दुग्ध उत्पादक किसानलाई उत्पादनका आधारमा अनुदान

A+ A A-

रुपन्देहीको तिलोत्तमा नगरपालिकाले दूधमा आत्मनिर्भर बन्न व्यावसायिक पशुपालनलाई प्रोत्साहन गर्न उत्पादनमा आधारित अनुदान कार्यक्रम अघि बढाएको छ । नगरपालिकाले दुई वर्षदेखि पशु बीमा रकममा ५० प्रतिशत अनुदान पनि दिँदै आएको छ ।

अनुदानमा साना किसानको पहुँचलाई बढाउँदै दुग्ध उत्पादनमा प्रोत्साहन गर्न अनुदान कार्यक्रम ल्याइएको नगर प्रमुख वासुदेव घिमिरेले बताए । नगरपालिकाले चालू आर्थिक वर्षमा दुग्ध उत्पादक किसानलाई प्रतिलिटर १ रुपैयाँको दरले अनुदान दिनेगरी बजेट विनियोजन गरेको छ ।

नगरपालिकाले दुग्ध उत्पादक सहकारीमार्फत किसानलाई अनुदान दिने व्यवस्था मिलाएको हो । किसानले एक वर्षमा जति लिटर दूध सहकारीमार्फत बिक्री गर्छन्, सोहीअनुसार अनुदान प्रदान गरिने उपप्रमुख जागेश्वरी चौधरीले बताइन् ।

अनुदानलाई व्यवस्थित बनाउन सरोकारवालाहरुसँगको परामर्शमा नगरपालिकाले प्रोत्साहन रकम वितरण कार्यविधिसमेत जारी गरेको छ ।

तिलोत्तमामा हाल १९ वटा दुग्ध उत्पादक सहकारीहरू छन् । सहकारीको पछिल्लो आर्थिक वर्षको अडिट रिपोर्टका आधारमा किसानलाई नगद अनुदान दिनेगरी व्यवस्था मिलाइएको प्रमुख प्रशासकीय अधिकृत माधवप्रसाद शर्माले जानकारी दिए ।

शुक्रबार आयोजित एक कार्यक्रमका बीच नगरपालिकाले आर्थिक वर्ष २०७५÷७६ को दूध संकलन विवरणका आधारमा दूध उत्पादन अनुदान वितरण गरेको छ । विभिन्न १४ वटा सहकारीले शुक्रबार अनुदान रकम प्राप्त गरेका छन् । बाँकी सहकारीले आवश्यक प्रक्रिया पूरा गरेपछि अनुदान रकम प्राप्त गर्ने नगरपालिकाले जनाएको छ ।

गत आर्थिक वर्षमा तिलोत्तमाका सहकारीले कुल ३८ लाख ८५ हजार लिटर दूध संकलन गरेका थिए । तिलोत्तमामा वार्षिक ५० लाख लिटर बढी दूध उत्पादन हुने गर्दछ । नगरको टिकुलीगढ दुग्ध उत्पादक सहकारीले वार्षिक ७ लाख लिटरभन्दा बढी दूध संकलन गर्दै आएको छ ।

सहकारीमार्फत ३ हजारभन्दा बढी किसानले दूध बिक्री गर्ने गरेको र २७ केन्द्रमा दूध संकलन हुने गरेको सहकारीले उपलब्ध गराएको तथ्यांकमा उल्लेख छ । सहकारीले अनुदान रकमलाई किसानलाई भुक्तान गरी त्यसको भर्पाइ नगरपालिकालाई बुझाउनुपर्नेछ । यो व्यवस्थाले तल्लो तहका किसानमा समेत अनुदानको पहुँच पुग्ने नगरपालिकाको विश्वास छ ।

प्रकाशित मिति: शुक्रबार, कात्तिक ८, २०७६ १८:१४