डोटीमा हचुवा भरमा अपांगता परिचय पत्र वितरण गरेको आरोप

A+ A A-

देशमा संघीयता लागू हुनु पूर्व अपांगता सेवा संघको सिफारिसमा साबिकको महिला तथा बालबालिका कार्यालयले वितरण गरेको अपांगता परिचयपत्र हचुवाको भरमा वितरण गरेको एक कार्यक्रमका सहभागीहरूले आरोप लगाएका छन् ।

युनाईटेड मिसन टु नेपालको सहयोगमा अपांगता सेवा संघ डोटीले जिल्ला सदरमुकाम डोटीमा आयोजना गरेको समुदायमा आधारित बाल्यावस्था अपांगताको एकीकृत व्यवस्थापन परियोजनाको समापन कार्यक्रमका सहभागीहरूले सो आरोप लगाएका हुन् ।

कार्यक्रममा बोल्दै दिपायल सिलगढी नगरपालिकाकी नगर प्रमुख मञ्जु मलासीले प्रतिनिधि आउनु भन्दा पहिले अपांगता परिचयपत्र हचुवाको तालमा वितरण गरेको आरोप लगाइन् ।

उनले भनिन्, ‘अपांगता परिचय पत्र कुन व्यक्तिले कुन वर्गको परिचय पत्र पाउनु पर्ने हो सही छैन वास्तविक अपांगता भएकाले पाउनु पर्ने वर्ग अनुसारको पाएको छैन नपाउनु पर्नेले राम्रै वर्गको पाएको अवस्था पनि छ त्यसैले अहिले भत्ता वितरण र नयाँ परिचय पत्र दिनमा स्थानीय सरकारलाई समस्या हुने गरेको छ ।’

अपांगता भएका व्यक्तिहरूलाई सबै निकायले सहयोग गर्न आवश्यक रहेको जिल्ला समन्वय समितिकी उपप्रमुख शशी सोपले बताइन् । सहभागीतिर लक्षित गर्दै उनले भनिन्, ‘स्थानीय सरकार तपाईँहरूको घरदैलोमा छ । अब तपाईँहरूका समस्या र सवालका बारेका वडा कार्यालय हुँदै गाउँपालिका र नगरपालिकासँग माग गर्नुपर्छ सरकारले पनि अपांगता भएका व्यक्तिहरूका समस्यालाई सम्बोधन गर्नुपर्ने छ ।’ तर वास्तविक अपाङ्गताको अवस्था पत्ता लगाई सोही अनुसारको परिचय पत्र वितरण गरिनु पर्ने समेत उनले बताइन् ।

नगरपालिकाले अपाङ्गता भएका व्यक्तिहरूका लागि नगरसभाबाट बजेट विनियोजन गरी कार्यक्रम कार्यान्वयन भइरहेको शिखर नगरपालिकाकी उपप्रमुख धौलीदेवी रावले बताइन् ।

उनले भनिन्, ‘हाम्रो समुदायमा रहेका अपाङ्गता भएका व्यक्तिहरूलाई अपमान होइन सम्मान गर्नुपर्छ’ अपाङ्गताको नाममा आएको बजेट तथा कार्यक्रम कुनै पनि सपाङ्ग व्यक्तिलाई खान दिनु हुन्न सही रूपमा कार्यान्वयन हुनुपर्ने र फरक क्षमता भएका व्यक्तिहरूलाई शिखर नगरपालिले आवश्यक सहयोग गर्ने उनको भनाइ थियो ।

स्थानीय सरकार र सबै निकाएको सहयोगमा परियोजना उपलब्धि पूर्ण रूपमा सम्पन्न भएको युनाईटेड मिसन टु नेपाल डोटीका निमित्त टिम लिडर सुरेन्द्र राईले बताए ।

कार्यक्रममा गाउँ तथा नगर स्थित सञ्जालका प्रतिनिधि तथा जिल्ला स्थित सरोकारवाल निकायहरूको सहभागिता रहेको थियो । तर कार्यक्रमको ब्यानरमा परियोजनाको समापन भनिएको भएपनि परियोजना कुन कुन ठाउँमा लागु भयो, के के काम गरियो, उपलब्धि के भयो, चुनौती के रह्यो र आर्थिक रूपमा के कस्तो रह्यो भन्ने विषयमा कुनै जानकारी गराइएन ।

प्रकाशित मिति: शुक्रबार, पुस ११, २०७६ १०:१५