पत्रकार पक्राउको विरोधमा पत्रकारिता क्षेत्र आन्दोलित

A+ A A-

समाचार प्रकासन गरेको विषयलाई विद्युतीय कारोबार ऐनसँग जोडेर प्रहरीले पत्रकार पक्राउ गर्न थालेपछि पत्रकारिता क्षेत्र आन्दोलित बनेको छ । अनलाइन पत्रकार संघको आयोजनामा माइतीघर मण्डलामा पत्रकारिता क्षेत्रसँग सम्बन्धित संघ संस्थाहरुले विरोध प्रदर्शन गरेका हुन् ।

अनलाइन संचार माध्यममा प्रकाशित समाचारलाई प्रहरीले विद्युतीय कारोबार ऐन अनुसार पक्राउन गर्न नमिल्ने पत्रकारिता क्षेत्रसँग सम्बन्धित संघ संस्थाका प्रतिनिधिले बताए ।

नेपाल पत्रकार महासंघका अध्यक्ष गोविन्द आचार्यले समाचारको विषयलाई विद्युतीय कारोबार ऐनसँग जोड्नु आपत्तिजनक विषय भएको धारणा राखे । विद्युतीय कारोबार ऐनको दफा ४७ र ४८ ले पत्रकारलाई संविधान प्रदत्त अधिकार प्रयोग गर्न अवरोध सिर्जना गरेकोले सो दफा नै खारेज गर्नुको विकल्प नभएको अध्यक्ष आचार्यको भनाइ छ ।

‘विद्युतीय कारोबार ऐनको दफा ४७ र ४८ देखाएर पत्रकारमाथि धरपकड गर्ने क्रम रोकिएको छैन, ऐनको यो दफा नै खारेज गर्नुपर्छ भनेर नेपाल पत्रकार महासंघ सहितका पत्रकारितासँग सम्बन्धित संघ संस्थाले माग गरेको लामो समय भइसकेको छ, ऐनको सो दफा देखाएर पत्रकार पक्राउ गर्ने होइन, ऐनको सो दफा नै खारेज गर्नुपर्छ,’ अध्यक्ष आचार्यले भने ।

नेपाल पत्रकार महासंघका महासचिब रमेश विष्टले पत्रकारमाथिको गैरकानुनी पक्राउ विरुद्ध देशव्यापी आन्दोलन गर्नुपर्ने अवस्था सिर्जना भएको बताए । स्वतन्त्र पत्रकारितामाथि बन्देज लगाउने र स्वतन्त्रतापूर्वक पत्रकारिता गर्न नपाउने अबस्था सिर्जना गर्न सरकारले विद्युतीय कारोबार ऐनको सहायता लिएको बताउँदै महासचिब विष्टले सरकारको यस्तो कार्यशैली विरुद्ध सडक संघर्ष गर्नुपर्ने अबस्था आउन सक्ने चेतावनी दिए ।

तत्कालिन प्रेस चौतारीका अध्यक्ष तथा प्रेस संगठन नेपालका प्रतिनिधि गणेश बस्नेतले विद्युतीय कारोबार ऐनको दफा देखाएर पत्रकारलाई धरपकड गरिनु गलत भएको बताए । संविधान प्रदत्त प्रेस स्वतन्त्रताको अधिकार अरु कुनै पनि ऐनको दफा वा अन्य विषय देखाएर हनन् गर्न नमिल्ने बस्नेतको भनाइ छ ।

प्रेस युनियनका सल्लाहकार शिव लम्सालले सरकारको नियत नै पत्रकारिता क्षेत्रलाई नियन्त्रण गर्ने भएकोले विद्युतीय कारोबार ऐनको सहायतामा पत्रकारमाथि धरपकड गरिएको बताए । पत्रकारमाथिको गैरकानुनी पक्राउ र धरपकड विरुद्ध देशव्यापी आन्दोलनको विकल्प नभएको सल्लाहकार लम्सालको भनाइ छ ।

अनलाइन पत्रकार संघका अध्यक्ष शिव सत्यालले पत्रकारिता क्षेत्रको लागि खतराको घण्टी जस्तै बनेको विद्युतीय कारोबार ऐनको दफा ४७ र ४८ नै खारेजको विकल्प नभएको बताए । पत्रकारितासँग सम्बन्ध नै नभएको विद्युतीय कारोबार ऐनको दफा टेकेर पत्रकारमाथि गरिने गैरकानुनी धरपकड नरोकिए कडा आन्दोलनको विकल्प नभएको अध्यक्ष सत्यालको भनाइ छ ।

पछिल्लो समय पोखराका पत्रकार अर्जुन गिरीले ताण्डवन्यूजडटकम तथा ताण्डव साप्ताहिकमा प्रकाशन गरेको समाचारको विषयलाई लिएर नेपाल प्रहरीको केन्द्रीय अनुसन्धान व्यूरो (सिआइबी) ले पक्राउ गरेका छ । सो लगायतका विषयलाई लिएर महासंघ सहित पत्रकारिता क्षेत्रसँग सम्बन्धित संघ संस्था आन्दोलित भएका हुन् ।

प्रकाशित मिति: बुधबार, वैशाख ४, २०७६ ०५:३८