प्रधानमन्त्रीले किन्छु भनेको कम्पनीको आइपीओ खुल्दै, कति शेयर किन्लान् ?

A+ A A-

प्रधानमन्त्री केपी शर्मा ओलीले शेयर किन्छु भनेको ‘जनताको जलविद्युत कार्यक्रम’ अन्तरगतको पहिलो कम्पनीको साधारण शेयर (आइपीओ) खुल्ला हुने भएको छ ।

चैत ७ गतेदेखि सो कार्यक्रम अन्तरगत पहिलो कम्पनीको रुपमा त्रिशुली जलविद्युत कम्पनीको ३७ लाख ५ हजार कित्ता साधारण शेयर विक्री खुल्ला गर्न धितोपत्र बोर्डले अनुमति दिएको छ ।

कम्पनीको शेयर कम्तिमा एक सय कित्ता र अधिकतम १० हजार कित्ता शेयर किन्नको लागि आवेदन दिन पाइनेछ । तर, आफूले किन्न चाहेको शेयरको शतप्रतिशत रकम नै अहिले बुझाउनु पर्ने भने होइन । एक सय कित्ता शेयर किन्न चाहने व्यक्तिले अहिले एक हजार रुपैयाँ बुझाए हुनेछ ।

रसुवा र नुवाकोट जिल्लामा पर्ने त्रिशुली नदिमा बन्न लागेको सो आयोजनाको १० प्रतिशत शेयर आयोजना प्रभावित स्थानीयलाई दिइनेछ । यस्तै रसुवा र नुवाकोटका स्थानीय तहहरुले ५ प्रतिशत शेयर पाउने छन् । ५ प्रतिशत शेयर जलविद्युत आयोजनामा लगानी गर्ने उद्देश्यले आयोजना रहेको नुवाकोट र रसुवा जिल्लाका स्थानीय वासिन्दाले स्थापना गरेका कम्पनीले पाउनेछन् ।

यस्तै ५ प्रतिशत शेयर विद्युत उत्पादन गर्ने सम्झौता भएको समय २०६८ देखि शेयर निस्कासन गरेको समयसम्ममा नेपाल विद्युत प्राधिकरण र नेपाल टेलिकममा कार्यरत स्थायी कर्मचारीहरुले पाउने छन् । त्रिशुली जलविद्युत कम्पनीको प्रमोटरहरु नेपाल विद्युत प्राधिकरण र नेपाल टेलिकमले ३०/३० प्रतिशतका दरले ६० प्रतिशत लगानी गरेका छन् । बाँकी रहेको १५ प्रतिशत शेयर कम्पनीले सर्बसाधारणलाई विक्री गर्न लागेको हो ।

कति शेयर किन्लान् प्रधानमन्त्री ओलीले ?
यो कार्यक्रम अन्तरगत आएको आइपिओमा आफूले पनि लगानी गर्ने प्रधानमन्त्री ओलीले यसअघि नै सार्वजनिक घोषणा गरिसकेका छन् । तर, प्रधानमन्त्री ओलीले प्रधानमन्त्रीको हैसियतमा नभइ व्यक्तिगत हैसियतमा शेयर लगानी गर्नेछन् ।

प्रधानमन्त्री ओलीले अति महत्व दिएको यो कार्यक्रममा उनले व्यक्तिगत हैसियतमा शेयर लगानी गर्ने हुनाले यसबारेमा उनी स्वयमलाई मात्रै थाहा छ ।

‘व्यक्तिगत रुपमा प्रधानमन्त्रीज्यूले शेयर किन्ने हो, कति रुपैयाँको किन्ने भन्ने कुरा उहाँको स्वविबेकको कुरा हो, आमनागरिकलाई सकारात्मक सन्देश प्रवाह गर्नको लागि उहाँले शेयर किन्नुहुने भएकोले कति रुपैयाँ बराबरको शेयर किन्नुहोला भनेर अनुमान गर्न सकिदैन, उहाँले व्यक्तिगत फाइदाको लागि शेयर किन्न लाग्नु भएको होइन,’ प्रधानमन्त्री ओली निकट स्रोतले बतायो ।