दैनिक पाँच अटो रिक्सा ट्राफिक कारबाहीमा, ३ लाख राजस्व संकलन

A+ A A-

सुर्खेतको वीरेन्द्रनगरमा सञ्चालनमा आएका करिब १७ सय अटो रिक्सामध्ये दैनिक पाँचवटा अटो रिक्सा ट्राफिक कारबाहीमा पर्ने गरेका छन् । जिल्ला ट्राफिक प्रहरी कार्यालयको तथ्यांकअनुसार कात्तिक महिनादेखि पुससम्म ३ सय ९७ अटो रिक्सा ट्राफिक प्रहरी कारबाहीमा परेका छन् ।

जिल्ला ट्राफिक प्रहरी कार्यालय सुर्खेतका प्रमुख उदयसिंह सिजापतिले सुर्खेतमा करिब १७ सयभन्दा बढी अटो रिक्सा रहेको र तिनीहरूमध्ये अधिकांश अटो रिक्साचालकसँग सवारीचालक अनुमतिपत्र नभएको बताए ।

‘सवारीचालक अनुमतिपत्र नभएका धेरै चालकमाथि कारबाही गरेका छौं,’ उनले भने, ‘कैयौं अटो रिक्साले ट्राफिक नियमको उल्लघंन गरेकाले कारबाहीमा परेका छन् ।’

ट्राफिक प्रहरी कार्यालय सुर्खेत प्रमुख सिजापतिले १५ देखि २२ प्रतिशत अटो रिक्साले मात्रै सवारीचालक अनुमतिपत्र लिएको बताए ।

‘सवारी चलाउनका लागि अनुमतिपत्र अनिवार्य लिनैपर्छ । नलिए यो गैरकानुनी अवैधानिक हुन्छ । त्यो देखे हामीले कारबाही गर्छौं । यसलाई रोक्नका लागि सुर्खेतबाट लाइसेन्स वितरण भए कम हुन्छ होला,’ उनले भने, ‘मापसे गरेर चलाएका कारणले गर्दा पनि धेरै कारबाहीमा परेका छन् ।’

५ सय ७४ अटो रिक्सा मात्र पञ्जीकरण

वीरेन्द्रनगरमा सञ्चालनमा आएका अटो रिक्सामध्ये हालसम्म ५ सय ७४ वटा मात्रै दर्ता भएर सञ्चालन आएका छन् । वीरेन्द्रनगर नगरपालिकाको उद्योग नियमन शाखाका अनुुसार हालसम्म ५ सय ७४ वटा अटो रिक्सा शाखामा दर्ता भएका छन् । त्यसमध्येका २ सय ६५ वटा अटोले मात्रै पञ्जिकृत भएर रुट परमिट लिएका छन् ।

पञ्जिकृतका लागि लाइसेन्स चाहिने र लाइसेन्स भए मात्रै रुट परमिट दिइने भएकाले अधिंकाश अटो रिक्साले रुट परमिटविना सञ्चालन भइरहेको वीरेन्द्रनगर नगरपालिका उद्योग नियमन शाखामा प्रमुख ईन्द्रबहादुर थापा बताए ।

‘नगरपालिकाले पटक–पटक अटो रिक्सा दर्ता र रुट परमिटका लागि जानकारी गराए पनि अटो व्यवसायीले अटेरी गर्ने गरेका छन्,’ उनले भने, ‘अहिले पनि कैयौं अटो रिक्सा रुट प्रमिट र दर्ताविना नै सञ्चालनमा आएका छन् ।’