कोरोनाको कहरमा कतै तपाईंमाथि दुर्व्यवहार त भएको छैन ? सोच्नुस् है !

A+ A A-

युथ रिपोर्टर शिलापत्रडटकमले सुरु गरेको युवालक्षित स्तम्भ हो । यो स्तम्भमा दूरदराजमा रहेर सामाजिक जागरण र समाज रुपान्तरणमा भूमिका खेलिरहेका युवावर्गका सूचना संकलन सीप, लेखन कला र सिर्जनात्मक क्षमतालाई प्रोत्साहन गरी उनीहरूका अंकुराउँदै गरेका सिर्जनात्मक चेतलाई प्रोत्साहन गर्ने खालका सामग्री प्रकाशन गर्नेछौँ । यो अभियानमा जोडिएर सहकार्य गर्न शिलापत्रडटकम आह्वान गर्दछ । (सं.)

नमस्ते, म सुमिना बर्देवा । म मकवानपुर हेटौँडामा बस्छु । अहिले विश्वभर फैलिइरहेको कोभिड– १९ अर्थात् कोरोना भाइरसले देशभर नै लकडाउन गरिएको छ । लकडाउनका कारणले अहिले स्थिति सहज छैन ।

हामी अहिलेको अवस्थामा लकडाउनको नियम पालना गर्दै घरमै सुरक्षितसाथ बसिरहेका छौँ । अहिलेको महामारीको समयमा इन्टरनेट चलाउनु हाम्रो दैनिकी नै भइसकेको छ । कोरोना भाइरस एकभन्दा बढी व्यक्तिमा सहजै र तीव्र गतिमा सर्ने भएकाले घरबाट बाहिर निस्किने अवस्था छैन ।

त्यसैले घरमा इन्टरनेट चलाएर दिन बिताउनुको कुनै विकल्प छैन । मजस्ता लाखौँ विद्यार्थीहरू पनि पढ्नुपर्ने समयमा विद्यालय जान नपाउँदा अनि पढ्ने पुस्तकहरू लकडाउनले किन्न नपाउँदा ऊर्जाशील समय इन्टनेटमा झुण्डिएर खेर फाल्नुपरिरहेको छ ।

पछिल्लो समय केही विद्यालयहरूले आफ्ना विद्यार्थीहरूलाई अनलाइन कक्षाबाट पनि पढाइरहेका छन् । यद्यपि यो सबै स्थानमा सहज नहुँदा लकडाउनलाई ऊर्जाशील बनाउन सकिएको छैन ।

लकडाउन भएको पनि ७४ दिन भइसक्यो । अब भने रोगले भन्दा पनि भोकले मरिन्छ कि भनेर सबै बाहिर निस्किन थालिसकेकाे अवस्था छ । मानिसहरूकाे भीडभाड बढेका कारणले गर्दा कोरोनाको महामारीले भयावह स्थिति निम्त्याउने सम्भावना बढ्दै गएकाे छ ।

यो पनि पढ्नुहोस

त्यसपछि मैले पढाइ छाेडेँ

यस्तो अवस्थामा रोगबाट बच्न र भोकबाट बच्न पनि हामीले भाैतिक तथा सामाजिक दूरी कायम गरेरै दैनिक कामहरू गर्नु आवश्यक छ । स्वास्थ्य क्षेत्रका विज्ञहरूकाे सल्लाह पनि हातमा पञ्जा, स्यानिटाइजरको प्रयोग, मास्क र सामाजिक दुरीको पालना गरेर कामकाराबाही अगाडि बढ्नुपर्ने छ ।

हामीले सामाजिक दूरी कायम गरी आफू पनि बच्ने र अरुलाई पनि बचाउनुपर्छ । त्यसैले घरमा बाबा आमा बाहिर जाँदा म उहाँहरूलाई हरेक दिन सावधानी अपनाउन सचेत गराइरहन्छु । र यो मैले मात्र नभएर हरेक परिवारले सचेत भएर सावधानीपूर्वक काम गर्नुपर्दछ ।

वास्तवमा लकडाउन सुरु भएपछि महिला तथा बालाबालिकाहरूमा हुने विभिन्न किसिमका दुर्व्यवहारहरू पनि मौलाउँदै गएको छ । दिनहुँ आफ्नै परिवारका सदस्यबाट बलात्कार भएका समाचारहरू टेलिभिजन पत्रपत्रिकामा भेट्छौँ । त्यसैले लकडाउनको समस्याभन्दा दुर्वव्यवहारको समस्या झनै विकराल बन्दै गएको छ ।

यस्तो अवस्थामा परिवारका अन्य सदस्यलाई कसरी दुर्व्यवहार हुन्छ, यो भनेको के हो र कसरी बच्ने भन्नेबारे जानकारी गराउनुपर्छ । मैले पनि परिवारमा दुर्व्यवहारका बारेमा खुलेर कुराकानी गर्ने गर्दछु । जसले गर्दा मभन्दा साना भाइबहिनीहरूले पनि कस्ता क्रियाकलाप दुर्व्यवहार हुन् भनेर बुझ्छन् ।

वास्तवमा सामान्य दिन हुने हो र घरबाट बाहिर निस्कने वातावरण हुने हो भने म पनि साथीहरूसँग मिलेर दुर्व्यवहारका बारेमा सानासाना भाइबहिनीहरूलाई शिक्षा दिने काम गर्थें । तर, निस्कन नमिले पनि बेलामौकामा सामाजिक सञ्जाल र फोनबाट पनि यसका बारेमा जानकारी दिँदै आएकी छु ।

समाजसेवा गर्नु मेरो पहिलो रोजाइ भएकै कारण समाजमा सही जनचेतना फैलाउन मलाई मनपर्छ । पहिलो सुरुवात घरपरिवारबाट गर्नुपर्छ भनेर अहिले घरपरिवारका सदस्यहरूसँग बसेर यस्ता किसिमका शिक्षामूलक कुराहरू गर्ने गरेको छु ।

अहिलेको महामारीको समयमा मानिसलाई असर पुग्ने खालका समाचार नफैलाउन र मनोवैज्ञानिक असर पर्ने समाचारहरूबाट टाढा रहन र सामाजिक सञ्जालको सही सदुपयोग गर्न अनुरोध गर्दछु ।

आफू संयमित भई आफूले जानेका कुरा अरुलाई बुझाउन, समाजमा हुने गरेका दुर्व्यवहारहरूका बारेमा खुलेर विरोध गर्दै यस्ता कार्यहरूबाट समाज टाढा रहोस् भन्ने चाहन्छु । साथै, भविष्यमा यस्ता किसिमका कार्यहरू रोक्न पहल गर्ने अठोटसमेत लिएकी छु ।

प्रकाशित मिति: सोमबार, जेठ २६, २०७७ १८:२४