के हो क्वारेन्टाइन ? किन पालना गर्ने नियम ?

A+ A A-

युथ रिपोर्टर शिलापत्रडटकमले सुरु गरेको युवालक्षित स्तम्भ हो । यो स्तम्भमा दूरदराजमा रहेर सामाजिक जागरण र समाज रुपान्तरणमा भूमिका खेलिरहेका युवावर्गका सूचना संकलन सीप, लेखन कला र सिर्जनात्मक क्षमतालाई प्रोत्साहन गरी उनीहरूका अंकुराउँदै गरेका सिर्जनात्मक चेतलाई प्रोत्साहन गर्ने खालका सामग्री प्रकाशन गर्नेछौँ । यो अभियानमा जोडिएर सहकार्य गर्न शिलापत्रडटकम आह्वान गर्दछ । (सं.)

अहिले हामीले जताततै एउटै शब्द धेरै सुन्ने गर्छौँ । त्यो हो– सेल्फ आइसाेलेसन र क्वारेन्टाइन । कोरोना भाइरस विश्वमा देखा पर्नासाथै यी दुवै शब्दले निकै चर्चा पाए ।

अहिले नेपालमा पनि सरकारदेखि डाक्टर र विद्यालयदेखि साथीभाइसम्मले हामी सबैलाई सेल्फ आइसाेलेसनमा बस्न र क्वारेन्टाइनमा बस्न आग्रह गरिरहेका हुन्छन् ।

आखिर के हो त सेल्फ आइसाेलेसन अनि क्वारेन्टाइन ?

कोरोनाका बारेमा जानकारी भए पनि हामीजस्ता धेरै बालबालिका र वृद्धवृद्धाहरूलाई अझै पनि कोरोनाबाट कसरी जोगिने ? लागेमा के हुन्छ ? र सरकारले बारम्बार सेल्फआइसाेलेसन र क्यारेन्टाइनमा बस्न किन आग्रह गर्दै छ भनेर बुझेका छैनन् ।

हुन त सुरुसुरुा मलाई पनि के होला भन्ने लागेकाे थियो तर लकडाउन हुनुपूर्व विद्यालयमा र पछि विभिन्न सामाजिक सञ्जाल, अनलाइन समाचार र टेलिभिजनबाट आइसाेलेसन र क्वारेन्टाइनकाे अर्थ बुझेँ ।

आफूले मात्रै बुझिनँ, परिवारसहित छरछिमेकीहरूलाई समेत बुझाएर हामी घरमै सेल्फ आइसाेलेसनमा बसिरेहका छौँ ।

सेल्फ आइसाेलेसन के हो ?

पहिलो कुरा त सेल्फ आइसाेलेसन भनेको बुझ्न जरुरी हुन्छ । यो भनेको तपाईं आफ्नै घरमा रहेर परिवारका सदस्यभन्दा बाहिरका मानिससँग भेटघाट नगरी घरभित्रै लकडाउनको पालना गरेर बस्नुलाई आइसाेलेसन भनिन्छ ।

सेल्फ आइसाेलेसनमा बस्दा रोग प्रतिरोधात्मक क्षमतायुक्त खानेकुराहरू जस्तै गेडागुडी, अण्डा, कागती, सागपातलगायत खानुपर्छ । त्यति मात्र नभएर समयसमयमा अदुवा, बेसार हालेर तातोपानी खाँदै तातोपानीको वाफ पनि लिनुपर्छ । यसले हामीलाई कोरोनाको संक्रमणबाट बचाउँछ ।

क्वारेन्टाइन के हो ?

क्वारेन्टाइन भनेको चाहिँ कुनै व्यक्ति संक्रमितको भौतिक सम्पर्कमा आएको छ भने उसलाई निश्चित अवधिका लागि अरु व्यक्तिसँग अलग राखी सोही स्थानमा उनीहरूको हेरचाह र स्वास्थ्य जाँच गर्नका लागि व्यवस्था गरिएकाे घरलाई क्वारेन्टाइन भनिन्छ ।

यो पनि पढ्नुहोस

कोरोनाको कहरमा कतै तपाईंमाथि दुर्व्यवहार त भएको छैन ? सोच्नुस् है !

