोक्नमै बेञ्च सपिङ गरिएको आरोप पनि गाएका छन् । यस्तै, प्रस्तावित न्यायाधीश फुयाँलविरुद्ध झुटा विवरण तयार पारी सर्वोच्च अदालतको फैसला पुनरावलोकनका निवेदनको मस्यौदा गरी पैरवी गरेको आरोप छ । उक्त विवाद सर्वोच्चमा विचाराधीन समेत रहेको उजुरीमा उल्लेख छ ।

प्रस्तावित न्यायाधीशद्वय सुष्मलता माथेमा र कुमार रेग्मीविरुद्ध भने व्यक्तिगत उजुरी छैनन् ।
समितिले पाँच न्यायाधीश, प्रमुख निर्वाचन आयुक्त र समावेशी आयोगको सदस्यमा प्रस्ताविति व्यक्तिको संसदीय सुनुवाइ प्रक्रिया एकैपटक अगाडि बढाएको हो । समितिले मङ्गलबार सबै प्रस्तावित पदाधिकारीविरुद्ध प्राप्त उजुरी सार्वजनिक समेत गरेको थियो ।

प्रकाशित मिति: बुधबार, वैशाख ४, २०७६ १६:५६