दसैंमा ट्राफिक नियम मिच्नेबाट ३६ लाख जरिवाना उठ्यो

A+ A A-

बडा दसैं सुरक्षा योजनाअनुसार कास्की प्रहरीले सवारी नियम उल्लंघन गर्ने सवारीचालकबाट ३६ लाख २० हजार ५ सय रुपैयाँ जरिवाना असुल गरेको छ । जिल्ला प्रहरी कार्यालय कास्कीले चाडपर्व लक्षित ट्राफिक जाँचबाट उक्त रकमबराबरको जरिवाना संकलन भएको जानकारी दिएको हो ।

जिल्ला प्रहरी कार्यालय कास्कीका प्रहरी प्रमुख उपरीक्षक (एसपी) दानबहादुर कार्कीले दसैं सुरक्षा योजनामा सवारी नियम उल्लंघन गर्ने ४ हजार ८ सय चालक कारबाहीमा परेका थिए । उनका अनुसार अघिल्ला महिनाभन्दा असोज महिना आपराधिक गतिविधिमा कमी आएको छ ।

कार्कीका अनुसार साउनमा १ सय ६१ आपराधिक घटना भएका छन् भने भदौमा १ सय ७३ र असोजमा जम्मा १ सय २९ वटा मात्रै आपराधिक घटना भएका छन् । कास्कीमा प्रतिशतका आधारमा हेर्दा २५.४३ प्रतिशतले आपराधिक क्रियाकलापमा कमी आएको एसपी कार्कीले बताए । उनले भने, ‘तुलनात्मक रूपमा आपराधिक क्रियाकलापमा कमी आएको छ ।’ कास्कीमा हुने हरेक आपराधिक गतिविधिलाई नियन्त्रण गर्न प्रहरी सक्रियताका साथ लागिपरेका उनले बताए ।

असोजमा प्रहरीले जिल्लाका विभिन्न स्थानबाट लागूऔषध कारोबारमा संलग्न २२ जनालाई पक्राउ गरेको छ । यो पछिल्लो दुई महिनायताकै कम संख्या हो । प्रहरीले गत साउनमा ४४ र भदौमा ६१ जना लागूऔषध कारोबारीलाई पक्राउ गरेको थियो ।

असोजमा कास्की प्रहरीले जुवातासमा संलग्नहरूबाट बढी रकम बरामद गरेको छ । प्रहरीले असोजमा मात्रै ८१ जना जुवाडेलाई पक्राउ गर्दा ९ लाख ६५ हजार रुपैयाँ बरामद गरेको थियो । त्यस्तै, भदौमा ११ खालबाट ५ लाख ५९ हजार रुपैयाँ, साउनमा १२ खालबाट ५ लाख ८१ हजार रुपैयाँ बरामद गरिएको थियो ।