‘निकै भोक लागेको छ, आमा चिकेन पुलाउ बनाऊ है भनेको थियो’

A+ A A-

साम स्टफर्डले आमासँग फोनमा भनेका थिए, ‘पेट बटार्ने गरी भोक लागेको छ आमै, चिकेन पुलाउ बनाउ है ।’

तर, सामको भाग्यमा अरु नै केही लेखेको थियो, केही बेरपछि नै दुइटा गोलीले उनको शरीर छेड्यो । एउटा गोली सामको चिउँडो छेडेर टाउकोतिर निस्कियो, अर्को गोलीले ढाडमा आफ्नो निशान छोड्यो ।

गत बिहीबारको त्यो पल सम्झँदै खेरि आमा मेमोनी स्टफर्डको अनुहारका मांसपेशीहरु मन्द–मन्द काँप्न थाल्छन् । आफूलाई सम्हाल्दै उनी भन्छिन्, ‘उसले चिकेन–पुलाउ खान पाएन, अस्पताल लैजानुपर्‍यो.... ।’

मेमोनी स्टफर्ड भन्छिन्, ‘त्यो दिन नागरिकता कानुनको विरुद्ध लताशील मैदानमा विरोध प्रदर्शन थियो, जसमा सुपरिचित आसामी गायक जुबिन गर्गलगायतका प्रसिद्ध कलाकार आउँदै थिए । त्यही हेर्न भनेर साम बिहान सबेरै त्यहाँ गएको थियो । र, साँझमा फर्कँने बेला उसले मलाई फोन गरेको थियो ।’

प्रत्यक्षदर्शी र परिवारका सदस्यका अनुसार गोली तब चल्यो जब साम एकतिरबाट घर गइरहेका थिए । त्यतिबेला उनीतिर एउटा र्‍याली आइरहेको थियो ।

नागरिकता कानुन : किन रिसाए असमी जनता ?

लोकसभामा नागरिकता विधेयक पेश गरिएपछि नै आसाममा विरोध प्रदर्शनको सिलसिला सुरु भएको थियो । यसलाई रोक्न सरकारी पक्षले निषेधाज्ञासमेत लगायो । तर, ठूलो संख्यामा प्रदर्शनकारीले निषेधाज्ञा तोडिरहेका थिए ।

कतिपय मानिसहरुका अनुसार यीमध्ये केही प्रदर्शन त यति विशाल थिए कि पछिल्लो तीन दशकमा यस्तो ठूलो आन्दोलन देखिएको थिएन । प्रशासनमाथि निकै दबाब थियो । यसै क्रममा हिंसा भयो । अहिलेसम्म आसाममा तीन जनाको मृत्यु भइसकेको छ ।

साम स्टफर्ड त्यो दिन गोली खाएर जहाँ ढलेका थिए, त्यो ठाउँलाई इँटाले घेरेर मानिसहरुले उनको तस्वीर राखेका छन्, त्यहाँ एउटा दियो दिनभर जलिरहेको देख्न सकिन्छ ।

शनिबार त्यही ठाउँमा एक शोकसभा पनि भयो जसमा परिवारलाई पनि बोलाइएको थियो । आइतबार त्यहाँबाट एक र्‍याली निकालियो ।

नजिकैको गल्लीमा बस्ने मुफीद लश्कर आइतबार साँझको र्‍यालीमा सहभागी भएका थिए ।

मुफीद लश्कर भन्छन्, ‘अलि टाढा चार वा पाँचवटा एसयूभी कार थिए, ती कारको हेडलाइट एक साथ बलिरहेको थियो ।अगाडिबाट आइरहेको र्‍यालीतिर अचानक हेडलाइट मोडियो । र, एक मिनेटभित्रै गाडीहरुको लाइट बन्द भयो । त्यसपछि गोली चलेको चर्को आवाज आयो । छेउबाटै एउटा केटा सडकतिर गएर लड्यो ।’

मुफीद लश्करका अनुसार त्यसपछि सेतो रंगका पाँच एसयूभी सडकमा अर्धचेतन भइ लडेका साम स्टफर्डको नजिकबाट हुइँकिए ।

प्रहरीले गोली चलाएको कुरा अस्वीकार गर्दै यसबारे अनुसन्धान भइरहेको बताएको छ ।

विरोध–प्रदर्शन रोक्ने जिम्मा केही शक्तिशाली मानिएका प्रहरी अधिकारीको हातमा दिइएको बताइएको छ ।

यद्यपि, विरोध प्रदर्शनको सिलसिला अहिले पनि जारी छ तर, मानिसहरुमा एउटा भयको माहोल भने छ ।

इन्टरनेटमा प्रतिबन्ध

दिउँसोबाट नै केही पसलहरु बन्द हुन थाले, साँझ सडकमा मानिसहरुलाई देख्न मुस्किल थियो । चार बजेपछि शहरमा कर्फ्यु जारी छ, इन्टरनेटमा पूर्णरुपमा प्रतिबन्ध लगाइएको छ, वाई–फाईले पनि धेरै ठाउँमा काम गरिरहेको छैन ।

साम स्टफर्डको घरमा नातागोतादेखि राजनीतिज्ञको ताँती लागेको छ, प्रार्थनासभाहरु भइरहेका छन्, उसलाई शहीद भनिँदैछ ।

काकी हिन्दु, मुस्लिम आमा र ईसाई पिताका ती सन्तान अर्थात् साम स्टफर्डको श्राद्ध गर्ने कुरा भइरहेको छ ।

घरका सदस्यका लागि उनीहरुको प्यारो ‘तूतू’ उही १७ वर्षको बच्चा थियो ।

अब क्रिसमस हुने छैन

दिदी मासूमी बेगम आँखाभरी आँसु पार्दै भन्छिन्, ‘भाइ (साम)लाई एभिएटर स्कुटरको शौख थियो, भन्थ्यो, कतैबाट ल्याएर दिनु न, म भन्थें, ऋण काडेर ल्याइदिउँला ।’ मासूमी बेगम क्रिसमसभन्दा हप्ता दस दिन पहिले भएको दुर्घटनाले घरको माहोललाई शोकमग्न पारेको छ । उसका साथी आउँथे, खानपीन गर्थे । तर, अब क्रिसमस हुने छैन । न उसका साथी नै आउनेछन् ।

मासूमी बेगम सोध्छिन्, ‘उसँग कुनै हतियार थिएन, त्यो भए किन मारियो ? गोली नै हान्नु थियो भने खुट्टामा हान्न सक्थे, हामी उसलाई ठीक गर्थ्यौं तर ज्यान नै किन मारियो ? कसले दियो उनीहरुलाई अर्काको ज्यान मार्ने अधिकार ?’

प्रश्न त यो पनि छ कि भारतको नयाँ व्यवस्था (नागरिक कानुन र एनआरसी)ले साम स्टफर्डको परिवारलाई कुन टोकरीमा राख्छ, जसको बुवा क्रिश्चियन अर्थात् ईसाई हुन्, आमा र दिदी मुसलमान र काकी हिन्दु ? (बीबीसी हिन्दीबाट गरिएको शब्दानुवाद)

प्रकाशित मिति: आइतबार, मंसिर २९, २०७६ २१:१३