एसईईमा कति जीपीए ल्याएकाले के पढ्ने ?

A+ A A-

११ मा नयाँ पाठ्यक्रम

कक्षा ११ मा यो वर्षदेखि नयाँ पाठ्यक्रम लागू हुँदै छ । ११ को नयाँ पाठ्यक्रमअनुसार अनिवार्य विषयको पाठ्यपुस्तक तयार भइसकेको पाठ्यक्रम विकास केन्द्रले जनाएको छ ।

अनिवार्य ३ विषयको पाठ्यपुस्तक केन्द्रले बनाउने

११ मा अंग्रेजी, नेपाली, सामाजिक अध्ययन विषय अनिवार्य गरिएको छ । यी विषयको पाठयपुस्तक तयार भइसकेको केन्द्रका निर्देशक गणेशप्रसाद भट्टराईले जानकारी दिए । कक्षा १२ मा नेपाली, अंग्रेजी र जीवनोपयोगी शिक्षालाई अनिवार्य गरिएको छ । कक्षा १२ को नयाँ पाठ्यक्रम अर्को वर्षदेखि लागू हुनेछ ।

ऐच्छिक विषय बजारबाट लिइने

‘अनिवार्य विषयका पाठ्यपुस्तक हामीले बनाउने हो,’ निर्देशक भट्टराईले भने, ‘ऐच्छिक विषयको पाठ्यपुस्तक बजामा विज्ञले लेखेको किताबलाई मूल्यांकन गरेर स्वीकृति दिन्छौँ ।’

ऐच्छिक विषयका किताब विज्ञहरूले पाठ्यक्रम विकास केन्द्रमा बुझाएका छन् । ती किताबको मूल्याङ्कन गरेर केन्द्रले स्वीकृति दिनेछ ।

निर्देशक भट्टराईका अनुसार ११ र १२ मा चारवटा ऐच्छिक समूह छन् । तीनवटा समूहबाट एक–एकवटा विषय अनिवार्य लिनुपर्छ । चौथो समूहबाट विद्यार्थीले चाहेका विषय पढ्न सक्छन् ।

यी हुन् ११ र १२ का ऐच्छिक विषय

११ र १२ मा संकाय छुट्याइएको छैन

११ र १२ कक्षा पनि विद्यालय तहकै शिक्षा भएकाले यो वर्षदेखि संकाय छुट्याइएको छैन । यसअघि विज्ञान, व्यवस्थापन, मानविकी भनेर छुट्याइएको थियो । अब उच्च शिक्षामा कुन संकाय पढ्ने हो, त्यसका आधारमा विषय छनोर्ट गर्न पाइनेछ । तर, विद्यालयहरूले ११ र १२ मा विज्ञान, व्यवस्थापन, मानविकी संकाय जसरी नै विद्यार्थी भर्ना गर्नेछन् ।

‘अब संकाय भन्ने रहेन । कक्षा ११ र १२ हो । १२ उत्तीर्णलाई स्कुल लिभिङ सर्टिफिकेट एक्जामिनेसन ‘एसएलसीई’ भनिन्छ,’ निर्देशक भट्टराईले भने ।

जीपीएको आधार बनाउँदै पाठ्यक्रम

पाठ्यक्रम विकास केन्द्रले एसईईमा कति जीपीए ल्याए ११ मा कुन विषय पढ्न पाउने भन्ने आधार बनाउँदै छ । जीपीएका आधारमा विद्यार्थीले विषय छनोट गर्न पाउने भएकाले पाठ्यक्रमले जीपीएको आधार बनाउन लागेको हो । ‘कति जीपीए ल्याएकाले के पढ्ने, त्यसको आधार बनाउँदै छौं,’ केन्द्रका निर्देशक भट्टराईले भने, ‘एसईईको नतिजा आएपछि कति जीपीए ल्याएकाले के पढ्ने, त्यो सार्वजनिक गर्छाैं ।’

अघिल्ला वर्षमा धेरै जीपीए ल्याएकाले विज्ञान, म्यानेजमेन्ट र कम जीपीए ल्याएकाले मानविकी, शिक्षा संकाय पढ्न पाउने आधार बनाएको थियो । तर, यो वर्ष संकाय नभएकाले कसरी आधार बनाउने भन्ने विषयमा केन्द्रले छलफल गरिरहेको छ ।

याे पनि पढ्नुहाेस्:

कक्षा १ र ११ मा नयाँ पाठ्यपुस्तक, यस्ता छन् विषय

गणितमाथि फेरि झेल !

कक्षा ११ र १२ मा गणित नपढ्दा के हुन्छ ?

कक्षा ११ र १२ को नयाँ पाठ्यक्रम विवादमा : विज्ञ भन्छन्, ‘पुरानै ढर्राको’

प्रकाशित मिति: आइतबार, साउन ११, २०७७ १७:१०