वास्तवमा क्वारेन्टाइनमा बस्ने सबै संक्रमित हुन्छन् भन्ने हुँदैन । संक्रमितलाई भेट्नुभएको छ भने संक्रमणको सम्भावना तपाईंमा पनि हुने हुँदा तपाईंबाट थप अरु व्यक्तिलाई नसरोस् भनेर छुट्टै स्थानमा राखिन्छ । जहाँ तपाईं एक्लै १ हप्तादेखि २ हप्तासम्म बस्नुपर्छ । यदि तपाईंमा कोरोना संक्रमणको पुष्टि भएन भने मात्र तपाईं घरआउन परिवारलाई भेट्न पाउनुहुनेछ ।

यी त भए तपाईं हामीले धेरै सुनेका र तर अझै बुझ्न नसकेका दुई शब्द ।

अब म यो समयलाई कसरी सदुपयोग गर्ने र आत्म अनुशासन कसरी पालना गर्ने भन्नेबारे बताउँछु ।

वास्तवमा मानिसका लागि आत्म अनुशासन र सामाजिक एकता एकदमै महत्त्वपूर्ण कुरा हुन् । यो अहिलेको महामारीको समयमा मात्र नभएर सधैँका लागि महत्त्वपूर्ण नै हुन्छ । तर, अहिलेको यो महामारीमा भने आत्मअनुशासनले चाहिँ औषधिको काम गर्दै आएको छ । याने कि तपाईं आफूलाई र अरुलाई पनि कोरोना भाइरस नसरोस् भन्ने चाहनुहुन्छ भने आत्म अनुशासनलाई पालना गरी लकडाउनमा बस्ने सरकारले भनेको नियम पालना गर्नुपर्ने हुन्छ ।

संक्रमणको उच्च जोखिम भएका व्यक्तिहरूलाई क्वारेन्टाइनमा राखिने हुँदा यो समयमा आत्मअनुशासन एकदमै महत्वपूर्ण हुन्छ । यदि कुनै व्यक्तिले क्वारेन्टाइन बिनाअनुमति छाेडेमा उसले आपराधिक कार्य गरेको मानिन्छ ।

सरकारले अनिवार्य क्वारेन्टाइनमा बस्नुपर्ने व्यक्तिहरू घरमा बसेको निश्चित गर्न स्पट चेक गरिरहेको छ । यो निर्देशन तपाईं/हाम्रो भविष्य सुरक्षित पार्दै स्वस्थ जीवनका लागि हो । त्यसैले सरकारको यस नियमलाई पालना गर्नु तपाईं/हाम्रो कर्तव्य पनि हो । हामी पनि सचेत र जिम्मेवारी नागरिकको हिसाबले सरकारको नियमलाई पालना गर्नुपर्छ ।

घर बस्दाबस्दा वाक्क लाग्यो भने के गर्ने ?

लकडाउनले तपाईं मात्र नभएर विश्वकै अधिकांश मानिस अहिले घरभित्रै बसेका छन् । त्यसैले यो समय हाम्रो परीक्षा हो भनेर हामी संयमित हुनुपर्छ ।

घरमै बसेर लकडाउनलाई सिर्जनशील पनि त बनाउन सकिन्छ । त्यसका लागि हामीले यो अवधिभर घरमा बसेर मनोरञ्जनका क्रियाकलापहरू गर्ने, सीपमूलक कार्यहरू गर्ने, किताबहरू पढ्ने, समाचार सुन्ने गर्नुपर्दछ ।

हामीले नोबेल काेरोना भाइरसबाट बच्न बेलाबेलामा साबुनपानीले हात मुख धोइरहने, स्यानिटाइजरको प्रयोग गर्ने, अति आवश्यक कामका लागि मात्र बाहिर जाने र सामाजिक दूरी कायम गर्नुपर्छ ।

कोरोना भाइरसको महामारी रोक्नका लागि अन्य ठाउँदेखि आएका मानिसहरू अनिवार्य रूपमा १४ दिनसम्म क्वारेन्टाइनमा बस्नुपर्दछ ।

हामीले संकटको समयमा संयमित भएर सरकारले दिएको निर्देशन पालना गरेपछि मात्र विश्वव्यापी रूपमा फैलिएको महामारी अर्थात् नोबेल कोरोना भाइरसको मानवीय क्षतिबाट बच्न सफल हुन्छौँ ।

प्रकाशित मिति: मंगलबार, जेठ २७, २०७७ १७:११