शेयर बजारमा अनलाइन भुक्तानीको सीमा हट्यो, बजार खुल्ने सङ्केत

A+ A A-

शेयर बजारमा नेपाल राष्ट्र बैंकले पेमेन्ट लिमिटेसन हटाएको छ । शेयर बजारको नियामक निकाय धितोपत्र बोर्ड (सेबाेन)ले केही दिनअगाडि गभर्नर महाप्रसाद अधिकारीलाई भेटेरै पेमेन्ट लिमिटेसन हटाउन तथा पुँजीगत लाभकर ५ प्रतिशतलाई नै अन्तिम बनाउनुपर्ने माग गरेसँगै राष्ट्र बैंक कार्यान्वयनमा तातेको हो ।

यसअघि शेयर बजारमा इन्टरनेट र मोबाइल बैंकिङबाट गर्ने कारोबारको सीमा दैनिक १ लाख र मासिक रूपमा १० लाख रुपैयाँसम्म मात्र गर्न पाउने व्यवस्था थियो । सोही सीमालाई हटाउनुपर्ने भन्दै धितोपत्र बोर्डले शेयर बजार खुलाउने मिति थप एक हप्ताले बढाएको थियो ।

त्यस्तै, पुँजीगत लाभकर पनि ५ प्रतिशतलाई नै अन्तिम मान्ने निणर्य भएसँगै शेयर बजार खुल्ने सङ्केत देखिएको हो ।

इन्टरनेट बैंकिङको मर्चेन्ट पेमेन्ट मासिक ३० लाख र दैनिक रूपमा १० लाख रुपैयाँसम्मको कारोबार पाउनुपर्ने व्यवस्था थियो भने एकाउन्ट ट्रान्सफरमा दैनिक १० लाखदेखि मासिक ५० लाख रुपैयाँको कारोबार गर्न पाउने सीमा तोकिएको थियो ।

राष्ट्र बैंकले सीमा हटाएसँगै अब अनलाइन कारोबारमा सीमाको झन्झट हटेको हो ।

लगानीकर्ता हरि ढकाल राष्ट्र बैंकले गरेको यो कदम सराहनीय भएको बताउँछन् । उनले भने, ‘धितोपत्र बोर्डले दुईवटा माग राखेर दबाब दिएसँगै राष्ट्र बैंकले चासोपूर्वक कार्यान्वयन गरेको छ । यो राम्रो पक्ष हो । अब यसै गरी बोर्डले अरू समस्याहरू पनि समाधान गर्न पहल थाल्नुपर्छ ।’

सीमा हटाए पनि राष्ट्र बैंकले माहामारीकाे कारण देखाउँदै धितोपत्र व्यवसाय गर्न अनुमतिप्राप्त दलालहरूसँग धितोपत्रको कारोबार गरेबापत सेवाग्राहीलाई प्रति भुक्तानी कारोबार बढीमा १ लाख रुपैयाँसम्म गर्न पाउने व्यवस्था गरेको छ ।

अर्थात् मोबाइल बैंकिङतर्फ एक पटकको कारोबारमा १ लाख रुपैयाँभन्दा बढीको कारोबार गर्न नपाउने व्यवस्था गरेको छ ।

त्यस्तै, इन्टरनेट बैंकिङका प्रयोगकर्ताहरूलाई भने एक पटकमा १० लाख रुपैयाँभन्दा बढी कारोबार गर्न नपाउने व्यवस्था गरेको छ ।

शेयर कारोबारमा पेमेन्ट लिमिटेसन हटेसँगै बजार खुलाउने तयारी गरिएको छ । धितोपत्र बोर्डका अध्यक्ष भीष्मराज ढुंगानाका अनुसार शेयर बजार खुलाउने प्रयास भइरहे पनि एक-दुई दिन अझै लाग्नेछ ।

‘बजार अध्ययन समितिले शेयर बजार खुलाउन सकिने नसकिने कस्तो प्रतिवेदन पेस गर्छ, त्यसै अनुरुप अगाडि बढिन्छ', उनले भने, 'सम्भवत: आइतबारदेखि धिताेपत्र बजार खुल्न सक्छ ।’

माग पूरा भएसँगै बजार खोल्नुपर्ने दबाबमा परेको धितोपत्र बोर्डले शेयर बजारका लागि गर्नुपर्ने सुधारका कामहरू भने अझै बाँकी नै छन्, जसले गर्दा अहिले बजार खुले पनि जोखिम भने उत्तिकै रहेको शेयर बजार जानकारहरू बताउँछन् ।

प्रकाशित मिति: बुधबार, असार १०, २०७७ १५:०५