शिक्षक बनाइदिने भन्दै वडाध्यक्षले खाए खसी

A+ A A-

शिक्षक बनाइदिने भन्दै एक वडाध्यक्षले खसी उपहार मागेको खुलेको छ । बालविकासमा शिक्षक बनाइदिने भन्दै स्थानीय महिलाबाट खसी मागेको बताइएको छ । कालिकोटको सान्नी त्रिवेणी गाउँपालिका– ८ का वडाध्यक्ष जनकबहादुर केसीले विमला केसीसँग विद्यालयमा शिक्षिका नियुक्त गरिदिने भन्दै खसी घूस लिएको खुलेको हो ।

वडाध्यक्ष केसीले स्थानीय लालिगुराँस आधारभूत विद्यालयमा बालशिक्षामा जागिर लगाइदिने भन्दै १४ हजार मूल्यबराबरको खसी र मदिरा खाएको विमलाले आरोप लगाएकी छन् । ‘वडाध्यक्ष सहितको टोलीले बालविकासमा शिक्षिका नियुक्त गरिदिने भन्दै खसी काटेर खानु भएको हो’ उनले भनिन्, ‘तीन वर्ष निजी स्रोतबाट विद्यालयमा पढाए पनि स्थानीय तहको चुनावपछि मलाई स्रोतले नधानेको भन्दै हटाइएको थियो ।’

विद्यालयले बालशिक्षाका लागि आवेदन माग गरेपछि वडाध्यक्ष जनकबहादुर केसी, विद्यालय व्यवस्थापन समितिका अध्यक्ष अनिरुद्ध सहकारी र प्रधानाध्यापक आशा सहकारीले शिक्षिका बनाउने भन्दै खसी खाएर नियुक्ती पनि दिए तर स्कुलमा हाजिर हुन नदिएको विमलाको आरोप छ ।

‘अध्यापन अनुमतिपत्र नभएकोबारे वडाध्यक्षले पहिल्यै भनेको थिए, तर उहाँले कुरा मिल्छ भन्दै खसी काट्न लगाए,’ उनले भनिन् । पहिलोपटक नियुक्ति गर्दा कुखुरा खाएका वडाध्यक्षसहितको टोलीले भदौको नियुक्ति दिँदा १० हजारको खसी र २ हजारको कुखुरा खाएको विमलाले बताइन् ।

वडाध्यक्ष केसीले विमलाको जागिरका लागि पहल गरिरहेको बताए । अरुको अध्यापन अनुमतिपत्र भए पनि ल्याउनुस् भनेको अध्यक्ष केसीले बताए । ‘उहाँले अनुमतिपत्र ल्याउनु भएन,’ उनले भने, ‘नियुक्ति दिइएकाले जसरी पनि विमलालाई जागिर दिन्छौं ।’

विमलाले नियुक्ति भएको खुशीयालीमा खसी काटेर खाएको अध्यक्ष केसीले स्वीकार गरे । विद्यालयका प्रधानाध्यापक आशा सहकारीले बालशिक्षामा शिक्षक नियुक्त नभएको बताइन् ।

उनले विमलालाई भदौ महिनामा नियुक्ति दिएको भए पनि लाइसेन्स नहुँदा विद्यालयमा हाजिर नगराइएको बताइन् । ‘नियुक्ति दिइसकेको भए पनि आशाको लाइसेन्स नभएकाले पुनः विज्ञापन गरिएको छ,’ उनले भनिन् ।

प्रकाशित मिति: शुक्रबार, मंसिर ६, २०७६ १५:००