नागरिकता कानुनले भारतमा हंगामा, कैयौं क्षेत्रमा धारा १४४ लागू

A+ A A-

भारतमा नागरिकता संशोधन विधेयकलाई लिएर ठाउँ–ठाउँमा प्रदर्शन भइरहेको छ । कतिपय संवेदनशील क्षेत्रमा ‘धारा १४४’ लागू गरिएको छ । दिल्लीस्थित १२ प्रहरी थाना क्षेत्रमा धारा १४४ लागू गरिएको अधिकारीहरूले बताएका छन् ।

तनाव बढेपछि धारा १४४ लागू गरिएको अधिकारीहरूलाई उद्धृत गर्दै बीबीसीले उल्लेख गरेको छ ।

दिल्ली मेट्रो रेल कर्पोरेसन (डीएमआरसी)ले लाल किला, जामा मस्जिद, चावडी बजार, जामिया मिल्लिया इस्लामिया र जसोला स्टेसन बन्द गरेको छ । डीएमआरसीले यहाँ ट्रेनहरू नरोकिने बताएको छ ।

के हो धारा १४४ ?

काेड अफ क्रिमिनल प्राेसिड्युर (सीआरपीसी)को धारा १४४ शान्ति कायम गर्नका लागि त्यो अवस्थामा लागू गरिन्छ, जतिबेला कुनै खालको सुरक्षासम्बन्धी खतरा वा दंगाको आशंका हुन्छ । धारा १४४ जहाँ लागू गरिन्छ, त्यो क्षेत्रमा पाँच वा पाँचभन्दा बढी मानिस एकै पटक भेला हुन पाउँदैनन् । धारा लागू गर्नका लागि सम्बन्धित क्षेत्रका जिल्ला अधिकारीद्वारा एक सूचना जारी गरिन्छ । धारा १४४ लागू भएपछि सर्वसाधारणका लागि इन्टरनेट सेवाहरू पनि बन्द गरिन्छ । यो धारा लागू भएपछि त्यो क्षेत्रमा हतियार लिएर हिँड्न मनाही हुन्छ ।

कहिलेसम्म लागू हुन सक्छ धारा १४४ ?

धारा १४४ दुई महिनाभन्दा बढी समयसम्म लगाउन सकिँदैन । राज्य सरकारले आवश्यक ठानेमा जनजीवनलाई ध्यानमा राखेर यसको अवधि बढाउन सक्ने व्यवस्थाचाहिँ छ । यद्यपि, यो स्थिति पनि धारा १४४ लागू गरिएको सुरुवाती मितिबाट ६ महिनाभन्दा बढी समयसम्म लगाउन सकिँदैन ।

सजाय के हुन्छ ?

गैरकानुनी तरिकाले भेला हुने कुनै पनि व्यक्ति वा समूहलाई दंगामा सामेल भएको मानिने र सोहीअनुसार मुद्दा चलाइने कानुन छ । यो मुद्दा प्रमाणित भएमा तीन वर्षसम्म कैद सजाय हुनेछ ।