संसारकै सम्पन्न शहरमा थाङ्नाको मास्क, अस्पतालमा बेडको अभाव

A+ A A-

अमेरिकाको समृद्ध राज्य न्यूयोर्क यतिबेला इतिहासको सबैभन्दा खतरनाक महामारीसँग जुधिरहेको छ । कोरोना भाइरसबाट शुक्रबार मात्र ८५ न्यूयोर्कवासीले ज्यान गुमाएका छन् ।

अहिलेसम्म न्यूयोर्कमा ४० हजार मानिस कोरोना संक्रमित भएको पाइएको छ ।

हालत यति खराब भएको छ कि स्थानीय प्रशासनको स्थिति नियन्त्रणमा लिन आर्मी गुहार्नु परेको छ ।

सयभन्दा बढी अर्बपति रहेको यो शहरमा यति धेरै बिरामी छन् कि निकै सुविधासम्पन्न अस्पतालमा पनि बेडको कमी भएको छ । केही अस्पतालले त एक भेन्टिलेटरमा २ बिरामी राखेका छन् ।

एक डाक्टर मार्को गरोनले ट्विटरमा यस्तै भेन्टिलेटरको तस्वीर पोस्ट गर्दै लेखेका छन्, ‘अब डाक्टरहरूका सामुन्ने दुविधा छ, भेन्टिलेटर सुविधा कसलाई दिने, कसलाई नदिने । जबकि, सत्य यो हो भेन्टिलेटर सबैलाई आवश्यक छ ।’

अबका दिनमा स्थिति अझै गम्भीर हुने सम्भावना छ । यही कारणले फूड र ड्रग्स प्रशासनले आपतकालको स्थिति प्रयोग गरिने उपकरण ‘वेस्पर’लाई कोरोना बिरामीका लागि उपलब्ध गराउन थालेको छ । यो उपकरणमार्फत एक भेन्टिलेटरले ४ बिरामीलाई सास लिन मद्दत गर्छ ।

अस्पतालमा सुविधाको कमी

अभाव भेन्टिलेटरमा मात्र सीमित छैन । अस्पतालमा बेड, डाक्टर, नर्स र मूलभूत उपकरणको चरम अभाव छ । मेडिकल सप्लाईको कमीका कारण स्वास्थ्य कर्मचारीले फेसमास्क रिसाइकल गरेर प्रयोग गर्नुपरेको छ ।

कतिपयले त ‘गार्वेज ब्याग’लाई मास्क बनाएर प्रयोग गरिरहेका छन् । यहाँसम्म कि, न्यूयोर्कका अस्पतालमा जहाँ खाली ठाउँ देखिन्छ, त्यहाँ मानिसहरू ओछ्यान लगाउन थालिहाल्छन् । न्यूयोर्क स्टेट नर्स एसोसिएसनका डाइरेक्टर पेट केनले स्थिति शब्दमा बयान गर्न नसक्ने बताए । अस्पतालको कुनाकुनामा बिरामीका लागि ओछ्यान लगाइएको छ । अस्पतालको आसपास सार्वजनिक स्थानको समेत प्रयोग गर्ने कोसिस भइरहेको छ ताकि बढीभन्दा बढी मान्छेको ज्यान बचाउन सकियोस् ।

बुधबार र शुक्रबारका बीच कोरोना भाइरसबाट मृत्यु हुनेको संख्या ३० प्रतिशत नजिक पुगेको छ ।

५५ प्रतिशत बिरामी ५० वर्षभन्दा कम उमेरका

एक आँकडाले न्यूयोर्क शहरका मानिसमा त्रास फैलाइदिएको छ । ५५ प्रतिशत बिरामी ५० वर्षभन्दा कम उमेरका छन् । यद्यपि, मृत्यु हुनेमा भने धेरैजसो बिरामी ६० वर्षभन्दा माथिका छन् । यसमा डाइबिटिज, क्यान्सरजस्ता रोगका बिरामी पनि सामेल छन् ।

