कांग्रेस बैठकमा नेताहरूकाे निष्कर्ष – समयमै धाेका पाइयाे, ठीकै भयाे

A+ A A-

नेपाली कांग्रेसले माओवादी केन्द्रका अध्यक्ष पुष्पकमल दाहाल प्रचण्डबाट सरकार बन्ने क्रममा २०७९ सालको आम चुनावयता दई पटक धोका पायो । २०७९ पुस १० गते प्रचण्ड प्रधानमन्त्री बन्ने बेलामा र २०८० फागुन २० मा सरकारबाट निकालिएर । अहिले पुस १० को जस्तो कांग्रेसमा हारको भाव छैन । यो पटक कांग्रेसको निष्कर्ष छ– प्रधानमन्त्री प्रचण्डले धोका दिए । ‘धोकेवाज’ भएर प्रधानमन्त्रीले अनेक बहाना देखाए ।

मंगलबारको केन्द्रीय कार्यसम्पादन समितिको बैठकपछि एक पदाधिकारीलाई शिलापत्रले सोध्यो, ‘सभापति शेरबहादुर देउवा र पार्टीको मुड कस्तो छ ?’ जवाफमा ति पदाधिकारीले भने, ‘पार्टी एकढिक्का बनाएर जानुपर्छ भन्ने छ । पुस १० को जस्तो छैन । हारेको फुटबल टिम जस्तो एकले अर्कालाई दोष लगाउने जस्तो छैन । जाने हो, खेल्ने हो, भिड्ने हो । ड्याङका ड्याङ गोल हान्ने हो । पोस्ट नै भाँच्चिने गरी गोल हान्ने हो भन्ने छ मुड ।’

अब कांग्रेस एकताबद्ध भएर अघि बढ्ने मुड सबैमा रहेको ती पदाधिकारीले बताए । ‘सब्सिच्युट प्लेयरकाे भर नपरी गोल हानौँ भन्ने ठीक ठाउँमा आएको छ,’ उनले भने । बैठकबाट कांग्रेसले सरकारलाई दिएको समर्थन फिर्ता लिने निर्णय गरेकाे छ । साढे दुई घण्टा सम्म चलेकाे बैठकमा आधा घण्टाभन्दा बढी समय पूर्व उपसभापति विजयकुमार गच्छादारले लिए । सहभागीहरू सबैले पालैपालो गन्थन मन्थन शैलीमा आफ्नो धारणा राखे । अनौपचारिक जस्तो बैठकमा सबैले कुरा राख्ने र तर्क वितर्क चलिरह्यो ।

विगतमा जस्तो संस्थापन र इतर पक्ष भनेर आलोचना भएन । मन्त्रीहरूले हामीले गल्ती गरेका छैनाैँ भनेर बचाउ गरे ।देउवा निवास बूढानीलकण्ठबाट नेताहरू किस्ता किस्तामा बाहिरिएका थिए । बैठकमा सरकारबाट बाहिरिनुपरेको र प्रधानमन्त्री प्रचण्डले गरेको व्यवहार र यसबीचमा भएको छलफलबारे उपसभापति पूर्णबहादुर खड्काले ब्रिफ गरेका थिए ।

‘एमालेलाई राष्ट्रियसभामा ६ सिट दिन माओवादी तयार भएको थियो । यसको भित्रि कुरा बुझ्नुपर्छ भन्ने महामन्त्रीको धारणा थियो,’ बैठकपछि एक नेताले भने । धोका समयमै पाइयाे भनेर चित्त बुझाउने काम पनि नेताहरूबाट भयाे । ‘अब यो सरकारको बारेमा धेरै चिन्ता नगरौँ । आफ्नै भारीले थिचिन्छ । हिँडन् त सक्दैन दौडिनु धेरै परको कुरा हो,’ एक नेताले भने ।

बूढानीलकण्ठ बैठकमा प्रधानमन्त्री प्रचण्डले सफेद झुट बोलेको चर्चा भयो । त्यसअघि उनले म नमरुन्जेल देशमा उथलपुथल भइरहन्छ भनेको कुरामा पनि कांग्रेस नेताहरूले समय लिएर चर्चा गरे ।

सत्ताकाे नयाँ समीकरण बनाउन भने कांग्रेसले भित्रभित्रै एमाले शैलीमा तयारी गर्ने संकेत दिएकाे छ । ‘यो त नभनि गर्ने कुरा हो नि,’ एक पदाधिकारीले भने ।

सिटौला बोल्न चाहेनन्

राष्ट्रियसभा अध्यक्षको तोक पार्टीबाट लागेर चुनाव जितेर आएका नेता कृष्णप्रसाद सिटौला बोल्न चाहेनन् । सञ्चारकर्मीको आग्रह उनले नकारे । ‘अहिले नबोलौँ एक जना आएर आधिकारिक रूपमा बोल्नुहुन्छ भन्दै’ उनी बाटो लागे ।

पूर्व मन्त्रीको मुड

बैठकबाट सबैभन्दा पहिले निवर्तमान स्वाथ्यमन्त्री मोहनबहादुर बस्नेत बाहिरिएका थिइ । अब एमालेसँग सत्ता सहकार्य सम्भव छ भन्ने प्रश्नमा उनले भने, ‘राजनीतिमा असम्भव भन्ने के छ र?’

उपसभापति धनराज गुरुङ हाँस्दै बाहिर आए । मन्त्रीहरूले असहयोग गरेको प्रचण्डको आरोपबारे जिज्ञासा उनलाई राखिएको थियो । ‘अरुको काँध चढ्ने र काँध फेर्ने बानी परेको छ । असन्तुष्टि व्यक्त गर्नुभएकाे छैन,’ उनले जवाफ दिए ।

प्रकाशित मिति: मंगलबार, फागुन २२, २०८० २१:११