कक्षा ११ मा जीपीएका आधारमा विषय छनोट गर्नुपर्ने

A+ A A-

पाठ्यक्रम विकास केन्द्रले एसईईपछि कक्षा ११ मा कति जीपीए ल्याएका कुन विषय पढ्ने भन्ने आधार बनाउन सुरु गरेको छ ।

जीपीएका आधारमा विद्यार्थीले विषय छनोट गर्न पाउनेछन् । पहिले यति जीपीए ल्याएकाले यो संकाय पढ्ने भन्ने थियो । तर, अहिले संकाय नभएर एकल पथीय भएकाले पाठ्यक्रमले नयाँ आधार बनाउन लागेको हो ।

पाठ्यक्रम विकास केन्द्रका निर्देशक गणेशप्रसाद भट्टराईले दुईवटा आधारमा जीपीए निर्धारण गरिने बताए । ‘दुईवटा आधारमा जीपीए निर्धारण हुन्छ । विद्यार्थीले विषयगत रूपमा ल्याएको ग्रेड र टोटल जीपीएका आधारमा कक्षा ११ मा कुन विषय पढ्ने भन्ने निर्धारण गर्छौं,’ उनले भने ।

यो वर्ष कक्षा ११ र १२ पनि विद्यालय शिक्षा नै भएकाले विद्यार्थीले सबै विषय पढ्न सक्ने गरी जीपीए निर्धारण गर्न लागिएको हो ।

सबै क्षेत्रमा जाने गरी कुनै रोकावट नहुनेगरी जीपीए निर्धारण गरिने उनले बताए । यसअघि कम जीपीए ल्याएका विद्यार्थीले साइन्स म्यानेजमेन्टलगायतका विषय पढ्न पाउने थिएनन् ।

कम जीपीए ल्याएकाले मानविकी र शिक्षाका विषय पढ्ने र धेरै नम्बर ल्याएकाले नपढ्ने अवस्था आएको थियो । धेरै नम्बर ल्याउनेले पनि मानविकी एजुकेसनका विषय पढ्न प्रेरित हुने गरी जीपीए बनाउन लागिएको छ ।

जीपीएको निर्धारण शिक्षा मन्त्रालयबाट स्वीकृत भएपछि सार्वजनिक गरिने निर्देशक भट्टराईले जानकारी दिए ।

‘शिक्षा मन्त्रालयबाट स्वीकृत भएपछि र एसईईको नतिजा आएसँगै कति जीपीए ल्याएकाले कुन विषय पढ्ने हो, त्यो पनि सार्वजनिक गर्छौं,’ उनले भने ।

कक्षा ११ मा नयाँ पाठ्यक्रम लागू गरिएको छ । नयाँ पाठ्यक्रमअनुसार विद्यार्थीले यो वर्ष नयाँ पाठ्यपुस्तक पढ्नेछन् ।

अनिवार्य ३ वटा विषय छन् भने ४ वटा समूहमा ७९ वटा ऐच्छिक विषय छन् । ती ७९ वटा ऐच्छिक विषयबाट ३ वटा विषय विद्यार्थीले छान्नुपर्ने हुन्छ । चौथो समूहबाट विद्यार्थीले पढ्न चाहेमा थप अर्को विषय पढ्न पाउनेछन् ।

कुन विषयका लागि कुन पुस्तकालय जाने ?

११ पढ्न काठमाडौं आउँदै हुनुहुन्छ ? थोरै खर्चमा कहाँ बस्ने ?

प्लस टु र संकायको नाममा विज्ञापन गर्दै विद्यालय

एसईईमा कति जीपीए ल्याएकाले के पढ्ने ?

प्रकाशित मिति: बुधबार, साउन १४, २०७७ ०९:३०