क्षेत्रीय सडकको कुडुलेचोक–काठेखोला क्षेत्रमा कालोपत्रे सुरु

A+ A A-

क्षेत्रीय सडकका रूपमा रहेको बागलुङ नगरपालिका–४ कुडुले चोकदेखि काठेखोला गाउँपालिका जाने सडकमा कालोपत्रको काम सुरु भएको छ ।

कुडुले चोकदेखि मालिका–पञ्चकोट हुँदै तितौरे काठेखोला गाउँपालिकाको सिमानासम्म जाने १४ किलोमिटर सडकमा कालोपत्रको काम सुरू भएको हो ।

गण्डकी प्रदेशसभा सदस्य इन्द्रलाल सापकोटाको पहलमा गण्डकी प्रदेश, भौतिक पूर्वाधार विकास मन्त्रालयको ४२ करोडको लागतमा सो सडक स्तरोन्नतिसँगै कालोपत्र गर्न लागिएको छ ।

गण्डकी प्रदेशको ‘एक निर्वाचन क्षेत्र, एक रणनीतिक सडक आयोजना’ अन्तर्गत बागलुङ क्षेत्र नम्बर १ को प्रदेशसभा ‘ख’ मा पर्ने बागलुङ नगरपालिका र काठेखोला गाउँपालिकालाई समेट्ने गरी क्षेत्रीय चक्रपथका रूपमा यो सडकलाई विकास गर्ने योजना अनुरूप स्तरोन्नतिसँगै कालोपत्र गर्ने काम सुरू भएको प्रदेशसभा सदस्य सापकोटाले जानकारी दिए ।

‘क्षेत्रीय चक्रपथलाई कालोपत्र गर्ने गरी काम थालेका छौं,’ उनले भने, ‘कालोपत्रेसँगै जनताको जीवनस्तरमा समेत परिवर्तन आउनेछ ।’ दुई वर्षभित्र कालोपत्रे सक्ने गरी काष्ठमण्डप कन्ट्रक्सन प्रालिले जिम्मा पाएको निर्माण कम्पनीका साइड इञ्चार्ज रविन चपाईले जानकारी दिए ।

कात्तिक २ गते ठेक्का सम्झौता गरी अहिले धमाधम निर्माण कार्य सुरु गरेको चपाईको भनाइ छ । उनले काममा अवरोध नभए ठेक्का अवधिमै कालोपत्र सक्ने बताए ।

चपाईका अनुसार १४ किलोमिटर सडक आठ मिटरको मापदण्डअनुसार चौडा हुने, एक मिटर नाली निर्माण र ५.५ मिटर चौडा सडक कालोपत्र हुनेछ ।

पहिलो चरणमा बागलुङ नगरपालिका र काठेखोला गाउँपालिकाको सिमानासम्म कालोपत्र गरे पनि दोस्रो चरणमा तितौरै भीमपोखरा, धम्जा, बिहुँ, लेखानी, रेश हुँदै बलेवा जोड्ने सडक विस्तार र कालोपत्र गर्ने योजना रहेको बागलुङ नगरपालिकाका नगर प्रमुख जनकराज पौडेलले बताए ।

यो सडक कालेपत्र भएसँगै प्रसिद्ध धार्मिकस्थल पञ्चकोट र कुडुलेमा भएको भूमिगत शालिग्राम संग्रहालयमा धार्मिक पर्यटक बढ्नेमा विश्वास लिइएको छ । ग्रामीण सडकमा बर्खामा हिलो र हिउँदमा धूलोले आजित भएका स्थानीयवासीलाई सडक कालोपत्र भएपछि राहत हुनेछ ।

गण्डकी प्रदेश सरकारको ११ जिल्लामा ३६ रणनीतिक क्षेत्रीय सडक रहेका छन् । बागलुङमा रहेका चार रणनीतिक सडकमध्ये यो सडक सबैभन्दा लामो हो । रासस

प्रकाशित मिति: शुक्रबार, पुस ४, २०७६ ०८:५१