चार दशकपछि घर फर्किएका रामबहादुरले भने : ‘घर पुग्नेबित्तिकै फोन गर्छु’

A+ A A-

१०३ वर्षका रामबहादुर थापामगरको ४० वर्षपछि घर जाने रहर पूरा भएको छ । आइतबार अमरगढी नगरपालिका र वडा नम्बर ३ ले बेग्लाबेग्लै फूलमाला र अबीरसहित उनको बिदाइ गरेका हुन् ।

रुकुमको उत्तरगंगा गाउँपालिका– १ मैकोट घर भएका रामबहादुर नेपाली सेनामा जागिरे थिए ।

जगिरकै सिलसिलामा डडेल्धुरा पुगेका उनी वि.सं. २०३५ मा सेनाको जागिर छाडेर भागेका थिए । डडेल्धुराको दह व्यारेकबाट भागेका उनी डडेल्धुरा, बैतडी, बझाङलगायत विभिन्न जिल्लामा काम गरेर जीविकोपार्जन गर्दै आएका थिए ।

‘पैसा कमाऊँला अनि घर जाऊँला’ भन्ने सपना बोकेका उनी पैसा कमाउन नसकेपछि घर फर्किएका थिएनन् । शरीरमा शक्ति र तागत हुन्जेलसम्म काम गरेर बसेका उनलाई पछिल्लो समय पेट पाल्न पनि धौधौ भइरहेको थियो ।

वृद्ध अवस्था भएकाले खानेकुरा जोहो गर्नै धौधौ भएको गुनासो गर्दै आएका थिए उनी । घरबाट ३०–३५ मिनेट हिँडेर पानी ल्याएर खाना पकाउने गरेका थिए । मर्ने बेला एकचोटि आफ्नै जन्मभूमि जाने उनको ठूलो रहर थियो ।

अमरगढी– ३ का स्थानीय शेर साउँदले उनलाई घर पठाउनका लागि विशेष पहल गरेका थिए । जिल्ला प्रशासन कार्यालय डडेल्धुरा र जिल्ला प्रशासन कार्यालय रुकुमको विशेष पहलमा उनको जन्मभूमि पत्ता लगाइएको थियो ।

घर जान पाएपछि रामबहादुरले खुशी प्यक्त गरे । आफूलाई घर पठाउन सहयोग गरेकामा सबैलाई उनले धन्यवाद दिए । ‘यतिका वर्षसम्म म यहाँ बसेँ । मलाई सबैको माया लाग्छ’, उनले भावुक हुँदै भने, ‘मैले धेरै जनाको फोन नम्बर लगेको छु । घर पुग्नेबित्तिक्कै फोन गर्छु ।’

रामबहादुलाई घर पठाउनका लागि गाडी रिजर्भ गरेको अमरगढी नगरपालिकाका नगर प्रमुख विश्वेश्वरप्रसाद ओझाले बताए ।

‘चार दशकदेखि उहाँ यहाँ बस्नुभएको रहेछ । उहाँ हाम्रो अभिभावक पनि हुनुहुन्छ । उहाँको घर जाने ठूलो इच्छा थियो’, उनले भने, ‘उहाँको घर परिवारसम्म पु¥याउनु हामी सबैको कर्तव्य हो । सबैको सहयोगले उहाँलाई हामीले घर पठाउन सक्यौँ ।’

अमरगढी नगरपालिकाले उनलाई लुगा कपडा पनि किनेर सहयोग गरेको उनले बताए । अमरगढी नगरपालिका– ३ का अध्यक्ष गोविन्द बोहराले पनि उनलाई ५ हजार रुपैयाँ व्यक्तिगत सहयोग गरेका छन् ।

अमरगढी– ३ को कार्यालयले उनलाई फूलमाला र अबीरसहित दोसल्ला ओढाएर बिदाइ गरेको अध्यक्ष बोहराले बताए।

प्रकाशित मिति: सोमबार, मंसिर ९, २०७६ १३:१३