मन्त्री भट्टराई भन्छन्, 'विवाद सल्टियो, अब निजगढमा विमानस्थल बन्छ'

A+ A A-

संस्कृति, पर्यटन तथा नागरिक उड्डयनमन्त्री योगेश भट्टराईले बारामा प्रस्तावित दोस्रो अन्तर्राष्ट्रिय विमानस्थलसम्बन्धी विवादहरू समाधान भएको दाबी गरेका छन् । बुधबार राजधानीमा देशभरका विमानस्थलहरूको अवस्था र कार्य प्रगतिबारे जानकारी दिन आयोजित कार्यक्रममा मन्त्री भट्टराईले निजगढ विमानस्थलसम्बन्धी विवाद सल्टिएको दाबी गरेका हुन् ।

यस कारण बन्नैपर्छ निजगढ विमानस्थल

२४ लाख रुख काटिने विषय सार्वजनिक भएपछि पर्यावरणवादीले सर्वोच्चमा रिट हालेका थिए । उक्त रिटमाथि सुनुवाइ गर्दै सर्वोच्चले २० मंसिरमा रुख नकाट्न अन्तरिम आदेश दिएको थियो । दोस्रो अन्तर्राष्ट्रिय विमानस्थल आयोजनाले १ लाख २८ हजार रुख मात्रै काट्दा विमानस्थल तयार हुने जनाएको छ ।

मन्त्री भट्टराईले पर्यावरणवादीको चित्त बुझ्ने गरी सरकारले रुख कटान र वृक्षरोपणको योजना बनाएको बताए । वन तथा वातावरण मन्त्रालयले सम्बन्धित विभागलाई विमानस्थल भित्रपर्ने रुखहरूको गणना गर्न पत्र पठाइसकेको छ , मन्त्री भट्टराईले भने, पहिला विमानस्थलको १९ सय हेक्टर क्षेत्रफलभित्र पर्ने रुख बोटबिरुवाको यकिन विवरण प्राप्त भएपछि काम अघि बढ्छ । यसमा तीनै तहका सरकारको आपसी समन्वय र सहकार्यसमेत रहनेछ ।

प्रस्तावित विमानस्थल क्षेत्रभित्र पर्ने टाँगिया वस्ती र काठगाउँ स्थानान्तरणका लागि पनि काम भइरहेको मन्त्री भट्टराईको भनाइ छ ।

पूर्व–पश्चिम राजमार्गबाट दक्षिणतिर वन क्षेत्रमा रहेको यस बस्तीमा १ हजार ४ सय ७६ घरधुरी छन् । टाँगिया बस्तीमा धावन मार्ग बनाउने सरकारको योजना छ । यद्यपि, त्यहाँ बसिरहेका नागरिकको स्थानान्तरणको विषयमा निर्णय नहुँदा काम अघि बढ्न सकेको छैन । मन्त्री भट्टराईले टाँगिया बस्ती व्यवस्थापनका लागि छिट्टै आवश्यक निर्णय हुने बताए ।

विमानस्थल बनाउन रूख नभएको मरुभूमि कहाँ छ श्रीमान् ?

उनले अब कुनै पनि बाहानामा निजगढ विमानस्थलको काम नरोकिने दोहोर्‍याए । यो विमानस्थल कुनै समूहका लागि मात्रै नभएर समग्र मुलुकका लागि बन्न लागेको हो , मन्त्री भट्टराईले भने, विमानस्थल बनेपछि नेपालमा वार्षिक एक करोड पर्यटक भित्रिन्छन् ।

निजगढ विमानस्थल निर्माणमा बल्ल तात्यो सरकार

राष्ट्रिय गौरवको आयोजना भएकाले पनि यसमा अब कुनै बाहानाबाजी नचल्ने मन्त्री भट्टराईले बताए ।

‘यो विमानस्थल देशकै गौरवको आयोजना हो । नेपालको अर्थतन्त्रमा यसको योगदान उच्च रहनेछ, यसलाई गमे चेञ्जरका रूपमा हेरिएको छ । त्यसैले अब निजगढ विमानस्थल निर्माणले गति लिनेछ , उनले भने ।

यसअघि २ पुसमा मन्त्री भट्टराईको संयोजकत्वमा रहेको निजगढ विमानस्थल सम्बन्धमा गठित उच्च स्तरीय सहजीकरण समितिले वन मन्त्रालयसहित मातहतका निकायलाई विवाद समाधानका लागि काम गर्न निर्देशन दिएको थियो ।