एसईई उत्तीर्ण विद्यार्थीका लागि १ करोडको ‘शिलापत्र उज्ज्वल स्कलरसिप’

A+ A A-

शिलापत्र मिडिया नेटवर्कअन्तर्गतकाे शिलापत्र डटकमले यस वर्ष १ करोड रुपैयाँको 'शिलापत्र उज्ज्वल स्कलरसिप' घोषणा गरेको छ ।

एसईई उत्तीर्ण गरेका गरिब तथा जेहनदार विद्यार्थीका लागि शिलापत्रले १ करोडको 'शिलापत्र उज्ज्वल स्कलरसिप'को घोषणा गरेको हो ।

विज्ञान, व्यवस्थापन र मानविकी संकायमा ३५ जनाले स्कलरसिप पाउने छन् ।

स्कलरसिप पाउनेले रजिस्ट्रेसनबाहेक अरु शुल्क तिर्नुपर्ने छैन । काठमाडौं उपत्यका बाहिरका १० वटा कलेज र उपत्यकाभित्र २५ वटा कलेजमा पढ्न पाइने छ । स्कलरसिपका लागि फारम खुलिसकेको छ । नेपालएडुफेयर डटक (www.nepaledufair.com) मा गएर फारम भर्न सकिने छ ।

स्कलरसिपका लागि परीक्षा लिइनेछ । कोरोना महामारीका कारण अनलाइनबाट नै परीक्षाको व्यवस्था मिलाइएको छ । मेरिटको आधारमा स्कलरसिप दिइनेछ । लिखित परीक्षापछि अन्तर्वार्ता पनि हुनेछ ।

गत वर्ष ८ जना विद्यार्थीलाई स्कलरसिप दिइएको थियो । ५० लाखबाट सुरू भएको यो स्कलरसिपलाई यस वर्षदेखि १ करोडमा पुर्‍याइएको हो ।

त्यस्तै, तेस्रो भर्चुअल शैक्षिक मेलाका लागि पनि स्टल बुकिङ खुला भएको छ । भर्चुअल शैक्षिक परामर्शका लागि स्टल बुकिङ खुला भएको हो । इच्छुक कलेजले भर्चुअल रूपमा स्टल राख्न सक्नेछन् ।

कोरोना भाइरस (कोभिड–१९) का कारण कलेजमै उपस्थित भएर परामर्श लिन सकिने अवस्था नरहेकाले अनलाइबाटै विद्यार्थी र अभिभावकलाई परामर्श दिन भर्चुअल शैक्षिक मेलाको आयोजना गर्न लागिएको हो ।

कुन विषय पढ्दा के हुन्छ ? कुन कलेजमा के पढाइ हुन्छ ? कुन कलेज आफ्ना लागि उपयुक्त हुन्छ ? यसबारेमा विद्यार्थीले घरमै बसेर हेर्न र बुझ्न पाउनेछन् । मेचीदेखि महाकालीसम्मका कलेज र विद्यार्थीलाई सहभागी गराउने आयोजकको लक्ष्य छ । मेला १० साउनदेखि २० साउनसम्म १० दिन सञ्चालन हुनेछ । अघिल्लो वर्ष पनि भर्चुअल शैक्षिक मेला आयोजना गरिएको थियो ।

प्रकाशित मिति: सोमबार, साउन ५, २०७७ ०८:३७