आन्तरिक उडान र लकडाउनबारे मन्त्रिपरिषद् बैठकले निर्णय गर्ने

फाइल तस्वीर

A+ A A-

आन्तरिक उडान सञ्चालन र लकडाउनका विषयमा आज बस्ने मन्त्रिपरिषद् बैठकले निर्णय गर्ने भएको छ ।

प्रधानमन्त्री तथा मन्त्रिपरिषद् कार्यालयका सचिव महेन्द्र गुरागाईंले आन्तरिक उडान सञ्चालन र लकडाउनका विषयमा आज बस्ने मन्त्रिपरिषद् बैठकले निर्णय गर्न सक्ने बताए । कोभिड- १९ क्राइसिस म्यानेजमेन्ट सेन्टर (सीसीएमसी)को बैठकपछि बैठकका निर्णय सुनाउँदै उनले यस्तो बताएका हुन् ।

त्यस्तै, आज बसेको सीसीएमसीको बैठकले त्रिभुवन अन्तर्राष्ट्रिय विमानस्थलबाट बाहिरिनेहरूका लागि स्वास्थ्य जाँचको व्यवस्था मिलाउने निर्णय गरेको उनले बताए । विमानस्थलका कर्मचारीहरूलाई स्वास्थ्य सुरक्षाका सामग्री प्रति व्यक्ति २ जोरका दरले वितरण गर्ने पनि निर्णय गरेको छ ।

यस्तै, आमा र बच्चा नेपाली नागरिकताधारी र बुबा विदेशी पासपोर्ट भएकाहरूको भिसा सहजीकरणका लागि निर्णय गर्न मन्त्रिपरिषद्लाई सिफारिस गरिएको छ ।

स्वास्थ्य तथा जनसंख्या मन्त्रालयको मापदण्डअनुसार स्थानीय तह, वडा कार्यालय र प्रहरीको सिफारिस लिएर आएमा होम क्वारेन्टाइनमा बस्ने प्रतिवद्धतासहित उपत्यका भित्रिन दिने निर्णय सीसीएमसीले गरेको छ ।

स्वास्थ्य मन्त्रालयको मापदण्डअनुसार १४ दिन होम क्वारेन्टाइनमा बस्नेगरी स्थानीय तह र प्रहरीको सिफारिस लिएर आउन दिने निर्णय सीसीएमसीले गरेको हो । हवाई तथा स्थलमार्गबाट आउने सबैमा सो निर्णय लागू हुने उनले बताए ।

सीसीएमसीले क्वारेन्टाइनहरूमा स्वास्थ्य सामग्री वितरण गर्न मन्त्रालयको अनुमति पनि अनिवार्य गर्ने निर्णय गरेको छ । संक्रमणको जोखिमलाई मध्यनजर गर्दै यस्तो निर्णय गरिएको उनले बताए ।

प्रकाशित मिति: सोमबार, असार १५, २०७७ १७:४७