भिजिट भिसाका लागि किर्ते: ८ महिनामा १६ सय पासपोर्ट प्रहरीको नियन्त्रणमा, २ सय थानमाथि अनुसन्धान जारी

भिजिट भिसाका लागि किर्ते: ८ महिनामा १६ सय पासपोर्ट प्रहरीको नियन्त्रणमा, २ सय थानमाथि अनुसन्धान जारी

A+ A A-

बितेको आठ महिनामा भिजिट भिसा लागेका झण्डै १६ सय शंकास्पद पासपोर्ट प्रहरीले जफत गरेको छ । नेपाल प्रहरीको काठमाडौं उपत्यका अपराध अनुसन्धान कार्यालयका अनुसार, गत १५ साउनदेखि फागुन मसान्तसम्मको अवधिमा १५ सय ९६ थान पासपोर्ट जफत गरी अनुसन्धान गरिएको हो ।

कार्यालयका प्रहरी नायब उपरीक्षक (डीएसपी) गोविन्द पन्थीले अधिकांश पासपोर्टधारीले भिजिट भिसाका नाममा नक्कली कागजात बनाएको पाइएको बताए । उनका अनुसार, पासपोर्टधारी नै विभिन्न व्यक्तिबाट ठगीमा परेको थाहा पाएपछि जाहेरी लिएर करिब १४ सय पासपोर्ट सम्बन्धित व्यक्तिलाई फिर्ता गरिएको छ ।

यिनै पासपोर्ट छानबिनपछि गत मंसिरमा कार्यालयले अध्यागमन विभागका ९ अधिकृतसहित ४० जनाविरुद्ध सरकार कागज किर्ते गरेको अभियोगमा मुद्दा चलाएको थियो । यीमध्ये ३२ जना धरौटीमा छुटेका छन् भने ८ जना पुर्पक्षका लागि थुनामा रहेको डीएसपी पन्थीले बताए ।

यो पनि..

यूएई ‘ट्रान्जिट’ बनाएर भिजिट भिसामा युद्धग्रस्त देशमा मानव तस्करी

अहिले पनि करिब २ सय थान पासपोर्ट अनुसन्धानकै क्रममा रहेको उनले जानकारी दिए । अधिकांशले भिजिट भिसामा जानका लागि नक्कली कागजात बनाएको पाइएको पन्थीको भनाइ छ ।

‘कतिपय पासपोर्टधारी पढेलेखेका थिएनन् । उनीहरू आफूलाई केही थाहा नभएको बताउँथे । निश्चित रकम लिएर यो सबै काम अरुले नै गरिदिएको भन्थे,’ डीएसपी पन्थीले शिलापत्रसित भने, ‘अध्यागमनमा त्यही कागजात देखाउनू भनेकाले देखाएको, आफूलाई केही थाहा छैन भनेपछि किर्ते गर्नेविरुद्ध जाहेरी दिन लगाएर हामीले पासपोर्ट फिर्ता दियौँ ।’

उनले भिजिट भिसाका लागि किर्ते काममा नलाग्न सबैलाई अनुरोध पनि गरे ।

पछिल्लो समय भिजिट भिसा लगाएर दोस्रो मुलुकहुँदै तस्करहरूले नेपालीलाई कुवेतलगायत द्वन्द्वग्रस्त मुलुकहरू सिरिया, इराक, अफगानिस्तान, रुस, युक्रेनसम्म पुर्‍याउने गरेका छन् । गत जनवरीदेखि मेसम्म १ लाख ७७ हजार ५ सय ३९ जना भिजिट भिसामा विभिन्न देश गएका छन् । यसरी गएका आधाभन्दा बढी फर्किएका छैनन् ।

प्रकाशित मिति: मंगलबार, वैशाख २५, २०८१ १६:२६