फेरिएको राजनीतिमा कांग्रेस महासमिति बैठकले पारित गरेको एजेन्डा के हुन्छ ?

A+ A A-

बुधबार विश्वासको मत लिँदा प्रधानमन्त्री पुष्पकमल दाहाल प्रचण्डले कांग्रेसले धोका दिएको आरोपको प्रत्युत्तरमा आफ्ना कारणले कांग्रेसभित्र एकता देखिएको बताए । उनले कांग्रेसको विचार समूहका लडाइँले आफू वाक्क भएको दाबी पनि गरे । त्यसको प्रत्युत्तरमा कांग्रेस महामन्त्री विश्वप्रकाश शर्माले पार्टीभित्रको निर्णय लिँदा नीतिबारे बहस गर्दा अर्को पार्टीलाई सोध्न नपर्ने बताए ।

बहसको सन्दर्भ थियो– कांग्रेस महासमिति बैठकमा भएको बहस र पारित भएको प्रतिवेदन । ७ देखि १० फागुनमा भएको कांग्रेस महासमिति बैठकमा उपसभापति पूर्णबहादुर खड्काको राजनीतिक प्रतिवेदनमा जनयुद्धले देशको विकास हुन नसकेको भन्दै माओवादीले गरेको सशस्त्र युद्धलाई गलत रूपमा चित्रण गरिएको थियो । त्यस्तै, गठबन्धन बनाएर चुनावमा गएर सरकार चलाइरहेको बेला ४ वर्ष बाँकी छँदै चुनावअगाडि गठबन्धन नगर्ने महामन्त्री गगन थापाको सांगठनिक प्रस्तावले माओवादीलाई कांग्रेससँगको सहकार्यमा भाँजो हाल्ने काम गरेको प्रधानमन्त्री प्रचण्डको तर्क छ ।

कांग्रेस महासमिति बैठकमा पेस भएका चारवटै प्रस्ताव सर्वसम्मतिले पारित

यस्तोमा महासमितिका प्रस्तावहरू केन्द्रीय समितिबाट पारित गराउँदा परिमार्जन गरेर प्रधानमन्त्री प्रचण्डलाई फकाउने योजनामा कांग्रेस सभापति शेरबहादुर देउवाको तयारी थियो । तर, २० फागुनमा प्रधानमन्त्री प्रचण्डले गठबन्धनको काँध फेर्ने निर्णय लिएर २१ फागुनमा कांग्रेसले सरकारलाई दिएको समर्थन फिर्ता लियो । राजनीतिक वातावरण फेरिएपछि कांग्रेसले महासमिति बैठकबाट पारित गरेको प्रतिवेदनहरू के हुन्छ ? भन्ने प्रश्न उब्जेको छ । अन्य दलहरूसँग प्रत्यक्ष जोडिने विषय मात्र नभएर पार्टीबाट नेताहरूको बहिर्गमन तालिका अर्का महामन्त्री विश्वप्रकाश शर्माको समसामयिक राजनीतिक प्रतिवेदनमा समावेश गरिएको १,२,३, ४ को नीति के हुन्छ भन्ने प्रश्न पनि छ । उनको प्रस्तावलाई आफूलाई हेरेर ल्याइएको भन्दै महासमिति सदस्यहरूले विरोध पनि गरेका थिए । एकपटक राष्ट्रपति, दुईपटक प्रधानमन्त्री, तीनपटक मन्त्री र चारपटक सांसद हुन पाउने प्रस्ताव महासमिति बैठकले अनुमोदन गरेको थियो ।

कांग्रेस महासमितिले गर्‍यो दुई महत्त्वपूर्ण निर्णयः विश्वप्रकाशको एजेन्डा पास हुँदा गगनलाई झड्का

