कोरोना जितेकी ७ वर्षीया बालिका भन्छिन् : डाक्टर बनेर सेवा गर्छु

A+ A A-

बाँकेको नेपालगञ्ज खजुरास्थित क्यान्सर अस्पताल शुक्रबार रंगिन बन्न पुग्यो । ६० वर्षदेखि ७ वर्षीया बालिकासम्म कोरोना भाइरसलाई जितेर घर फर्किन लागेको दृश्यले सबैलाई खुसी बनायो । कोरोना जितेका २१ जनालाई फूलमाला र खादा ओढाएर अस्पतालबाट बिदाइ गरिएको थियो ।

केही बेरअघिसम्मको सन्नाटामा रहेको जोलाहनपुरूवामा खुसियाली छायो । २० दिनपछि उनीहरू आफ्नो टोलमा पुग्दा टोलवासीले स्वागत गरे । २१ चैतमा नेपालगन्ज आतंकित भएको थियो । तर, उनीहरू निको भएर घर फर्किंदा आशासँगै खुसीको दियो पनि बल्याे । सबैको केन्द्रमा परेकी थिइन्– ७ वर्षीया बालिका । बालिकाका बुबालाई पनि सुरूमा पोजिटिभ देखिएको थियो । छोरीसँगै उनी पनि निको भएर घर फर्किए ।

छोरी र उनको २० दिने आइसोलेसन बसाइको अनुभव हामीसँग यसरी साटे:

केही बेर अगाडि घर आइपुगेका हौँ । छोरी पल्लो कोठामा छिन् । म ओल्लो कोठामा छु । २० दिनपछि घर फर्किंदा टोलमा नै खुसियाली छाएको छ । टोलमा अहिलेसम्म यस्तो स्वागत भएको थिएन । सबैले स्वागत गर्नुभयो । घरमा मात्र होइन, टोल नै आज उज्यालो भएको छ । यो क्षण मेरा लागि सबैभन्दा खुसीको क्षण हो ।

कोरोनालाई हराएर आएका छौँ । सुरूमा पनि स्वस्थ थियौँ । अहिले पनि स्वस्थ नै छौँ । अस्पताल बस्दा पनि केही समस्या भएन । औषधि पनि खानु परेन । सुरूमा नभएका हल्ला पनि चले । हामी इन्डिया गएका पनि थिएनौँ । लकडाउनको पालना गरेर नै बसेका थियौँ । परीक्षण गर्दा कसरी पोजिटिभ देखियो । पोजिटिभ देखिएपछि त अस्पताल जानै पर्‍यो नि ।

अस्पतालमा बस्दा कर्मचारी, डाक्टर र नर्स सबैबाट सहयोग पायौँ । हामीले पनि सहयोग गर्‍यौँ । १/१ मिटरकाे दूरी बनाएर बसेका थियौँ । हामीले आफ्नो पूजापाठ पनि गर्न पाएका थियौँ । २० दिन बस्दा छोरीले ड्रोइङ सिकेर आएकी छिन् । छोरीले अस्पतालमा पढ्ने, खेल्ने, ड्रोइङ गर्ने गर्थिन् । नर्सको गुडिया खेलाएर बस्थिन् । डाक्टर बन्छु भनेकी छिन् । एक छाक खाएर भए पनि छोरीलाई पढाउँछु । केही कमी हुन दिन्नँ । अब छोरीको इच्छा पूरा गर्ने सपना छ मेराे ।

अन्त्यमा के भन्छु भने यो महामारी यहाँ मात्र होइन, विश्वमा नै छ । त्यसैले जो जहाँ छौँ, त्यहीँ बसौँ । लकडाउनको पालना गरौँ । आफ्नै घरमा बसौँ । कतै नजाऔँ ।

तस्बिर :सामाजिक सञ्जाल