आइसोलेसनमा पनि रोकिएन पत्रकारको कलम

A+ A A-

कोही नाच्छन् । कोही गाउँछन् । कोही भलाकुसरी गर्छन् । कोही आफ्नै काममा ब्यस्त । सर्लाहीको सन्त अल्पमाई रामनारायण यादव नर्सिङ कलेजको आइसोलेसनमा रहेका कोरोना भाइरस संक्रमितको दिनचर्या यसरी नै बित्छ ।

त्यहीँ आइसोलेसनमा छन्- सर्लाहीकी पत्रकार बन्दना झा पनि । कोरोना भाइरस पोजिटिभ देखिएपछि उनलाई आइसोलेसनमा राखिएको हो ।

तर, उनी आइसोलेसनबाटै आफ्नो काम गरिरहेकी छन् । उनको कलम रोकिएको छैन । आफ्नो धर्म उनले आइसोलेसनबाटै निभाइरहेकी छन् ।

कहाँ के भइरहेको छ ? सर्लाहीमा कोरोना भाइरसको अवस्था के छ ? सचेतानाका लागि कस्ता उपाय अपनाउने ? के गर्दा कोरोनाबाट जोगिन सकिन्छ ? उनी यही विषयमा समाचार लेखिरहेकी थिइन्, लेखिरहेकी छन् पनि । सँगै टोल छरछिमेकमा पनि कोरोनाबाट जोगिने उपाय सिकाइरहेकी थिइन् ।

लकडाउनपछि उनले घरमै इन्टरनेट जोडिन् । घरबाटै उनले काम गर्न थालिन् । न उनी कतै गएकी थिइन्, न त उनको टोलमा बाहिरका मान्छे नै आएका थिए ।

उनलाई कोरोना पोजिटिभ देखियो तर कोरोनाको लक्षण कति पनि देखिएको छैन । टोलको नेतृत्व नै उनले गरेकी थिइन् । बाहिरको मान्छेलाई पनि आउन नदिने, टोलका मान्छेलाई पनि बाहिर जान नदिने । लकडाउनको पालना गर्ने ।

‘यसबीचमा फिल्डमा पनि गएको छैन । घरबाटै काम गरेकी हुँ । टोलको मान्छे पनि बाहिर जानुभएको छैन । बाहिरका मान्छे पनि कोही आउनुभएको छैन’, बन्दना भन्छिन्, ‘कसरी पोजिटिभ देखियो, म नै अचम्ममा परेकी छु ।’

बाहिरका मान्छे कोही नआउने र आफूहरू पनि नजाने भएपछि टोलमै बसेर छलफल र समय पास गर्न गेम खेल्ने गरेको उनी बताउँछिन् ।

‘टोलमा कोही संक्रमित थिएनन् । एकै ठाउँमा बस्ने, गफ गर्ने गरेका थियौँ । बाहिर तरकारी किन्न बजारमा समेत पाइला टेकेको छैन । भारततिरबाट पनि कोही आउनुभएको छैन’, बन्दना भन्छिन् ।

उनी घरमै थिइन् । पत्रकार महासंघ सर्लाही शाखाका अध्यक्ष विश्वनाथ ठाकुरको फोन आयो । ठाकुरले भने, ‘सबै साथीको पीसीआर गर्नुपर्‍यो । तपाईं पनि आउनुहोस् ।’

त्यसपछि उनी पनि निर्धक्क भएर परीक्षणका लागि गइन् । कतै गएको छैन, रिपोर्ट नेगेटिभ आउँछ भन्नेमा उनी ढुक्क थिइन् । १२ जेठमा उनीसहित २० जनाको परीक्षणका लागि स्वाब झिकियो । १६ गते रिपोर्ट आयो । सर्लाही कोरोना रिपोर्टिङ ग्रुप छ । त्यहीँ प्रमुख जिल्ला अधिकारीले ग्रुपमा नेगेटिभ रिपोर्ट आएकाको नाम हाले । त्यो लिस्टमा बन्दनाले आफ्नो नाम देखिनन् ।

त्यसपछि उनी झसङ्ग भइन् । उनले पत्रकार महासंघ शाखा र प्रमुख जिल्ला अधिकारीलाई फोन गरेर आफ्नो रिपोर्ट किन नआएको भनेर सोधिन् ।

समाचारमा आयो- सर्लाहीमा ४ जना संक्रमित फेला । को हुन् ती ४ जना ? उनी बुझ्न थालिन् । नाम भन्न उनले प्रमुख जिल्ला अधिकारीलाई अनुराेध गरिन् ।

साँझ उनलाई फोन आयो- 'तपाईं सुरक्षित बस्नुहोस् । दुःखद खबर छ । ४ जनामध्येमा तपाईंको पनि नाउँ छ ।'

‘सबै साथीको नेगेटिभ आयो, मेरो पोजिटिभ आयो । कतै प्राविधिक त्रुटि भएको जस्तो लाग्छ’, उनी भन्छिन्, ‘राति नै म आइसोलेनमा आएको । स्वास्थ्यमा कुनै समस्या नै छैन ।’

उनले आइसोलेसनबाटै आफ्नो काम गरिरहेकी छन् ।

‘ल्यापटप सँगै ल्याएकी छु’, बन्दना भन्छिन्, ‘घरमा बसे पनि समाचार लेख्थेँ । यहाँ पनि लेखिरहेकी छु ।’

आइसोलेसनमा रहेका अरू संक्रमितहरूबाट नै कोरोना भाइरस सर्ने जोखिम रहेको उनी बताउँछिन् ।

‘मेरा लागि त छुट्टै आइसोलेसन छ तर कुनै कोठामा ३-४ जना पनि बस्नुभएको रहेछ । सबै संक्रमित एकै ठाउँमा बस्दा झन् जोखिम रहेछ । संक्रमितहरू पनि आफ्नो कोठामा नबस्ने । हलमा भेला भएर नाच्ने, गाउने, गफ गर्ने गर्नुहुन्छ । सबै क्रियाकलाप आफ्नै कोठामा गर्नुपर्ने हो ।’

आइसोलेसनमा व्यवस्थापन फितलो भएको उनले गुनासो गरिन् ।

‘अरूलाई नसरोस् भनेर आइसोलेनमा राखिएको हो । संक्रमित यताउता डुलिरहनुहुन्छ । व्यवस्थापन र रेखदेखमा डाक्टर, नर्सको उपस्थिति पनि छैन । संक्रमितबाट नै सर्ने डर भयो बरु घरमै सुरक्षित थियो’, उनी भन्छिन् ।

कोरोना भाइरसको लक्षण नभएकाले अर्को रिपोर्ट नेगेटिभ आउनेमा उनी ढुक्क छन् । ‘मलाई कुनै लक्षण पनि छैन । स्वास्थ्यमा समस्या पनि छैन । झन् बलियो भएको महसुस गरेको छु । अर्को रिपोर्ट नेगेटिभ आउनेमा ढुक्क छु’, बन्दना भन्छिन् ।