रकम नहुँदा उपचार सकिएको एक महिनापछि डिस्चार्ज

मन्त्रालयको पहलमा शुल्क मिनाह भएपछि एक महिनापछि डिस्चार्ज पाएकी घरेलु हिंसा पीडित पूजा सोमै । तस्वीरः विकाश पराजुली

A+ A A-

आर्थिक अभावका कारण अस्पतालबाट बिरामी निकाल्न नपाएका पाल्पाकाे एक परिवारले एक महिनापछि मंगलबार साँझ बिरामीलाई अस्पतालबाट डिस्चार्ज गर्न सफल भएकाे छ । तिलोत्तमा नगरपालिकास्थित क्रिमसन अस्पतालमा उपचाररत पाल्पा रामपुर नगरपालिका–४ की ठगिसरा सोमै (पूजा सोमै)को उपचार शुल्क सामाजिक विकासमन्त्री सुदर्शन बरालको पहलमा छुट गराएपछि अस्पतालले डिस्चार्ज दिएको हो ।

मन्त्री बरालको पहलमा १८ वर्षीया ठगिसराको उपचारमा लागेको शुल्क अस्पताल प्रशासन छुट गर्न सहमत भएको हाे । ८४ दिन अस्पतालमा भर्ना हुँदा १ लाख ६२ हजार ४ सय रुपैयाँको बिल भएको थियो । बिरामी सोमैको माइतीले आर्थिक संकलन गरी ८७ हजार ९ सय ३० रुपैयाँ अस्पताललाई बुझाइसकेका थिए । बाँकी रकम तिर्न नसक्दा अस्पतालले डिस्चार्ज दिन मानेको थिएन ।

बाँकी रहेको ७४ हजार ४ सय ७० रुपैयाँ नबुझाउँदा उपचार भइसक्दा पनि एक महिनादेखि अस्पतालले बिरामीलाई डिस्चार्ज दिएको थिएन । गत ८ असोजमा श्रीमान भूमबहादुर सोमैको कुटपिटबाट पूजाको टाउकोमा ठूलो चोट लागेको थियो ।

घाइते पूजालाई २९ असोजमा पाल्पा लुम्बिनी मेडिकल कलेजमा भर्ना गरिएकाे थियाे । त्यहाँ उपचार हुन नसकेपछि तिलोत्तमास्थित क्रिमसन अस्पताल लगिएको पूजाका दाइ सुवार परियारले जानकारी दिए । चिकित्सकले एक महिनाअघि नै घर लैजान भने पनि शुल्क तिर्न नसकेकाले अस्पतालले डिस्चार्ज नदिएको अवस्थामा मन्त्रीको पहलमा गठिसरालाई घर फर्काउन सकिएको उनले बताए ।

‘सहयोगका लागि अन्यत्र धेरै धायौं तर भनेजति पाइएन, मन्त्रीज्यूले भनेपछि शुल्कमा छुट पायौं, उहाँले नै घरसम्म लैजाने व्यवस्थासमेत मिलाउनुभयो’, उनले भने । सामाजिक विकासमन्त्री सुदर्शन बरालले कुनै पनि अस्पतालले १० प्रतिशत बिरामीलाई विपन्नताका आधारमा निःशुल्क उपचार गर्नुपर्ने प्रावधानअनुसार नै सोमैको बाँकी रहम मिनाहा गर्न लगाएको बताए ।

घरेलु हिंसा पीडित ठगिसराको उपचारमा अस्पतालले गरेको सहयोग सराहनीय भएको बताए । क्रिमसन अस्पतालका अध्यक्ष चिन्तामणि पाण्डेले बिरामीको आर्थिक अवस्था कमजोर भएको र मन्त्रीले आग्रह गरेपछि बाँकी शुल्क मिनाहा गरेको बताए ।

प्रकाशित मिति: बुधबार, पुस २३, २०७६ १५:२३