आजियटा भन्छः नेपालमा साढे ७० अर्ब कर तिर्न बाँकी

A+ A A-

टेलिया सोनेराबाट एनसेल खरिद गरेको मलेशियन कम्पनी आजियटाले नेपालमा साढे ७० अर्ब रुपैयाँ कर तिर्न बाँकी रहेको तथ्य खुलेको छ ।

महालेखा परीक्षकको कार्यालयले सार्बजनिक गरेको ५६औं बार्षिक प्रतिवेदनका अनुसार उसले टेलियाबाट एनसेलको शेयर स्वामित्व खरिद गरे वापत नेपाल सरकारलाई ७० अर्ब ४४ करोड रुपैयाँ कर तिर्न बाँकी रहेको सो कम्पनीको सन् २०१७ को बार्षिक प्रतिवेदनमा उल्लेख गरेको उल्लेख छ ।

‘वित्तीय प्रतिवेदनको नोट ४५ मा गरेको खुलासा अनुसार नेपालमा रहेको करदाता (आजियटा) को कूल सम्पत्ति २ खर्ब २ अर्ब ६४ करोड रुपैयाँ र तिर्नुपर्ने दायित्वमा ७० अर्ब ४४ करोड रुपैयाँ उल्लेख गरेको छ,’ महालेखाले आफ्नो प्रतिवेदनमा उल्लेख गरेको छ ।

आजियटाले नेपाल सरकारलाई कर तिर्न बाँकी रहेको कारण एनसेलमा आफ्नो सम्पत्ति नै कम भएको उल्लेख गरेको पनि महालेखाले भनेको छ । आजियटाले कर बाँकी रहेकोले एनसेलमा आफ्नो खुद सम्पत्ति (कर कटाएर) १ खर्ब ३२ अर्ब २ करोड रुपैयाँ रहेको उल्लेख गरेको भनिएको छ ।

महालेखाले एनसेल खरिदमा आजियटालाई ७४ अर्ब १५ करोड रुपैयाँ खुद लाभ भएको उल्लेख गरेको छ । जबकि एनसेलले २१ असोज २०७३ मा ठूला करदाता कार्यालयमा पेश गरेको आय विवरणमा भने २४ करोड ८३ लाख रुपैयाँ मात्रै खुद लाभ देखाएको छ । महालेखाका अनुसार उसले लुकाएको ७३ अर्ब ८९ करोड रुपैयाँमा आयकर ऐन अनुसार २५ प्रतिशतले कर तिर्दा १८ अर्ब ७४ करोड रुपैयाँ कर निर्धारण गर्न र असुल गर्न बाँकी छ ।

महालेखाले एनसेलको शेयर खरिद प्रकरणमा ठूला करदाता कार्यालय यसअघि तय गरेको करमा कम्पनीको ख्याति वापतको मूल्य समावेश नभएको समेत उल्लेख छ । आजियटाले कम्पनीको ख्याति वापत १ अर्ब ८४ करोड ३८ लाख रिङ्गिट अर्थात ५० अर्ब ११ करोड ५१ लाख रुपैयाँ समावेश गरेको छैन । यो रकम समेत समावेश नगरेको भन्दै महालेखाले आयकर ऐन बमोजिम लाग्ने कर, शुल्क र ब्याज समेत छानविन गरी कर निर्धारण गर्न सरकारलाई निर्देशन दिएको छ ।

प्रकाशित मिति: शनिबार, चैत ३०, २०७५ ०३:२१