१८ देखि ४४ वर्षका १६ जनाको मृत्यु भएको छ । चिकित्सकको कमीलाई मध्यनजर गर्दै न्यूयोर्क युनिभर्सिटीको मेडिकल कलेजले आफ्ना विद्यार्थीलाई समयभन्दा ३ महिनाअघि नै पास गरिदिने निर्णय गरेको छ ।

यसका बाबजुद यी विद्यार्थी १ जुलाइदेखि मात्र उपचार सुरू गर्न पाउँछन् । सरकार पनि कन्वेसन सेन्टर, अडिटोरियम र युनिभर्सिटी क्याम्पसजस्ता स्थानलाई अस्पतालमा परिणत गर्नका लागि बाध्य भएको छ । ज्याकबस्थित जबिटास कन्वेसन सेन्टर जहाँ हरेक वर्ष यो समय न्यूयोर्क अटो सो हुन्थ्यो, त्यसलाई सरकारले अस्पतालमा परिणत गरिदिएको छ । आर्मीले यहाँ १ हजार शय्याको अस्पताल बनाउन सहयोग गरिरहेको छ ।

न्युयोर्कका मेयर बिल डे ब्लासियोले न्यूयोर्क जेलबाट ७० वर्षभन्दा माथिका यस्ता कैदी जसका विरुद्ध कुनै जघन्य मामिला थिएन, उनीहरूलाई रिहा गर्न थालिएको बताएका छन् ।

ट्विटरमा मौली ग्रिफर्ड नामका एक अधिवक्ताले शुक्रबार एक ग्राफ पोस्ट गरेका छन्, जसबाट थाहा हुन्छ कि प्रति हजार व्यक्ति कोरोेना भाइरसका बिरामीको अनुपात न्यूयोर्कका जेलमा सबैभन्दा तीव्र रूपमा बढेको छ । शहरका दमकल कर्मचारी पनि यो भाइरसको चपेटामा छन् ।

३०० प्रहरी अधिकारी पनि कोरोना संक्रमित

१ सय ७० दमकलकर्मी र ट्रान्सपोर्ट सेक्टरमा २ सयभन्दा धेरै कर्मचारीमा कोरोना संक्रमण पुष्टि भएको छ । शुक्रबार मात्रै न्यूयोर्क पुलिस विभागका ३ हजार ६ सय ७४ अधिकारी बिमारका कारण बिदामा थिए र यीमध्ये ३ सयमा कोरोना पोजिटिभ पाइएको छ । (दैनिक भास्करबाट नवराज कुँवरले गरेको भावानुवाद)

याे पनि...

महावीर पुनले बनाएको पीपीई डाक्टरले भोलि पाउने

डाक्टरले लगाउने पीपीई बनाउन महावीर पुनले पाए स्वीकृति

कोरोना जाँच गर्दा डाक्टरले लगाउने ‘पीपीई’ ड्रेस बनाउँदै महावीर पुन

घरबाटै बालबालिकालाई यसरी पढाउन सकिन्छ, यस्ता छन् पाठ्यसामग्री

कोरोना जोखिम : ७४ लाख बालबालिकालाई कसरी जोगाउने ?

डाक्टरले लगाउने पीपीई बनाउन महावीर पुनले पाए स्वीकृति

कोरोना जाँच गर्दा डाक्टरले लगाउने ‘पीपीई’ ड्रेस बनाउँदै महावीर पुन

टेकुका चिकित्सक जसले परिवार बिर्सेर कोरोना आशंकित मात्रै हेरिरहे

खाेकीका बिरामीले ४ वटा अस्पताल चहार्दा पनि पाएनन् उपचार

कोरोनासँग लड्न के खाने ? यी खानेकुराले बढाउँछ इम्युनिटी पावर

कोरोना जित्न यस्ता छन् मनोविद् डा. गंगा पाठकका सुझाव