...अनि अर्थमन्त्रीले भनेः प्रवक्ता कता हुनुहुन्छ ? हात उठाउनुस् त

A+ A A-

मंगलबार अपरान्ह ४ बजे चालु आर्थिक बर्षको बजेटको मध्यावधि समीक्षा गर्न अर्थमन्त्रालयले पत्रकार सम्मेलन छ भन्दै निम्ता गर्यो ।

अधिकांश पत्रकार तोकिएकै समयमा अर्थमन्त्रालयको सुवर्णहलमा जम्मा भए । अर्थमन्त्री डा. युवराज खतिवडा ४ बजेर १९ मिनेटमा कार्यक्रमस्थल छिरे ।

औपचारिक कार्यक्रम सुरु भयो । मन्त्रालयको बजेट महाशाखा प्रमुख हरिशरण पुडासैनीले कार्यक्रम सुरु गरे । उनले अर्थसचिव डा. राजन खनाललाई बोल्न अनुरोध गरे ।

सचिव डा. खनालले चालु आर्थिक बर्षको लागि सरकारले बजेट मार्फत लिएका लक्ष्य, प्राप्त उपलब्धि, संशोधित अनुमान र अब गर्नुपर्ने कामको संक्षिप्त जानकारी दिए ।

त्यसपछि बोल्ने पालो अर्थमन्त्री डा. खतिवडाको आयो । उनले बजेटको मध्यावधि समीक्षा सार्वजनिक गरे । आफ्नो धारणा राखे । अर्थमन्त्रीको मन्तब्य टुंगिएपछि पत्रकारलाई प्रश्न गर्न समय दिइयो ।

सुरुमै रिपब्लिका दैनिकमा कार्यरत पत्रकार रुद्र पंगेनीले लामो भूमिका सहित प्रश्न सुरु गरे । पंगेनीले सोधेका दुई प्रश्नको अर्थमन्त्री डा. खतिवडाले रोचक जवाफ दिए ।

उनका प्रश्न ‘बैंकको ब्याज असाध्य महंगो हुँदा पनि डा. खतिवडा जस्तो विज्ञ अर्थमन्त्रीले किन सामान्य बनाउन नसकेको र अर्थमन्त्रालयबाट सूचना पाउन किन कठिन भएको’ भन्ने आशय सहितको थियो ।

बैंकको ब्याजदरका बारेमा डा. खतिवडाको जवाफ पंगेनीका लागि अपेक्षित थिएन ।

‘कुनै बेला बैंकले ७ प्रतिशत ब्याजमा कर्जा दिइरहेका थिए, त्यो राम्रो भएको थिएन, त्यसबेला तपाईहरुले ब्याज कम भयो भनेर लेख्नुभएन । लेख्नुभएको थियो भने पनि मैले पढ्न छुटाएछु क्यारे । ७ प्रतिशत ब्याजमा कर्जा दिने हो भने निक्षेपकर्ताले कति ब्याज पाउँछन् ? म एक्लै यो बिषयमा बोलिरहेको थिएँ,’ डा. खतिवडाले भने ।

डा. खतिवडा यतिमा रोकिएनन् ।

‘बैंकको ब्याज कति हुनुपर्ने हो ? तपाइ नै भन्दिनुस् न त, हामीलाई निर्णय गर्न पनि अलि सजिलो हुन्छ, बैंक पनि नमर्ने, ऋण लिएर उद्योग ब्यवसाय गर्न पनि सकिने र निक्षेपकर्ता निरुत्साहित भएर राष्ट्रिय बचत पनि कम नहुने कुनै विन्दु तपाइले पहिचान गर्नुभएको छ ?’ अर्थमन्त्री डा. खतिवडाले प्रश्नकर्ता पत्रकारसँग नै प्रतिप्रश्न गरे ।

पंगेनीकै दोस्रो प्रश्नको जवाफ पनि अर्थमन्त्रीले अलि फरक ढंगले दिए ।

‘सूचना नदिने भन्ने हाम्रो नीति होइन, मन्त्रालयको प्रवक्ता कता हुनुहुन्छ, हात उठाउँनुस् त,’ अर्थमन्त्री डा. खतिवडाले यसो भन्दै गर्दा हलमै रहेका मन्त्रालयका प्रवक्ता सुमन दाहालले हात उठाए ।

