शिलापत्र समाचार प्रभाव : ४० वर्षपछि पूरा भयो रामबहादुरको घर जाने रहर

४० वर्षपछि घर जान पाउने भएपछि उत्साहित देखिएका १०३ वर्षीय रामबहादुर थापामगर

A+ A A-

४० वर्षदेखि घर जान नपाएका १०३ वर्षीय रामबहादुर थापामगर आफ्नो घर जान पाउने भएका छन् । ‘कसले पूरा गरिदेला १०३ वर्षीय रामबहादुरको ४० वर्षपछि घर जाने रहर ?’ शीर्षकमा शिलापत्र डटकममा समाचार प्रकाशित भएपछि यहाँ जनप्रतिनिधि र सरोकारवाला निकायले रामबहादुरलाई घर पठाउन चासो देखाएका हुन् ।

घर फर्किने आशमा चार दशक पर्खिएका रामबहादुरको सपना पूरा गर्न आवश्यक सहयोग गर्ने जनप्रतिनिधि र गैरसरकारी संस्थाले प्रतिवद्धता जनाएका छन् । समाचार प्रकाशित भएपछि अमरगढी नगरपालिकाका प्रमुख विश्वेश्वरप्रसाद ओझा रामबहादुर बसेकै ठाउँमा पुगेर भेटेका थिए ।

सबैको आश्वासन पाएपछि रामबहादुरकाे घर जाने रहर पूरा हुने भयो भन्दै खुशी छन् । तर, यतिका धेरै वर्षसम्म घर नफर्केका उनले आफ्नो गाउँ पनि बिर्सिसकेका छन् । जन्मभूमि पत्ता नलाग्ने हो कि भन्ने चिन्तामा उनी थिए । तर, जनप्रतिनिधिको सक्रियताले उनको जन्मभूमि पनि पत्ता लागेको छ ।

बाग्लुङमा घर बताउने रामबहादुरको गाउँ रुकुममा रहेको पत्ता लागेको छ । पहिलेदेखि कसैले सोधे उनले आफ्नो घर बाग्लुङ नजिक पर्ने बताउँदै आएका थिए । जिल्ला प्रशासन रुकुममा सोधखोज गरेपछि रुकुमको उत्तरगंगा गाउँपालिका–१ मैकोटमा पर्ने पत्ता लागेको अमगढीका नगरप्रमुख ओझाले बताए ।

घर जान उत्साहित छन् रामबहादुर

अमरगढी–३ का स्थानीय शेर साउदको पहलमा रामबहादुरले मैकोटका स्थानीयहरूसँग टेलिफोनमा कुराकानी गरेका छन् । स्थानीयसँग कुराकानी गर्दा उनमा उत्साह देखिएको थियो ।

‘४० वर्षपछि आफन्तसँग कुरा भएको छ । उहाँहरूले मलाई गाउँ बोलाउनुभएको छ । धेरै पछि घर जाँदैछु । कतिले त चिन्दैनन् पनि होला,’ टेलिफोनमा कुरा गरेपछि उनले खुशी व्यक्त गर्दै भने, ‘म घरमा आउँदै छु । सबैजना राम्रोसँग बस्नु है, तपाईंहरूले घरसम्म पुर्‍याउनुपर्छ ।’

युवावस्थामै आर्थिक जोहोका लागि सेनामा भर्ती भएका रामबहादुर त्यसपछि घर फर्केका छैनन् । केही समय घर गए पनि जागिरबाट अवकाश पाएपछि एकपटक पनि घर पुगेनन् । सेनाको जागिर छाडेपछि भनेजस्तो पैसा नहुँदा उनी कमाइ गरेर मात्रै घर फर्किने निर्णयमा पुगे । यही निर्णयले उनलाई घरबाट वर्षौं अलग गरायो । शरीरमा तागत हुन्जेल उनले काम गरे । तर, आशा गरेजस्तो रकम जम्मा गर्न सकेनन् ।

जब उनी कमजोर हुँदै गए त्यसपछि कमाउने त कुरै भएन । घर फर्किने रकमसमेत पुगेन । धेरै समय बाहिर बसेकाले उनले गाउँ पनि बिर्सिसकेका थिए । अहिले पनि उनीसँग घर फर्किने रकम छैन । स्थानीय तहका जनप्रतिनिधि र केही गैरसरकारी संस्थाले सहयोग गर्ने प्रतिबद्धता जनाएका छन् । तर, हालसम्म कसैले पनि घर फर्किने रकम नदिएको रामबहादुर बताउँछन् ।

उनी अब भाडा जोहो गरेपछि आफ्नै गाउँ फर्किने तरखरमा छन् । अमरगढी नगरपालिका–३ का वडाध्यक्ष गोविन्दराज बोहराले रामबहादुरलाई घरमा पुर्‍याउन आफू व्यक्तिगत सहयोग गर्ने बताए ।

‘धेरैपटक त मैले व्यक्तिगत रूपमा सहयोग गरेको छु,’ उनले भने ‘अझै के कति रकम चाहिन्छ त्यसका लागि पनि दिन म तयार छु ।’ साथै उनले रामबहादुरलाई घर पठाउने बेला बाजागाजा, अबिर र फूलमालाले बिदाइ गर्ने बताए ।

प्रकाशित मिति: आइतबार, मंसिर ८, २०७६ ०९:१३