११ मा पढ्ने विद्यार्थीले घरबाटै परामर्श लिन र भर्ना गर्न सक्ने

A+ A A-

तेस्रो नेपाल एडुफेयर सुरु भएको छ । एसईईपछि कक्षा ११ मा पढ्ने विद्यार्थीलाई लक्षित गरेर शिलापत्रडटकमले परामर्श दिनका लागि फेयरको आयोजना गरेको हो ।

मंगलबारदेखि सुरु भएको फेयरमा विद्यार्थीले कुन विषय पढ्ने ? विषय छनोट कसरी गर्ने ? कुन कलेज उपयुक्त छ ? के पढ्यो भने के बनिन्छ ? आफ्नो इच्छाअनुसारको विषय कुन हो ? कुन कलेजमा कुन विषय पढाइ हुन्छ ? पुस्तकालय छ छैन ? शिक्षक कस्ता छन् ? कक्षाकोठा कस्तो छ ? लगायतका विषयमा विद्यार्थी र अभिभावकलाई परामर्श दिइनेछ । परामर्शका लागि विद्यार्थी कलेजमा जानै पर्दैन । घरमै बसेर सबै हेर्न, पढ्न र बुझ्न सकिन्छ ।

घरबाटै परामर्श

‘अहिले कोरोना महामारी छ । परामर्शका लागि विद्यार्थी कलेजमा जाने सम्भावना छैन । इन्टरनेटको माध्यमबाट विद्यार्थी र अभिभावकले घरमै बसेर परामर्श पाउँछन्,’ फेयरका संयोजक सुरेश सिम्खडाले भने, ‘हामीले यो वर्ष मात्र होइन, अघिल्लो वर्ष पनि गरेका थियौँ । अब भर्चुअलको विकल्प छैन । यो पटक अझै परिस्कृत गरेर फेयरको आयोजना गरेका छौँ ।’

घरबाटै भर्ना पनि

नेपाल एडुफेयर भिजिट गरेर आफूलाई मन परेमा कलेजको व्यवस्थापनसँग विद्यार्थीले कुरा गर्न सक्नेछन् । अनलाइनबाट नै कलेज भर्ना गर्न सकिनेछ । कोरोनाका कारण कलेजमा जान सकिने अवस्था नरहेकाले भर्ना पनि अनलाइनको माध्यमबाट गर्न लागिएको हो । भर्नापछि विद्यार्थीलाई भर्चुअल रूपमा नै कलेजहरूले पढाउनेछन् ।

छात्रावृत्तिको व्यवस्था

यो वर्ष १ करोडको छात्रावृत्तिको व्यवस्था गरिएको छ । गरिब तथा जेहनदार विद्यार्थीका लागि छात्रावृत्तिको व्यवस्था गरिएको हो । छात्रवृत्तिका लागि नेपाल एडुफेयरडटकम भिजिट गरेर फारम भर्न सकिनेछ । फारम भरिसकेपछि विद्यार्थीले परीक्षा दिनुपर्ने हुन्छ । परीक्षाका लागि आयोजकले फोन गर्नेछन् । परीक्षामा जसले धेरै नम्बर ल्याउँछ, उसैलाई छात्रवृत्ति दिइनेछ । यो वर्ष ३५ जना विद्यार्थीलाई छात्रवृत्ति दिइने संयोजक सिम्खडाले जानकारी दिए ।

‘शिलापत्रले सामाजिक उत्तरदायित्वअन्तर्गत छात्रवृत्ति दिन लागेको हो,’ उनले भने, ‘छात्रवृत्ति पाउन सफल विद्यार्थीले कलेजमा रजिस्ट्रेसन शुल्कबाहेक अन्य कुनै पनि शुल्क तिर्नु पर्दैन ।’

अघिल्लो वर्ष पनि शिलापत्रले ५० लाखमा स्नातकका ८ जना विद्यार्थीलाई छात्रवृत्तिमा पढाएको थियो । यो वर्ष बढाएर छात्रवृत्तिकाे काेटा बढाएर १ करोडमा ३५ जनालाई पढाउन लागेको हो । काठमाडौं उपत्यकासहित बाहिर जिल्लाका कलेजमा पनि विद्यार्थीले पढ्न पाउनेछन् । विज्ञान, व्यवस्थापन र मानविकी संकायमा ३५ जनाले स्कलरसिप पाउनेछन् ।

‘काठमाडौं उपत्यकाबाहिरका १० वटा कलेज र उपत्यकाभित्र २५ वटा कलेजमा पढ्न पाइनेछ,’ संयाेजक सिम्खडाले भने, ‘स्कलरसिपका लागि फारम खुलिसकेको छ ।’

नेपालएडुफेयरडटकम र शिलापत्रले शिक्षाका विषयमा कलम चलाउँदै आएको छ । विद्यार्थीलाई लक्षित गरेर अडिया, भिडियो र शब्दमा सामग्री पनि तयार पारेको छ । भिडियो प्रत्येक साँझ ७ बजे शिलापत्रमा हेर्न सकिनेछ । त्यस्तै, नेपालएडुफेयरडटममा पनि ती सामग्री हेर्न, पढ्न र सुन्न सकिनेछ । फेयर साउन ३२ सम्म चल्नेछ ।

यहाँ किल्क गर्नुहोस् : nepaledufair

भर्चुअल शैक्षिक परामर्श मेलाको स्टल बुकिङ खुला

एसईई उत्तीर्ण विद्यार्थीका लागि १ करोडको ‘शिलापत्र उज्ज्वल स्कलरसिप’

प्रकाशित मिति: बुधबार, साउन २१, २०७७ ००:१५