अनि अर्थमन्त्रीले थपे– मन्त्रिपरिषदको निर्णय पनि साप्ताहिक रुपमा पत्रकार सम्मेलन गरेर जानकारी दिने गरिएको छ, यहाँ पनि त्यसै गरौं, अबदेखि प्रवक्ताले प्रत्येक साता पत्रकार सम्मेलन गरेर यो मन्त्रालयसँग सम्बन्धित काम कारबाहीको जानकारी दिनुहुनेछ ।

नयाँ पत्रिका दैनिकमा कार्यरत पत्रकार जनार्दन बरालको जवाफमा अर्थमन्त्रीले उखान मिसाए ।

पत्रकार बरालले विदेशी मुद्राको संचिति घटेको सम्वन्धमा प्रश्न गरेका थिए ।

‘हामीले मलखादको आयात बढाएका छौं, यसले हाम्रो कृषि उत्पादन बृद्धिमा सघाउँछ, अर्काे आयात बढेको भनेको विकास निर्माणमा प्रयोग हुने बस्तुको हो, अलिनो पनि खान्न, नून ढिकी पनि फोर्दिन भनेर त भएन नि,’ अर्थमन्त्रीले उखान सुनाउँदै भने ।

अलिनो नखाने हो भने नून ढिकी फोर्न तयार हुनुपर्ने उनको भनाइ थियो । यसको तात्पर्य विकास निर्माणमा प्रयोग हुने बस्तुको आयात बढ्दा विदेशी मुद्राको संचिति कम भयो भनेर आत्तिन नहुने हो भनेर उनले सुझाए ।

विजमाण्डूडटकममा कार्यरत पत्रकार सविन मिश्रको प्रश्नको जवाफले पनि हलमा रमाइलो संचार गर्यो । मिश्रले आगामी आर्थिक बर्षको बजेटका लागि १५ खर्ब रुपैयाँको सिलिङ तोकिएको र चालु आर्थिक बर्षको बजेट घटाउँदा सो सिलिङ अनुसार ३२ प्रतिशत बजेट बढाउनु पर्ने अवस्था हुने भन्दै त्यसो गर्न सकिने अवस्थामा अर्थमन्त्रालय रहेको हो भन्ने आशयको प्रश्न गरेका थिए ।

मिश्रले आगामी आर्थिक बर्षको बजेटको सीमा १५ खर्ब रुपैयाँ भनेकोमा अर्थमन्त्रीले सो बिषय आफूलाई थाहा नभएको बताए । ‘आगामी आर्थिक बर्षको बजेटको सिलिङ आइसकेको हो र ? मलाई थाहै छैन त,’ अर्थमन्त्रीले भने ।

अनि मिश्रले राष्ट्रिय योजना आयोगको मध्यकालिन खर्च संरचना (एमटीइएफ) मा लेखेको छ भने ।

मिश्रले यस्तो भने पनि अर्थमन्त्री डा. खतिवडाले एमटीइएफले तय गरेको अंक नै कुनै पनि बर्षको बजेटको अन्तिम अंक नहुने बताए ।

अर्थमन्त्री डा. खतिवडाले जवाफको अन्तिममा क्यापिटल म्यागेजिनमा कार्यरत पत्रकार लोकबहादुर चापागाईको प्रश्नलाई सम्बोधन गरे । चापागाईले अन्य प्रश्न सहित अर्थमन्त्री डा. खतिवडाले राजीनामा गर्ने भन्ने हल्ला बाहिर आएको र सत्य कुरा के हो भन्ने थियो ।

‘म केही समय अगाडि वासिङ्टन गएको थिएँ, त्यो बेलामा प्रधानमन्त्रीले मलाई हटाउँदैछन् भनेर समाचार आए, केही दिन अगाडि म लण्डन गएको थिएँ, त्यो बेलामा अर्थमन्त्रीले राजीनामा दिन लागे भनेर समाचार आए, अब म फेरि विदेश जान्छु, त्यो बेलामा तपाइहरुले नै अब यी अर्थमन्त्रीले कहिल्यै नछोड्ने भए भनेर लेख्नुहुन्छ होला,’ अर्थमन्त्री डा. खतिवडाले हाँस्दैै भने । उनले यसो भन्दा हलमा पनि हासोको फोहोरा छुट्यो ।

कार्यक्रम सकियो ।

र यो पनि...

बजेटको मध्यावधि समीक्षाः सरकारी लक्ष्य कुनै नपुग्ने

प्रकाशित मिति: बुधबार, फागुन २२, २०७५ ०६:४३