सिद्धार्थनगर नगरपालिकाका मासु पसलमा अनुगमन

A+ A A-

सिद्धार्थनगर नगरपालिकाले बिहीबार नगर क्षेत्रभित्रका मासु पसलहरूमा अनुगमन गरेको छ । अनुगमनका क्रममा ७, ५ र १३ वडामा रहेका मासु पसलहरूमा अनुगमन गरिएकोमा अधिकांश पसलमा सडेगलेको मासु भेटिएपछि बरामद गरिएको छ ।

अनुगमन समिति संयोजक एवं सामाजिक विकास शाखा अधिकृत यादवप्रसाद सापकोटाले नगरभित्रका १२ वटा मासु पसलको अनुगमन गर्दा एक क्विन्टलभन्दा बढी सडेगलेको मासु भेटिएपछि बरामद गरी नष्ट गरिएको बताए ।

‘व्यवसायीले जनस्वास्थ्यमाथि निकै खेलवाड गरेको पाइयो । महिनौंदेखि सडेको मासु विक्रीका लागि राखेको पाइएपछि हामीले बरामद गरेर नष्ट गरेका छौं । व्यवसायीलाई सचेत गराएका छौं’, उनले भने ।

नगरपालिकाको अनुगमन समितिले बुधबार पनि ५ र ६ वडामा रहेका खाद्यान्न पसल, किराना पसल तथा होटल र मिठाई पसलमा अनुगमन गरेको थियो । अनुगमनमा म्याद गुज्रिएका खाद्यवस्तु भेटिएपछि जफत गरी नष्ट गरिएको थियो ।

अनुगमनका क्रममा बरामद गरी नष्ट गरिएको करिब एक क्विन्टल मासुमध्ये ८० केजीभन्दा बढी बाख्रीको मासु रहेको संयोजक सापकोटाले बताए । उनका अनुसार सिनपा–७, जनकपथमा रहेको न्यू सुपर मासु पसलले उपभोक्तालाई जानकारी नै नदिई उक्त परिमाणको बाख्रीको मासु बिक्रीका लागि राखेको पाइएको थियो । सो पसलबाट ८ वटा बाख्री पनि नियन्त्रणमा लिइएको छ । सो पसललाई अर्को निर्देशन नहुँदासम्म सञ्चालनमा समेत रोक लगाइएको छ ।

‘नगरपालिकाले धेरैपटक सचेत गराउँदासमेत सडेगलेको मासु र बाख्रीको मासु बिनाजानकारी बेचविखन गर्नु कानुनको उपहास हो’, संयोजक सापकोटाले भने ।

अनुगमन टोलीमा भेटेरिनरी चिकित्सक ईश्वरचन्द्र चौधरी, जिल्ला प्रशासनबाट पुरुषोत्तम नेपाल, वाणिज्य कार्यालयबाट नारायण पन्थी, खाद्य प्रविधि तथा गुण नियन्त्रण कार्यालयबाट शिखर आचार्य, उद्योग व्यापार संगठनका वरिष्ठ उपाध्यक्ष गिरिषचन्द्र त्रिपाठी, सिद्धार्थ उद्योेग वाणिज्य संघका सदस्य मंगल भण्डारी, नेपाल प्रहरीलगायतको सहभागिता थियो ।

प्रकाशित मिति: बिहीबार, कात्तिक ७, २०७६ १८:५१