गठबन्धन अनुकूल संशोधन गर्न तयार भएका कांग्रेस नेताहरूले गठबन्धन नै नरहेपछि पार्टीको प्रस्तावलाई कुन रूपमा लिन्छन् भन्ने बहस पार्टीभित्र उठ्न थालेको छ । केन्द्रीय समितिबाट महासमितिले पारित गरेका प्रतिवेदनहरू पारित हुनेछन् । ‘नयाँ राजनीतिक घटनाक्रम भए पनि त्यसले पार्टीका कुराहरूमा प्रभाव पर्दैन । पछिको कुरा पछि नै गर्ने हो । गठबन्धनलाई निरन्तर दिने भन्ने कुरा पहिले नै पास गरेका हौँ । गठबन्धन निरन्तर रहन सकेन,’ पार्टी प्रवक्ता डा. प्रकाशशरण महतले शिलापत्रसँग भने, ‘गठबन्धन गर्ने कुरा परिस्थिति जुन बेला जस्तो हुन्छ, त्यसैअनुसार तय हुन्छ ।’ यो या त्यो पार्टीसँग गठबन्धन गर्ने वा एक्लै लड्ने विषय रणनीतिक रहेकाले तत् समयमा निर्णय हुने उनले बताए ।

राजनीतिक बहिर्गमनको कुरा पनि तोक्ने उचित नहुने प्रवक्ता महतले बताए । ‘बहिर्गमनको कुरा आवश्यकताको सिद्धान्तले तय गर्छ । कोही एकपटकमा बहिर्गमन होलान् । कोहीलाई स्थानीयसँग लोकप्रिय छ, उसलाई नउठाई चुनाव जित्न सकिन्न भन्ने होला यो कुरा पनि त्यस्तै हो,’ महतले भने ।

केन्द्रीय समितिको बैठक बोलाउनुअघि प्रतिवेदन पेस गरेकाहरूलाई पुन: एकपटक प्रतिवेदनमाथि छलफल गरेर एकीकृत गराउने प्रयास कांग्रेसले गरेको छ । ‘प्रतिवेदन पेस गर्ने पदाधिकारीहरूबीचमा छलफल गरेर एकीकृत गराउने भनेर कार्यसम्पादनमा समितिबाट भनेका छौँ । केन्द्रीय समिति बैठकमा पेस गर्नेछौँ,’ सहमहामन्त्री भीष्मराज आ्ङदेम्बेले शिलापत्रसँग भने । सम्बन्धित पदाधिकारीले एकीकृत गरेपछि पदाधिकारी बैठकले पारित गर्छ र परिमार्जनका लागि केन्द्रीय समितिमा पेस हुनेछ ।

गठबन्धनको विषय होस् या पार्टीबाट बहिर्गमनको विषय, पार्टीभित्र वैधानिक रूपमा मिल्ने सहमहामन्त्री जीवन परियार बताउँछन् । छलफलमा विषयहरू प्रवेश गरे पनि केन्द्रीय समितिमा पेस हुनुअगावै प्रतिवेदनबारे राजनीतिक कार्यदिशा कस्तो हुन्छ भन्न नसकिने उनले बताए । ‘समावेश गर्नुपर्ने कुराहरूलाई समावेश गर्नका लागि केन्द्रीय समितिले दस्तावेजलाई अन्तिम रूप दिनका लागि समिति बनाउँछ, त्यसले अन्तिम रूप दिनेछ,’ सहमहामन्त्री परियारले भने ।

कांग्रेस महासमिति बैठक पार्टीको नीति अधिवेशन थियो । पार्टीको विधान कस्तो बनाउने भन्दा पनि गठबन्धन गर्ने कि नगर्ने भन्ने विषयले अन्य विषयलाई छायाँमा पारेको थियो । विशेष गरी सत्ता पक्षले गठबन्धनको विषय रणनीतिक भएकाले तत्कालको परिस्थितिले निर्धारण गर्ने बताए भने संस्थापनइतर समूहले पार्टी कार्यकर्तालाई रुखबाहेक अन्य चुनाव चिह्नमा भोट हाल्ने वातावरण बनाउने अडान लिएको थियो ।

गठबन्धन र जनयुद्धको कुरा कांग्रेस महासमिति बैठकमा उठे पनि प्रतिक्रिया स्वरुप समीक्षा माओवादी स्थायी कमिटीमा पनि पुगेको थियो । गठबन्धन भत्किनुका कारणहरूमध्ये एक कारण कांग्रेसको महामितिलाई माओवादीले दोष दिएको थियो । फरक कित्तामा पुगेपछि कांग्रेसले गर्ने निर्णयले राजनीतिक दिशालाई पनि प्रभाव पार्ने देखिन्छ ।

प्रकाशित मिति: शुक्रबार, चैत २, २०८० ०६:५२