४२ पोलमा स्वचालित सौर्य बत्ती जडान

A+ A A-

कृष्णपुर नगरपालिकाका सार्वजनिक स्थानमा सौर्य बत्ती जडान गरिएकाे छ । उज्यालो मेयर कार्यक्रमअन्तर्गत नगरपालिका क्षेत्रका बजार क्षेत्र चोक, चौराह र सार्वजनिक स्थलमा गरी ४२ पोलमा स्वचालित प्रविधिमा आधारित सौर्य बत्ती जडान गरिएकाे हाे ।

सौर्य बत्ती जडान गर्न नगरपालिकाले आर्थिक वर्ष २०७५/७६ मा ४० लाखभन्दा बढी रकम खर्चेको छ । पूर्वपश्चिम राजमार्गका सार्वजनिक स्थानमा ३९ र वडा नं ७ को कलुवापुर बजार क्षेत्रमा तीन सौर्य बत्ती जडान गरिएको नगर प्रमुख कर्णबहादुर हमालले बताए ।

उनका अनुसार सौर्य बत्ती जडान भएपछि पूर्वपश्चिम राजमार्ग क्षेत्रमा राति हुने सवारी दुर्घटनाका घटनामा कमी आउनुका साथै अवान्छित क्रियाकलाप पनि नियन्त्रणमा आएको छ नगर प्रमुख हमालकाे भनाइ छ ।

स्थानीय बासिन्दालाई बत्तीकै कारण आवतजावत गर्नसमेत सहज भएको छ । आव २०७६/७७ मा नगरपालिकाका सबै वडामा सेन्सरयुक्त स्वचालित बत्तीको व्यवस्था गर्न योजना तयार गरिएको छ ।

योजनाअनुसार नगरपालिकाभित्रका सबै सार्वजनिक क्षेत्र, सुरक्षाका दृष्टिकोणले महत्त्वपूर्ण क्षेत्र, चोक, चौराह र बजार क्षेत्रमा बत्ती जडान गर्ने कार्यलाई अगाडि बढाइने नगरप्रमुख हमालले जानकारी दिए ।

सेन्सरयुक्त बत्ती दिउँसो आफैं निभ्ने र राति हुनासाथ आफैं जल्ने हुन्छ । बत्ती बाल्न र निभाउन कसैको जरुरत पर्दैन । स्वचालित सेन्सरयुक्त बत्ती जडानका लागि २० लाख रुपैयाँ बजेट विनियोजन गरिएको छ ।

नगरपालिकालाई उज्यालो नगरपालिकाका रूपमा चिनाउन कार्य अगाडि बढाइएको नगरप्रमुख हमालले बताए ।

वायोग्यासमा अनुदान

वनमाथिको निर्भरता हटाई वातावरण संरक्षणमा टेवा पुर्‍याउनका लागि नगरपालिकाले वायोग्यास निर्माण गर्ने बासिन्दालाई अनुदान रकम प्रदान गरेको छ ।

गत आवमा वायोग्यास निर्माण गर्नेलाई २५ हजार रुपैयाँका दरले अनुदान रकम प्रदान गरिएको नगरप्रमुख हमालले बताए । उनका अनुसार गत आवमा वायोग्यासमा अनुदान मात्रै १२ लाख रुपैयाँ रकम प्रदान गरिएको छ । सोबाट ४८ परिवार लाभान्वित भएकाे नगर प्रमुख कर्णबहादुर हमालले जानकारी दिए । रासस

प्रकाशित मिति: शुक्रबार, माघ ३, २०७६ १४:५१