९८ दिनपछि खुलेको बजारमा १६ कम्पनीले कमाए, कसको कति ?

काेराेना भाइरस महामारीकाे राेकथाम र नियन्त्रणका लागि लागू गरिएकाे लकडाउनका कारण ९८ दिनसम्म बन्द रहेको शेयरबजार नेप्से सोमबार खुल्दा १६ वटा कम्पनीले कमाउन सफल भएका छन् ।

बजार घट्छ भन्ने मनस्थितमा रहेका लगानीकर्ताहरूले सोमबार खुलेको बजारमा खासै कारोबार नगरे पनि नेपाल इन्भेस्टमेन्ट बैंक, हिमालयन डिस्टिलरी लिमिटेड र सिटिजन्स इन्भेस्टमेन्ट ट्रस्टले ९ प्रतिशतभन्दा बढी कमाए ।

आइतबार नियामक निकाय धितोपत्र बोर्डले बजार खोल्दा हुन सक्ने क्षतिलाई सन्तुलित राख्न सर्किट ब्रेकरको व्यवस्था गरेका थिए । तर, सोमबार खुलेको बजारमा सोचेजस्तो ओरालो भने लागेन ।

बिहान ११ बजेबाट खुलेको बजार आक्रामक रूपले ओरालो गतिमा देखिए पनि अन्तिम समयतिर गति बदल्दै उकालो लागेको थियो । कारोबार खुलेको ५ मिनेटमा ७ अंकले ओरालो लागेको बजारमा २० मिनेट नपुग्दै ४१ अंकले घटेर सर्किट ब्रेक लाग्यो ।

यो पनि पढ्नुहोस

५ मिनेटमै ७ अंकले घट्यो नेप्से

धितोपत्र बोर्डले गरेको व्यवस्थाअनुरूप १ घण्टाभित्रमा नेप्से परिसूचक ४ प्रतिशत घटेमा कारोबार १५ मिनेट रोक्ने व्यवस्था कारोबारको सुरुवातमै लागू भयो ।

ओरालो लागेर १५ मिनेट रेस्ट पाएको कारोबारले १२ बजेर ३७ मिनेटमा पुन: सञ्चालन भएदेखि भने उकालो लाग्न सफल भयो । यसरी २ बजेर ४१ मिनेटमा पुग्दा सूचक आज कारोबार सुरू भएकै विन्दुनजिकै पुग्न सफल भयाे । पुन: सञ्चालन भएदेखि नेप्से सूचक ४८ अंकले बढेर पुन: १२०० विन्दुमा पुग्याे । तर, अन्तिम ५ मिनेटमा भने सूचक बढ्न नसकेर पुन: ओरालो लाग्दा ११८८.७१ विन्दुमा पुगेर शेयरबजार बन्द हुन पुग्यो ।

खुलेको पहिलो दिन १ सय ३० वटा कम्पनीको ९ लाख ७० हजार ७६ कित्ता शेयर ४ हजार ८ सय ६२ पटक किनबेच हुँदा ४८ करोड ३५ लाख १५ हजार ६ सय २७ रूपैयाँमा कारोबार भएको छ ।

नकारात्मक सर्किट ब्रेक हुने सम्भावना प्रचुर रहँदारहँदै पनि अन्तिमतिर कारोबार बढ्दा लगानीकर्ता हौसिएका देखिन्छन् । कारोबारमा सबै राताम्मे भइरहँदा पनि सोमबार १६ वटा कम्पनीले राम्रै कमाइ गरे । नेपाल इन्भेस्टमेन्ट बैंकले ९.९४ प्रतिशतले कमाएको छ । खुलेको पहिलो दिन बैंकको ३२ हजार ७ सय १९ कित्ता शेयर खरिदबिक्री भयो ।

त्यस्तै, हिमालयन डिस्टिलरी लिमिटेडले पनि ९.९५ प्रतिशतले शेयरमूल्य बढाउँदै २७ हजार ६ सय ७५ कित्ता शेयर खरिदबिक्री गर्न सफल भयो । त्यसो त सिटिजन्स इन्भेस्टमेन्ट ट्रस्टको पनि ९.९८ प्रतिशतले शेयरमूल्य बढ्दै २ हजार २ सय ६४ कित्ता किनबेच भए ।

यीबाहेक अरुण काबेली पावर लिमिटेड ५.६६, विशाल बजार कम्पनी लिमिटेडले १.४४, छिमेकी लघुवित्त विकास बैंक लिमिटेड १.११, गुडविल फाइनान्स ६.८१, हिमाल दोलखा हाइड्रोपावर कम्पनी लिमिटेड ४.८७, हिमालयन पावर पार्टनर १.५५, ङादी ग्रुप पावर लिमिटेड २, नेपाल लाइफ इन्स्योरेन्स ५.७४, नेपाल दूरसञ्चार कम्पनी लिमिटेड २.२१, प्रोग्रेसिभ फाइनान्स लिमिटेड १.९६, शिवम सिमेन्टको ८.४९, सिनर्जी पावर डेभलपमेन्ट लिमिटेड ३.३३ र साल्ट ट्रेडिङ कर्पोरेसनको ५.९५ प्रतिशतले शेयरमूल्य बढ्याे ।

शेयरबजार समग्रमा नकारात्मक हुँदा पनि पहिलो दिन नै कमाउन सफल १६ कम्पनीबाहेक स्वावलम्बन लघुवित्त वित्तीय संस्था लिमिटेडले सबैभन्दा धेरै ९.९९ प्रतिशतले गुमाएको छ । योसँगै तीन अन्य कम्पनीको पनि ९ प्रतिशतले शेयरमूल्य घटेको छ ।

समूहतर्फ भने सबैभन्दा धेरै विकास बैक समूहको सूचक घटेको छ । विकास बैंकको सूचक ३.७४ प्रतिशतले घटेको हो । सेन्सेटिभ परिसूचक पनि १.५५ प्रतिशतले घटेर २५६.२९ विन्दुमा पुगेर बन्द भएको छ ।

पहिलो दिन सुरुवाती चरण अत्यासलाग्दो देखिए पनि सुधार हुँदै गएपछि भने लगानीकर्ताले केही राहत महसुस गरेका छन् ।

लकाडाउनपश्चात् बीचमा २ दिन खुलेको बजारमा पहिलो दिन खुलेको डेढ घण्टामा २ प्रतिशतले ओरालो लागेर सर्किट ब्रेक भएको थियो भने दोस्रो दिन पनि खुलेको ४० मिनेटमै २ प्रतिशतले ओरालो लागेर सर्किट ब्रेक लागेको थियो ।