कास्कीमा बढ्दो लागुऔषध कारोबार

A+ A A-

पर्यटकीय नगरी पोखरामा पूर्वाधार विकास मात्रै होइन, आपराधिक गतिविधि पनि मौलाउँदै गएको छ । लागुऔषध कारोबारी र विभिन्न आपराधिक क्रियाकलापमा संलग्न व्यक्तिहरूको ट्रान्जिट पोइन्ट पोखरा बन्न थालेको छ ।

यस्ता कार्यमा बालबालिकादेखि वृद्धसम्म संलग्न छन् । बैंकिङ ठगीमा उल्लेख्य वृद्धि भएको छ । जिल्ला प्रहरी कार्यालय कास्कीमा पुस महिनामा मात्रै लागुऔषध र बैंकिङ कसुरसम्बन्धी १ सय ५३ मुद्दा दर्ता भएका छन् ।

प्रहरी उपरीक्षक दानबहादुर कार्कीले पछिल्लो समय चहलपहल बढ्न थालेसँगै आपराधिक क्रियाकलापमा पनि वृद्धि भएको बताए । प्रहरीले चालू आर्थिक वर्षमा सबैभन्दा धेरै भदौ महिनामा ३८ जनालाई लागुऔषधसहित पक्राउ गरेको छ । यस्तै, कात्तिकमा महिनामा १४ जना, असोज र मंसिरमा १३/१३ जनालाई नियन्त्रणमा लिएको छ ।

प्रदेश राजधानी भएसँगै लागुऔषध कारोबारी र प्रयोगकर्ताको संख्या पनि बढेको जिल्ला प्रहरी कार्यालयका प्रवक्ता एवं डीएसपी राजकुमार केसी बताउँछन् । ‘बाहिरबाट कारोबारी आउँछन् । विदेशी पनि प्रयोगकर्ता र कारोबारी छन्’ उनले भने, ‘लागुऔषध प्रयोगकर्ता अधिकांश किशोरावस्थाकै छन् ।’

पोखरामा बैंकिङ ठगीका घटना पनि बढ्दै गएका छन् । प्रहरीका अनुसार चालू आर्थिक वर्षको ६ महिनामा बैंकिङ कसुरसम्बन्धी ३२ वटा मुद्दा परेका छन् । हालसम्म यी मुद्दामा २२ जना पक्राउ परेका छन् ।

पक्राउ परेकाहरूबाट २ करोड ४५ लाख ३२ हजार ५ सय बिगो दाबी गरिएको छ । कतिपय कारोबारी बैंकिङ कसुरसम्बन्धी जानकारी नपाएरै फस्ने गरेको डीएसपी केसीले बताए । पक्राउ परेका अधिकांशले बैंकिङ कसुरबाट आफूलाई जानकारी नै नभएको प्रहरीसमक्ष बयान दिएका छन् ।

बैंकमा रकमविनाकाे चेक दिनेलाई पनि प्रहरीले कारबाही सुरु गरेको छ । पीडितको उजुरीका आधारमा बाउन्स चेक दिनेलाई नियन्त्रणमा लिएर कारबाही सुरु गरिएको डीएसपी केसीले बताए । चेक बाउन्सका यस्ता घटनामा ३२ जनाविरुद्ध उजुरी परेको छ ।

प्रकाशित मिति: बिहीबार, माघ २, २०७६ १०:५७