छाडा गाई व्यवस्थापन गर्न गौशाला निर्माण हुँदै

A+ A A-

पाल्पाको रामपुर नगरपालिकामा निर्माणाधीन गौशालाको ५० प्रतिशत काम सकिएको छ । नगरपालिकाले वडा नं ६ स्थित तातोपानीघाटमा गौ संरक्षण गर्ने उद्देश्यले गौशाला निर्माण कार्य अगाडि बढाएको थियो ।

गतवर्षको लक्ष्मीपूजाका दिन निर्माण सकेर गाई राख्ने लक्ष्य रहे पनि बजेट अभावमा निर्माण कार्य लम्बिएको हो । चालू आर्थिक वर्षमा गौशाला निर्माण गर्न नगरपालिकाले २० लाख रकम विनियोजन गरेको छ ।

नगरपालिकाबाट प्राप्त रकमले निर्माण कार्य सम्पन्न गर्न अपुग भएपछि महायज्ञ गर्न लागिएको नगर प्रवक्ता हुमनाथ न्यौपानेले जानकारी दिए । माघको दोस्रो हप्ता हुने श्रीमद्भागवत धनधान्यान्चल ज्ञान महायज्ञका लागि प्रवक्ता न्यौपाने अध्यक्ष रहेको १ हजार १ श्रीमद्भागवत धनधान्यान्चल ज्ञान महायज्ञ मूल आयोजक समिति गठन भएको छ ।

समितिको उपाध्यक्षमा थानेश्वर अधिकारी र पिताम्बर भण्डारी, सचिवमा वासुदेव ढकाल, कोषाध्यक्षमा चण्डिप्रसाद खनाल रहेका छन् ।

महायज्ञ अवधिभर ५० लाख रकम दान सङ्कलन गर्ने लक्ष्य रहेको छ । गौशालामा गाई बाँधेर मात्र गौशाला परिसरमै महायज्ञ गरिने भएको छ । गौ संरक्षण गर्न र रामपुर नगरपालिकालाई धार्मिक नगरी क्षेत्रका रूपमा चिनाउन, यत्रतत्र रामपुरमा छाडा छाडिएका गाईलाई व्यवस्थापन गर्न गौशाला निर्माण कार्य सुरुवात गरिएको हो ।

अहिले गौशालाको चारैतिरको भाग घेराबार गर्ने काम सम्पन्न भइसकेको छ । भुइँ ढलानको काम चलिरहेको छ । यहाँ करिब २ सयदेखि २ सय ५० सम्म गाई अट्ने क्षमताको गौशाला निर्माण भइरहेको निर्माण समितिका अध्यक्ष ओमप्रकाश रेग्मीले बताए ।

ट्रष्ट राख्ने, गोठको भकारो निर्माण, गेट निर्माण, पर्खालको प्लाष्टर, घाँसपात खाने ठाउँको व्यवस्थापन गर्ने काम बाँकी रहेको उनले जानकारी दिए ।

छाडा छाडिएका गाई रामपुर नगरपालिका–६ को कार्यालय परिसरमा अस्थायी टहरा बनाएर राखिएको छ । गत साउनदेखि नगरपालिकाले दुई हेरालुलाई तलब दिएर रेखदेखको जिम्मा दिएको छ । रासस

प्रकाशित मिति: आइतबार, मंसिर २९, २०७६ ०९:५८