आर्थिक अभावले डडेल्धुराका तीन खेलमैदान अलपत्र

A+ A A-

डडेल्धुरामा निर्माण भइरहेका तीनवटा खेलमैदानको निर्माण कार्य अलपत्र परेको छ । अमरगढी नगरपालिकामा संघ, प्रदेश र स्थानीय सरकारले अलगअलग खेलमैदान निर्माण गरिरहेकाले आर्थिक अभावमा ती खेलमैदान अलपत्र परेका हुन् ।

खेलमैदान नहुँदा डडेल्धुरामा खेलाडीहरूलाई खेल खेल्न सास्ती हुने गरेको छ भने पूर्वाधार अभावले गर्दा खेलकुदसम्बन्धी गतिविधि पनि शून्यजस्तै बनेको छ । पहिलेपहिले डडेल्धुरामा विभिन्न क्लबले खेलकुद प्रतियोगिता आयोजना गर्ने गरे पनि अहिले खेलमैदानको अभावकै कारण कुनै पनि खेलकद प्रतियोगिता आयोजना गर्न छोडेका छन् ।

डडेल्धुरामा हाल निर्माणधीन अवस्थामा रहेका खेलमैदान तीनवटै सरकारका बीचमा समन्वय नहुँदा अलपत्र अवस्थामा रहेका छन् । जिल्लाको अमरगढी नगरपालिकाका–४, ६ र ८ मा स्थानीय, प्रदेश र संघ सरकारले अलग–अलग खेलमैदान निर्माण गरिरहेकाले एउटा खेलमैदान पनि निर्माण सम्पन्न हुन सकेको छैन ।

अमरगढी नगरपालिका–४ स्थित उग्रतारा रंगशाला संघीय सरकारले निर्माण गरिरहेको छ भने वडा नम्बर ६ को ग्वाला खेतमा प्रदेश सरकार क्रिकेट खेलमैदान निर्माण गरिरहेको छ । यसैगरी वडा नम्वर ८ खोलाखेतमा अमरगढी नगरपालिका क्रिकेट खेलमैदान निर्माण गरिरहेको छ । तीनवटै खेलमैदानमा गत आर्थिक वर्ष करिब १ करोड रुपैयाँ खर्च हुँदासमेत खेलमैदानको निर्माण सम्पन्न हुन सकेको छैन । अहिले आर्थिक अभावकै कारणले अलपत्र परेका छन् ।

यी तीनवटै खेलमैदानको निर्माण कार्य गत आर्थिक वर्ष सुरु गरिएको हो । प्रदेश सरकारले चालू आर्थिक वर्षमा क्रिकेट खेलमैदानका लागि १० लाख रुपैयाँ विनियोजन गरेको भए पनि संघीय सरकार र अमरगढी नगरपालिकाले निर्माणाधीन खेलमैदानका लागि रकम विनियोजन गरेको छैन ।

पूर्वाधार अभाव भएपछि पछिल्लो पुस्ताका प्रतिभावान् खेलाडी पनि ओझेलमा पर्दै गएका छन् । अन्य जिल्लाका युवाहरू खेलमार्फत आफ्नो र देशको नाम विश्वमा चिनाइरहेको बेला डडेल्धुराका युवा भने पूर्वाधार अभावकै कारण खेलकुद छोेडेर वैदेशिक रोजगारीमा जान बाध्य भएको अमरगढी– ५ का स्थानीय खेलाडी मीन पालले बताए ।

डडेल्धुरालाई सुदूरपश्चिमको केन्द्र भनिन्छ तर जिल्लामा एउटा पनि ठूलो खेल मैदान छैन । भौगोलिक हिसाबले निकै अगाडि भए पनि पूर्वाधार अभावका कारण ठूला खेलकुदसम्बन्धी गतिविधि सञ्चालन गर्न नसकेको जिल्ला खेलकुद विकास समिति डडेल्धुराका अध्यक्ष राजेन्द्रबहादुर मगर बताए ।

अध्यक्ष मगरका अनुसार देश संघीय संरचनामा गएकाले बजेट पनि कटौती भएर स्थानीय तहमा गयो, त्यसैले जिल्ला खेलकुद समितिले आफ्ना नियमित कार्यक्रम मात्रै गरेको छ । ग्रामीण क्षेत्रबाट चौरमा खेल्दै जिल्लास्तरसम्म खेलाडी पुग्ने भए पनि त्यसभन्दा माथि जानका लागि अभ्यासको अभावले पुग्नै कठिन भएको उनको भनाइ छ ।

भलिबल, फुटबल, कराँते, क्रिकेट, तेक्वान्दो, ब्याडमिन्टन, एथलेटिक्स, बक्सिङ, बुद्धिचाल, टेबलटेनिस, कबड्डी र दौडका लागि प्रचुर सम्भावना डडेल्धुरामा छ । तर, भएको एउटा कभर्ड हल भत्केको महिनौं भइसक्दा पनि मर्मत हुन सकेको छैन ।

तेक्वान्दोका चर्चित खेलाडी दीपक विष्ट, बक्सिङ खेलाडी डम्बरदत्त भट्ट, भारोत्तोलन खेलाडी भरत साउद, एथलेटिक्सकी सरस्वती भट्टराई, क्रिकेट खेलाडी दिलीप नाथजस्ता खेलाडी डडेल्धुराका हुन् । खेल खेलाउनका लागि प्रशिक्षक आवश्यक हुन्छ तर डडेल्धुरामा भने प्रशिक्षक नभएकै कारण खेल खेलाउन समस्या भएको भलिबल प्रशिक्षक नरेश थापाले बताए ।

संघ, प्रदेश र अमरगढी नगरपालिकाले अलग–अलग खेलमैदान निर्माण गरिरहेकाले समस्या भएको अमरगढी नगरपालिका नगरप्रमुख विश्वेश्वरप्रसाद ओझाले बताए । ‘संघीय सरकारको एक स्थानीय तह एक खेलमैदानअन्तर्गत हामीले पनि प्रस्तावना पेश गरेका छौं,’ उनले भने, ‘यद्यपि त्यसको निर्णय हुन बाँकी छ । बजेट आउँछ भन्ने विश्वास लिएको छु ।’

यता जिल्ला खेलकुद विकास समिति डडेल्धुराका कार्यालय प्रमुख डम्बर भण्डारीले भने प्रदेश सरकार र स्थानीय सरकारले खेलमैदान निर्माणका लागि आफूलाई कुनै पनि जानकारीसम्म नगराएकोे बताए । बहुवर्षीय योजनामा निर्माण भइरहेका तीनवटै खेलमैदान राष्ट्रिय स्तरका भएको उनको भनाइ छ ।

प्रकाशित मिति: सोमबार, मंसिर ९, २०७६ १६:२४