जन्मिएलगत्तै शिशुका नाममा बैंक खाता

A+ A A-

जुम्लाको पातारासि गाउँपालिकाले जन्मिएलगत्तै बालबालिकाको नाममा बैंक खाता खोलिदिने गरेको छ ।

बच्चा जन्मिएपछि जन्मदर्ता गराएलगत्तै गाउँपालिकाले ३ हजार र अभिभावकले ३ हजार रुपैयाँ गरी एकैपटक ६ हजार रुपैयाँ जम्मा गरिदिने गरेको छ ।

सम्पूर्ण गाउँपालिकावासीलाई बैंकको पहुँचमा पुर्‍याउने र वित्तीय साक्षरता अभिवृद्धि गराउने उद्देश्यले कार्यक्रमको सुरुआत गरिएको गाउँपालिका अध्यक्ष लामिछाने बोहोराले बताए ।

स्वास्थ्य संस्थामा जन्मिएका बच्चाको नाममा बैंक खाता खोलिदिने कार्यक्रम गत वर्षबाट गाउँपालिकाले सञ्चालनमा ल्याएको हो ।

महिला स्वास्थ्य संस्थामा आएर सुत्केरी भएको प्रमाण पेश गरेमा गाउँपालिकाले ३ हजार बच्चाको नाममा जम्मा गरिदिने गरेको छ ।

बच्चाको नाममा रकम जम्मा गर्ने गाउँपालिकाको कार्यक्रमले सबै महिला स्वास्थ्य संस्थामा आएर सुत्केरी हुने गरेका छन् । भविष्यमा बालबालिकालाई उच्च शिक्षा हासिल गर्न सहयोग पुग्ने गाउँपालिका अध्यक्ष बोहोराले बताए ।

बालबालिकाको उच्च शिक्षा अध्ययनमा सहयोग पुगोस् भनेर बालबालिकाको नाममा बैंक खाता खोलिदिने नीति तथा कार्यक्रमको सुरुआत गरिएको बोहोराले बताए ।

स्वास्थ्य संस्थामा बच्चा जन्मिएको प्रमाणसहित जन्मदर्ता गराएकै दिन बैंक खाता खोलेर रकम जम्मा गरिदिने गरेको अध्यक्ष बोहोराको भनाइ छ ।

स्वास्थ्य संस्थामा सुत्केरी भएमा आमा र बच्चाको जीवन सुरक्षा हुने भन्दै अध्यक्ष बोहोराले स्वास्थ्य संस्थामा जे जन्मिए पनि बच्चाको नाममा बैंक खाता खोलिदिने गरेको जानकारी दिए ।

गत वर्षसम्म २ हजार ५ सय रुपैयाँ जम्मा गर्दै आएको गाउँपालिकाले यस वर्षदेखि ५ सय रुपैयाँ थपेर तीन हजार पुर्‍याएको र उच्च शिक्षा हासिल गर्न एकैपटक धेरै रकम आवश्यक पर्ने हुँदा जन्मेदेखि बचत गरेमा सहज हुने हेतुले यो कार्यक्रम गाउँपालिकाले लागू गरेको अध्यक्ष बोहोराले बताए । रासस

प्रकाशित मिति: बुधबार, पुस ९, २०७६ ११:१२