मेलम्चीको नयाँ भाका– असार मसान्त !

A+ A A-

२५ वर्षदेखि काठमाडौंले व्यग्र प्रतीक्षा गरिरहेको मेलम्चीको पानी अव असारमा ल्याउने नयाँ सरकारी प्रतिवद्धता आएको छ ।

खानेपानी मन्त्री बिना मगरले आज श्वेतपत्रमार्फत असार मसान्तभित्रमा मेलम्चीको पानी काठमाडौं ल्याई जनतामा देखिएको निराशाको अन्त्य गर्ने प्रतिवद्धता जनाएकी हुन् ।

मन्त्री मगरले असार मसान्तसम्म मेलम्चीको काम सम्पन्न भई काठमाडौंमा पानी ल्याइसक्ने बताएकी छन् ।

‘हामीले असार मसान्तभित्रमा काम सम्पन्न गर्ने गरी मेलम्ची आयोजना, ठेकेदार कम्पनी, कन्सल्ट्यान्टलगायतका सम्पूर्ण टिमहरु लागिराखेका छौँ र यसले स्वाभाविक रुपमा धेरै पटक, पटकपटक पार्दै आएको निराशाको अन्त्यको हामी निकटमा छौँ भन्ने भाव आजको श्वेतपत्रको हो, ’ मगरले भनिन् ।

उनले सुन्दरीजल पोर्टलदेखि पानी प्रशोधन केन्द्र तथा बागमती नदीसम्मको आयोजनाको कामसमेत असारसम्ममा सम्पन्न गर्ने गरी काम भइराखेको जानकारी दिइन् ।

कार्यक्रममा मेलम्ची खानेपानी आयोजना विकास समितिका कार्यकारी निर्देशक तिरेशप्रसाद खत्रीले ड्याम असार मसान्तसम्ममा सम्पन्न नहुने भएकाले तत्कालका लागि अल्टरनेट ड्यामबाट पानी ल्याउने व्यवस्था गरिएको बताए ।

उनले सुरुङ सम्पन्न तथा अस्थाई रूपमा पानी डाइभर्सनका लागि नयाँ नियुक्त निर्माण व्यवसायी सिनो हाइड्रोबाट भएको साइट व्यवस्थापन तथा निर्माण कार्य सन्तोषजनक रहेकाले २/३ महिनापहिले नै काम सक्ने विश्वास लिएको बताए ।

आयोजनाको हालसम्म ९४ प्रतिशत भौतिक प्रगति भएको र अहिलेसम्म २७ अर्ब ९४ करोड रुपैयाँ खर्च भइसकेको पनि कार्यकारी निर्देशक खत्रीले बताए ।

मेलम्चीको काममा इटालियन कम्पनी सीएमसीले छाडेपछि सरकारले चिनियाँ कम्पनी सिनो हाइड्रोसँग गत असोजमा एक वर्षभित्रमा काम सम्पन्न गर्नेगरी सम्झौता गरेको थियो ।

काम बीचैमा छाडेर हिँडेको सीएमसीले स्थानीय श्रमिक तथा सव कन्ट्रयाक्टरको भुक्तानी नदिएका कारण समस्या र अवरोध खेप्नुपरेको खत्रीले बताए ।

पछिल्लो समय सरकारले कामदारको ज्यालाबापत २ करोड ९६ लाख रुपैयाँ भुक्तानी गरिसकेको छ भने सीएमसीआवद्ध स्थानीय आपूर्तिकर्तालगायतको भुक्तानीका लागि मन्त्रालयबाट सहसचिवको संयोजकत्वमा गठित ६ सदस्यीय प्राविधिक समितिबाट अध्ययन भइरहेको साे अवसरमा जानकारी दिइयाे ।

प्रकाशित मिति: बिहीबार, फागुन १, २०७६ १८:५७